དེའི་ཕྱིར་ལས་རྣམས་ཉིད་ཁོ་ན་ལས་དགེ་ལེགས་དང་དགེ་ལེགས་མ་ཡིན་པའི་འབྲས་བུ་རྣམས་ཡིན་ནོ། །རྒྱུ་སྐར་རྣམས་དང་། གཟའ་རྣམས་ཀྱང་གང་གི་ཚེ་གཟའ་གཞན་དང་འཁྲུགས་པར་གྱུར་པ་ན། དེའི་ཚེ་དེ་དག་རྣམས་ལ་ཡང་གཟེར་ཟུག་འབྱུང་ངོ་། །ཇི་ལྟར་ཉི་མ་དང་ཟླ་བ་དག་ཀྱང་གཟའ་སྒྲ་གཅན་འཛིན་གྱིས་སྡུག་བསྔལ་བར་བྱེད་དོ། །དེ་ལ་གང་དག་བདག་ཉིད་ཀྱི་ལ་ནུས་པ་མེད་པ་དེ་ཇི་ལྟར་གཞན་རྣམས་ཀྱི་ལ་ནུས་པ་འབྱུང་བར་འགྱུར། དེའི་ཕྱིར་གཟའ་དགུ་པོ་རྣམས་ཀྱི་དཔྱད་ར་ནི་དགེ་སྦྱོང་གིས་མི་བྱའོ། །དགེ་སྦྱོང་དུ་ཁས་འཆེས་པ་རྣམས་ཀྱིས་མི་བྱའོ། །འཛིན་པར་བྱེད་པ་གཟའ་ཆེན་པོ་རྣམས་ནི་གསུམ་པོ་འདི་དག་རྣམས་ཡིན་ནོ། །འདི་ལྟ་སྟེ། རྒ་བ་དང་། ན་བ་དང་། འཆི་བ་རྣམས་ཡིན་ཏེ། གང་ཞིག་རྟག་ཏུ་འཇིག་རྟེན་པ་རྣམས་ལ་གནས་པར་གྱུར་པ་ཐ་མར་འཛིན་པར་བྱེད་པའི་གཟའ་ཆེན་པོ་གསུམ་པོ་རྣམས་སེམས་པར་མི་བྱེད་པར་ནི་ཇི་སྲིད་དུ་དགེ་སྦྱོང་ངན་པ་དགེ་སྦྱོང་དུ་དམ་བཅའ་བས་གཟའ་གཞན་འཇིག་རྟེན་པ་རྣམས་ཉིད་དཔྱོད་པར་བྱེད་དོ། །བློ་གྲོས་མེད་པ། ཐོས་པ་དང་མི་ལྡན་པའི་བྱིས་པར་གྱུར་པས་སྐྱོན་དང་བཅས་པར་གྱུར་པའི་འཇིག་རྟེན་པའི་རྒྱུ་སྐར་ཉི་ཤུ་རྩ་བརྒྱད་པོ་རྣམས་དཔྱོད་པར་བྱེད་དོ། །གང་ཞིག་རྣམ་པར་དཔྱད་པར་འགྱུར་ཞིང་ཡང་དག་པ་ཇི་ལྟ་བ་བཞིན་དུ་སོ་སོར་བརྟགས་པར་གྱུར་ན་མྱ་ངན་ལས་འདས་པའི་གྲོང་ཁྱེར་དུ་ལེགས་པར་འཇུག་པར་བྱེད་པའི་འཇིག་རྟེན་ལས་འདས་པའི་རྒྱུ་སྐར་ཉི་ཤུ་རྩ་བརྒྱད་པོ་རྣམས་ནི་དཔྱོད་པར་མི་བྱེད་དོ། །དེ་དག་རྣམས་ཀྱང་གང་ཞེ་ན། འདི་ལྟ་སྟེ། ཕུང་པོ་ལྔ་པོ་རྣམས་དང་། ཉེ་བར་ལེན་པའི་ཕུང་པོ་ལྔ་པོ་རྣམས་དང་། ཁམས་བཅྭ་བརྒྱད་པོ་རྣམས་སོ། །དེ་དག་རྣམས་དཔྱོད་པར་གྱུར་པས་ནི་མྱ་ངན་ལས་འདའ་བར་འགྱུར་རོ། །ཡང་དག་པ་ཇི་ལྟ་བར་འདོད་ཆགས་འགོག་པར་བྱེད་པ་དང་། ཀུན་ནས་སྡོམ་པ་དང་། འདུལ་བར་བྱེད་པས་ཀྱང་མྱ་ངན་ལས་འདའ་བ་ཡིན་ནོ། །དགེ་སློང་རྒྱུ་སྐར་སེམས་པར་བྱེད་པ་རྣམས་ནི་ཡང་རིམ་པ་གཞན་གྱིས་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་རྣམས་ཀྱིས་ཟླ་བ་བཅུ་གཉིས་འགྲང་བར་བྱེད་དོ། །དེ་དག་རྣམས་བགྲངས་པ་ལས་ཀྱང་དོན་མ་ཡིན་པར་འགྱུར་རོ།