གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེས་འཐབ་བྲལ་བ་རྣམས་ཀྱི་ལས་ལ་ཀུན་ཏུ་ལྟ་བར་བྱེད་དོ། །དེས་འཐབ་བྲལ་བ་རྣམས་ཀྱི་ས་རབ་ཏུ་རྣམ་པར་འདྲེས་པའི་ཁོར་ཡུག་ན་རྒྱུ་བ་ཞེས་བྱ་བ་ཇི་ལྟ་བ་བཞིན་དུ་ཡོད་པ་ཐོས་པ་ལས་བྱུང་བའི་ཤེས་རབ་ཀྱིས་མཐོང་བར་གྱུར་ཏེ་དེར་ལས་གང་དག་གིས་སེམས་ཅན་རྣམས་སྐྱེ་བར་འགྱུར་བ་ཡང་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ་ཇི་ལྟར་གང་དག་གིས་ཤེས་རབ་ཀྱིས་དགེ་བ་རྣམས་ལ་སྤྱོད་པ་དགེ་ཞིང་བདེ་ལེགས་སུ་གྱུར་པས་སྲོག་གཅོད་པ་དང་མ་བྱིན་པར་ལེན་པ་ཡང་སྤངས་པར་གྱུར་པ་རྣམས་ནི་སྔར་བཞིན་ཏེ། འདོད་པ་ལས་ལོག་པར་གཡེམ་པ་ཡང་རྣམ་པ་ཐམས་ཅད་དུ་ཡོངས་སུ་སྤངས་པར་གྱུར་པ་ལ་འདི་ལྟ་སྟེ། ནགས་སུ་སོང་བར་གྱུར་པ་ན་ཡང་གང་གི་ཚེ་བྱ་རྣམས་འདོད་པ་གསལ་བར་བྱེད་པ་སྙན་པར་སྒྲོགས་པ་པོ་སྒྲ་སྙན་པ་དང་ལྡན་པ་རྣམས་མཐོང་བར་གྱུར་ལ། དེ་ཡང་མཆོག་ཏུ་འདོད་པ་སྐྱེད་པར་བྱེད་པའི་ཚིག་རྣམས་འདོན་པར་བྱེད་པ་དང་ཕྱི་བཞིན་འབྲང་བར་ཡང་ངང་མོ་དག་རྣམ་པར་རྒྱུའོ། །རྣམ་པ་སྣ་ཚོགས་པའི་ཁ་དོག་གི་སྒྲོ་དང་ལྡན་པ་སྐྱེ་བོ་ཐམས་ཅད་ཀྱི་ཡིད་འཕྲོག་པར་གྱུར་པའི་འདོད་པ་སྐྱེད་པར་བྱེད་པ་དེ་དག་རྣམས་ཀུན་ཏུ་མཐོང་བར་གྱུར་ནས་ཀྱང་ཡིད་ལ་སྒོམ་པར་མི་བྱེད་དོ། །རྣམ་པར་རྟོག་པར་མི་བྱེད་དོ། །དེ་རྣམ་པ་དེ་སྲིད་དུ་ཚུལ་ཁྲིམས་རྣམ་པར་དག་པར་གྱུར་པ་ཡིན་ན། འདོད་པ་ལ་ལོག་པར་གཡེམ་པ་ཉིད་ཅིའི་ཕྱིར་ན་བྱེད་པར་འགྱུར། འདོད་པ་ལ་ལོག་པར་གཡེམ་པ་རྣམས་རྣམ་པར་སྤོང་བར་བྱེད་པ་པོ་ཡོངས་སུ་དག་པའི་ཚུལ་ཁྲིམས་དང་ལྡན་པ་རྣམས་ནི་ལུས་ཞིག་ནས་ཤི་བའི་འོག་ཏུ་མཐོ་རིས་བདེ་འགྲོའི་འཇིག་རྟེན་རྣམ་པར་འདྲེས་པའི་ཁོར་ཡུག་ན་རྒྱུ་བའི་ས་འདིར་སྐྱེའོ། །དེར་སྐྱེས་པ་ཡང་འདོད་པའི་ཡོན་ཏན་ཐམས་ཅད་ཀྱིས་ཆེས་སྟོབ་པར་གྱུར་པ་བདེ་བའི་ཆུ་བོ་རྒྱ་ཆེན་པོ་རྣམས་འཇུག་པར་གྱུར་པ་གང་ཡང་དགའ་བར་འགྱུར་བའི་གསེར་དང་རིན་པོ་ཆེ་བཻ་ཌཱུརྱ་དང་དུང་དང་ཨིན་དྲ་ནཱི་ལ་དང་། པད་མ་དམར་པོའི་ལྗོན་ཤིང་གིས་ཉེ་བར་མཛེས་པ། འབབ་ཆུ་དང་ཆུ་ཀླུང་དང་རྫིང་བུ་སྣ་ཚོགས་པས་ཀུན་ཏུ་གང་བར་གྱུར་པ་གང་གིས་ལེགས་པར་བྱས་པའི་ལས་ཀྱི་མཐའ་ལ་སྤྱད་པ་རྣམས་འདི་སྟེན་པར་བྱེད་པ། ནགས་དམར་པོ་ཞེས་བྱ་བའི་ནགས་ཡིན་ཏེ་ནགས་གང་ལ་ལྷ་རྣམས་རབ་ཏུ་དགའ་བར་འགྱུར་བའོ།