ནགས་དམར་པོ་ཞེས་བྱ་བའི་ནགས་ཡིན་ཏེ་ནགས་གང་ལ་ལྷ་རྣམས་རབ་ཏུ་དགའ་བར་འགྱུར་བའོ། །དེའི་ཚེ་ལྗོན་ཤིང་དེ་དག་རྣམས་ཀྱི་འོད་ཀྱིས་སྣ་ཚོགས་པའི་ཁ་དོག་ཏུ་གྱུར་ཅིང་རིན་པོ་ཆེ་སྣ་ཚོགས་པ་རྣམས་ཀྱི་འོད་ཀྱིས་བརྒྱན་པ་དང་ཆ་བྱད་སྣ་ཚོགས་འཛིན་པར་ཡང་གྱུར་ནས་གང་གི་ཚེ་ནགས་དེ་ན་རབ་ཏུ་དགའ་བར་འགྱུར་རོ། །ཤིང་དེ་དག་རྣམས་ཀྱི་འོད་དེ་དག་གིས་ཀྱང་ཉེ་འཁོར་དུ་རིན་པོ་ཆེ་མཆོག་རྣམས་དང་ལྡན་པར་འགྱུར་རོ། །ནགས་དེ་ཡང་པད་མ་རཱ་གའི་ནགས་དང་ཀར་ཀེ་ཏའི་ནགས་སུ་གྱུར་པ་ཁ་དོག་དང་རེག་བྱ་ཡང་བདེ་བར་གྱུར་པ་དང་ཁ་དོག་དེ་དག་དང་ལྡན་པའི་ཤིང་དེ་དག་རྣམས་ལ་དྲིལ་བུ་གཡེར་ཁའི་སྒྲ་སྒྲོགས་པ་དང་མུ་ཏིག་གི་དྲ་བས་གཡོགས་པར་གྱུར་པ་ཤིང་དེ་དག་རྣམས་ལ་ཇི་ལྟར་འདོད་པའི་འབྲས་བུ་དང་ལྡན་པ་ཇི་ལྟར་འདོད་པའི་བཏུང་བ་འབབ་པ་ཇི་ལྟར་འདོད་པས་འགྲོ་བར་འགྱུར་རོ། །གང་ལ་ལྷ་དེ་དག་རྣམས་དགའ་བར་འགྱུར་བ་དེ་ལ་སེམས་བསྐྱེད་པ་དང་ལྷན་ཅིག་ཉིད་དུ་ཤིང་དེ་དག་རྣམས་ཉིད་ལས་འབྱུང་བར་འགྱུར་ཏེ་སྣ་ཚོགས་པའི་རྔ་དང་རོལ་མོའི་སྒྲ་ཀུན་ཏུ་སྒྲོགས་པའི་ཡལ་ག་རྣམས་ལ་འགྲོའོ། །ཉེ་འཁོར་ཀུན་ཏུ་སྣང་བར་བྱེད་པའི་འདབ་མ་དང་ཡལ་ག་དང་ལོ་མ་དང་ཚིའུ་པ་རྣམས་ལ་ལྷའི་བུ་མོའི་ཚོགས་ཀྱིས་ཡོངས་སུ་བསྐོར་བར་གྱུར་ནས་དེ་དག་རྣམས་ནམ་མཁའ་ལ་ཉེ་བར་འཕགས་པའི་ཤིང་དེ་དག་རྣམས་ཉི་མ་མང་པོ་རྣམས་བཞིན་དུ་ནམ་མཁའ་ཐམས་ཅད་དེ་དག་གིས་རྣམ་པར་སྣང་བར་བྱེད་དོ། །གཞན་ཡང་མདོག་དམར་པོར་གྱུར་པའི་ཤིང་དེ་དག་རྣམས་ཉིད་ལས་བཞོན་པ་འབབ་པའི་ཆར་རྣམས་ཀྱིས་དེ་དག་ཆར་བཞིན་དུ་ནམ་མཁའི་ཡུལ་མ་ལུས་པ་རྣམ་པར་མཛེས་པར་བྱེད་དོ། །དྲིལ་བུ་གཡེར་ཁའི་སྒྲ་སྒྲོགས་པ་དང་མཐོ་རིས་ཀྱི་བྱ་ཡང་རྒྱུ་ཞིང་སྒྲ་འདོན་པར་གྱུར་པ་རྣམས་དང་འཇོ་སྒེག་པའི་རྨ་བྱའི་སྒྲས་ཉེ་བར་བསྒོས་པ་རྣམས་ཀྱིས་ལེགས་པར་རྟོགས་པ་བཞིན་དུ་ནམ་མཁའ་མ་ལུས་པ་རྣམས་རྣམ་པར་མཛེས་པར་བྱེད་དོ། །དེ་ནས་ལྷ་དེ་དག་རྣམས་ཤིང་དེ་དག་རྣམས་མངོན་དུ་བྱས་པ་ལ་ལེགས་པར་བརྟེན་པར་གྱུར་ནས་མངོན་དུ་ལེགས་པར་མཐོང་བ་སྣ་ཚོགས་ཀྱིས་ཡོངས་སུ་བསྐོར་བ་ཕན་ཚུན་དུ་གྲོགས་ཀྱི་བྱ་བ་དང་ལྡན་པ་རྒྱགས་པ་ལ་དོན་གཅིག་པར་གྱུར་པ་ཇི་ལྟར་ཕན་པར་འགྱུར་བའི་ལས་རྣམས་ལ་ལོངས་སྤྱོད་པར་བྱེད་དོ། །