གྲོགས་པོ་མང་བར་གྱུར་པ་ཞེས་བྱ་བས་དོན་མ་ཡིན་པ་ཐམས་ཅད་བྱེད་པར་འགྱུར་རོ། །དགེ་སློང་རྣམས་ངེས་པར་སྲེག་པ་འབའ་ཞིག་ལ་འཇུག་པར་བྱེད་པ་ཡིན་ནོ། །གང་གི་ཚེ་གྲོགས་པོ་མང་པོ་ཡོད་པར་གྱུར་པ་དེའི་ཚེ། དགེ་སློང་རྣམ་པར་གཡེང་བ་མང་བར་འགྱུར་ལ་བྱ་བ་མང་བས་རྣམ་པར་གཡེང་བར་འགྱུར་བའི་བློ་ལ་ཡང་བསམ་གཏན་མེད་ཅིང་བསམ་གཏན་དུ་བྱ་བ་ཡང་མེད་པར་འགྱུར་རོ། །ཁྱིམ་གྱི་གནས་ནས་ངེས་པར་བྱུང་བར་གྱུར་པ་རྣམས་ཀྱི་གྲོགས་པོ་དང་། དགྲ་བོ་མ་ཡིན་པ་རབ་ཏུ་སྤངས་པ་རྣམས་ཀྱིས་རེ་ཞིག་གྲོགས་པོ་གཅིག་ཉིད་ཀྱང་བྱ་བ་མ་ཡིན་ན་གྲོགས་པོ་མང་པོ་རྣམས་ལ་ལྟ་སྨོས་ཀྱང་ཅི་དགོས་ཏེ། གང་གི་ཚེ་ལེ་ལོ་ཅན་མིང་ཙམ་གྱི་དགེ་སློང་དུ་གྱུར་ནས་གཞན་གྱི་ཁྱིམ་རྣམས་སུ་རྗེས་སུ་རྒྱུ་བར་བྱེད་པ་ཡིན་ཏེ། དེའི་ཚེ་ན་འདིས་མཐོང་བ་ཙམ་ཉིད་ཀྱིས་བློ་རྣམ་པར་གཡེང་བར་འགྱུར་རོ། །མིག་གིས་གཟུགས་རྣམས་མཐོང་བར་གྱུར་པས་གཞན་དུ་འགྱུར་རོ། །མིག་གི་རྣམ་པར་ཤེས་པ་ཞི་བར་མི་འགྱུར་རོ། །དམིགས་པ་ལ་ཞི་བར་མི་འགྱུར་རོ། །ཡིད་ལ་བྱེད་པ་ཉེ་བར་གནས་པ་མ་ཡིན་ནོ། །མཉམ་པར་གཞག་པ་མ་ཡིན་ནོ། །དུས་རྣམས་ཐུང་བར་བྱེད་པ་མ་ཡིན་ནོ། །གྲོགས་པོ་རྣམས་ལ་ལྟ་བ་ལ་ཆེད་ཆེ་བ་ཡིན་ནོ། །དེ་བཞིན་དུ་སྒྲ་རྣམས་ཐོས་ནས་ཀྱང་མཉམ་པར་གཞག་པར་མི་འགྱུར་ཏེ། དམིགས་པར་མི་བྱེད་དོ། །དེ་ཡིད་ལ་བྱེད་པ་གཞན་རྣམས་ལ་ཞུགས་པ་ན་ཞི་བར་མི་འགྱུར་རོ། །མ་ཞི་བའི་ཡིད་ལ་བྱེད་པ་རྣམས་ལ་དམིགས་པ་ནི་ཟད་ཅིང་ལྟུང་བར་འགྱུར་ལ། གང་གི་ཚེ་གྲོགས་པོ་དེ་དག་ལ་ལྟ་བར་བྱེད་པ་དེས་ནི་དམིགས་པའི་བར་དུ་གཅོད་པར་བྱེད་པར་འགྱུར་རོ། །དེའི་ཕྱིར་དགེ་སྦྱོང་གིས་གྲོགས་པོ་གཅིག་ཀྱང་མི་བྱ་ན་གྲོགས་པོ་མང་པོ་ནི་དང་པོར་མ་ཡིན་ནོ། །གྲོགས་པོ་ལ་འཆེལ་བར་གྱུར་པའི་དགེ་སློང་ཡུལ་ལྗོངས་རྣམས་ནས་ཡུལ་ལྗོངས་སུ་རྒྱུ་བར་གྱུར་པས་ཉེ་བར་འགྲོ་བར་བྱེད་པ་ན་ཚེའི་འདུ་བྱེད་རྣམས་ནི་ཟད་པར་འགྱུར་བ་དང་། དགེ་བའི་ཕྱོགས་ཡོངས་སུ་ཉམས་པར་འགྱུར་ཏེ། དགེ་བའི་ཕྱོགས་ཉམས་པར་གྱུར་པ་རྣམས་ཀྱིས་ཀྱང་འགྲོ་བའི་མཆོག་འཐོབ་པ་མ་ཡིན་ནོ། །སྐད་ཅིག་ཙམ་ཡང་བསམ་གཏན་དང་འདོད་པ་རྩེ་གཅིག་པ་གཉིས་ཡིད་ལ་བྱ་བར་ནུས་པ་ཡང་མ་ཡིན་ནོ། །དེའི་ཕྱིར་འདི་ལྟར་བསླབ་པར་བྱ་སྟེ། དགེ་སློང་གིས་ཀུན་ནས་ཉོན་མོངས་པ་ཅན་གྱི་སྲེད་པ་རྣམས་འཕེལ་བར་བྱེད་པ་པོའི་ཁྱིམ་པའི་གྲོགས་པོ་མི་བྱའོ། །