།དེ་སླར་ཡང་སྐྱིལ་མོ་ཀྲུང་ལས་ལྡང་བར་གྱུར་ནས་འདི་སྙམ་དུ་སེམས་ཏེ། ཇི་ལྟར་བདག་གིས་ཁེངས་པར་བྱས་པ་དེ་དག་རྣམས་ནི་དོན་མེད་དོ་ཞེས་སྐྱོ་བ་སྐྱེ་བར་གྱུར་ནས་འདི་ནི་ལམ་མེད་དོ། །བསམ་གཏན་མེད་དོ། །སྙོམས་པར་འཇུག་པ་མེད་དོ་ཞེས་དེ་བསམ་གཏན་གྱི་འབྲས་བུ་དང་། ཏིང་ངེ་འཛིན་གྱི་འབྲས་བུ་རྣམས་ལ་ང་རྒྱལ་གྱི་སྐྱོན་གྱིས་དང་ཟིལ་གྱིས་གནོན་པའི་འཇིགས་པས་སྐྲག་པས་སྐུར་པ་འདེབས་པར་བྱེད་དེ་ཡོངས་སུ་མ་དྲིས་པའི་ཕྱིར་རོ། །ལོག་པར་ལྟ་བ་ཅན་དེ་ལུས་ཞིག་པར་གྱུར་ནས་ཤི་བའི་འོག་ཏུ་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། བདག་ཉིད་ཤེས་ཤིང་ང་རྒྱལ་བྲལ། །དེ་བཞིན་བླ་མ་ལ་འདྲི་བ། །དགེ་སློང་ཤིན་ཏུ་བརྩོན་ལྡན་པ། །མྱ་ངན་འདས་པ་རྟོགས་པ་ཡིན། །དེ་ལྟར་ཇི་ཙམ་ཐོས་གྱུར་པ། །དེ་ཙམ་ཞིག་ནི་འཆད་པར་བྱེད། །བདག་ཉིད་ཤེས་དང་ང་རྒྱལ་བྲལ། །དེ་ཉིད་རིག་པའི་དགེ་སློང་ཡིན། །ང་རྒྱལ་ཤིན་ཏུ་ང་རྒྱལ་བྲལ། །གང་དག་ཡེ་ཤེས་ལམ་ལ་མཁས། །རང་གཞན་བདག་ཉིད་ཐབས་ཤེས་པས། །ཆོག་ཤེས་གང་ཡིན་དགེ་སློང་བརྗོད། །ང་རྒྱལ་ཅན་དང་ཁྲོ་བའི་ཡིད། །རྐོ་ཏྲོག་ཅན་དང་བློ་ཆུང་བ། །རྙེད་དང་བཀུར་སྟི་ཡིད་ཅན་ལ། །ཅི་ཕྱིར་ཞི་བ་འབྱུང་བར་འགྱུར། །འདྲི་བར་མི་བྱེད་པ་ཉིད་ཀྱི་ང་རྒྱལ་ཅན་ཁྲོ་བའི་ཡིད་དུ་གྱུར་པ་བསམ་གཏན་སྒོམ་པར་མི་བྱེད་པ་རྣམས་ནི་གཞན་གྱི་ཟས་ཟ་བར་བྱེད་པ་རྣམས་བུ་ལོན་དུ་འགྱུར་རོ། །ཆ་བྱད་འབའ་ཞིག་ཙམ་འཛིན་པར་གྱུར་པ་རྣམས་ཀྱིས་དགེ་སློང་གི་བདག་ཉིད་ཅི་ཞིག་འཐོབ་པར་གྱུར་ནས་ལུས་ཞིག་པར་གྱུར་ཅིང་ཤི་བའི་འོག་ཏུ་ང་རྒྱལ་གྱི་སྐྱོན་དང་འདྲེ་བར་མི་བྱེད་པའི་ཕྱིར་ན་ངན་སོང་ལོག་པར་ལྟུང་བ་དམྱལ་བར་སྐྱེ་བར་འགྱུར་རོ། །དེའི་ཕྱིར་ན་འདི་ལྟར་བསླབ་པར་བྱ་སྟེ། ཇི་སྲིད་འཚོའི་བར་དུ་ཡོངས་སུ་འདྲི་བའི་རང་བཞིན་ཅན་གྱི་དགེ་སློང་རྣམས་ནི་བདེ་བ་དང་ཡིད་བདེ་བར་འགྱུར་རོ། །ལུས་ཞིག་པར་གྱུར་ནས་ཤི་བའི་འོག་ཏུ་ཡང་བདེ་འགྲོ་མཐོ་རིས་ལྷ་རྣམས་ཀྱི་ནང་དུ་སྐྱེ་བར་འགྱུར་རོ། །ང་རྒྱལ་དེ་བཅོམ་པར་གྱུར་པའི་ཡོན་ཏན་གྱིས་དེ་ལས་ཕྱི་མར་ཡང་མྱ་ངན་ལས་འདས་པ་འབྱུང་བར་འགྱུར་རོ། །གཞན་ཡང་ཆོས་བཅུ་གཉིས་པ་བསམ་གཏན་བསྒོམ་པ་ན་བར་དུ་གཅོད་པར་བྱེད་པ་འདི་ཡང་གང་ཞེ་ན། འདི་ལྟ་སྟེ། གྲོགས་པོ་མང་བར་གྱུར་པ་ཞེས་བྱ་བས་དོན་མ་ཡིན་པ་ཐམས་ཅད་བྱེད་པར་འགྱུར་རོ།