ལས་ཀྱིས་དེ་དག་རྣམས་འཇུག་པར་བྱེད་པ་ཡིན་གྱི། རྒྱུ་སྐར་རྣམས་ནི་སྐྱབས་མ་ཡིན་ནོ། །དེ་ཅིའི་ཕྱིར་ཞེ་ན། རྒྱུ་སྐར་གཅིག་ཉིད་ལ་ཡང་བདེ་བ་ཅན་རྣམས་དང་། སྡུག་བསྔལ་ཅན་རྣམས་དང་། སྐྱེ་གཟུགས་ངན་པ་དང་། གཟུགས་བཟང་བ་དང་། རིགས་དང་ལྡན་པ་དང་། རིགས་དམན་པ་དང་། ཆོས་པ་དང་། ཆོས་མ་ཡིན་པ་དང་། དབུལ་པོ་དང་། ཕྱུག་པོ་དང་། རྐུན་མ་དང་། རྒྱལ་པོ་དང་། ཆོམ་རྐུན་དང་། མཁས་པ་དང་། རྨོངས་པ་དང་། བུད་མེད་དང་། སྐྱེས་པ་དང་། ཚུལ་ཁྲིམས་དང་ལྡན་པ་དང་། ཚུལ་ཁྲིམས་འཆལ་པ་དང་། བརྩོན་འགྲུས་བརྩམས་པ་དང་། ལེ་ལོ་ཅན་དང་། འཇིག་རྟེན་པ་སྡུག་པར་འཛིན་པ་དང་། དེ་དག་ལ་སོགས་པ་གཞན་རྣམས་ཀྱང་རྒྱུ་སྐར་གཅིག་ལ་སྐྱེའོ། །གལ་ཏེ་ཡང་རྒྱུ་སྐར་རྣམས་རྒྱུ་མཚན་ཡིན་པར་གྱུར་ན། དེ་ལ་གང་དག་རྒྱུ་སྐར་གཅིག་ལ་སྐྱེས་པར་གྱུར་པ་དེ་དག་རྣམས་ཐམས་ཅད་ཀྱང་མཚུངས་པར་འགྱུར་རོ། །སྐྱེས་བུ་རྣམས་ཀྱིས་ཇི་སྐད་བཤད་པའི་རྒྱུ་སྐར་རྣམས་ནི་བགྲང་བར་མི་བྱ་སྟེ། སྔོན་གྱི་སྐྱོན་དང་ཡོན་ཏན་དང་བཅས་པ་རྣམས་མངོན་པར་མི་ཤེས་པའི་ཕྱིར་རོ། །དགེ་བ་དང་མི་དགེ་བར་གྱུར་པའི་དུས་རྣམས་སུ་སྐར་མར་གྱུར་པའི་རྒྱུ་སྐར་རྣམས་འགྲང་བར་བྱེད་དོ། །གཞན་ཡང་རྒྱུ་སྐར་འདི་དག་རྣམས་འགྲང་བ་དང་དཔྱོད་པར་བྱེད་པ་ནི་འདི་ལྟ་སྟེ། རྒྱུ་སྐར་རྣམས་མ་ཤར་བ་དང་། གང་གི་ཕྱིར་མདུན་དུ་བྱས་པར་གྱུར་པས་རྣམ་པར་དག་པ་རྣམས་ཀྱང་ཉུང་བ་དང་། ལྷག་པར་འགྱུར་བ་དང་། མངོན་པར་གསལ་བ་ཡིན་པ་དང་། རྒྱུ་སྐར་གྱིས་རྒྱུ་སྐར་གཞན་རྣམས་ཟིལ་གྱིས་ཀྱང་གནོན་ནོ། །གཞན་ཡང་གཟའ་སྐར་དེ་ཉིད་ཀྱང་དུས་གཞན་ན་ཟིལ་གྱིས་གནོན་པར་འགྱུར་རོ། །དེ་དག་རྣམས་ལས་རྒྱུ་སྐར་གྱི་མཛེས་པ་དང་། མཛེས་པ་མ་ཡིན་པ་རྣམས་དཔྱོད་པར་བྱེད་པ་ཡིན་ནོ། །གང་སེམས་པར་བྱེད་པ་དང་འགྲང་བར་བྱེད་པའི་རྒྱུ་སྐར་རྣམས་ཀྱི་དབང་གིས་བདེ་བ་དང་སྡུག་བསྔལ་བ་ཡིན་ན། གང་གིས་ཇི་ལྟར་བདག་ཉིད་ལ་སྟོབས་དང་ལྡན་པར་འགྱུར་ཞིང་བདེ་བ་དང་། སྡུག་བསྔལ་གྱི་དབང་དུ་བྱས་ནས་གང་གིས་ཟིལ་གྱིས་གནོན་པར་འགྱུར། ཇི་ལྟར་ན་གཞན་རྣམས་ཀྱིས་སྡུག་བསྔལ་དང་བདེ་བ་བྱེད་པར་འགྱུར་བ་ཡིན། དེའི་ཕྱིར་ལས་རྣམས་ཉིད་ཁོ་ན་ལས་དགེ་ལེགས་དང་དགེ་ལེགས་མ་ཡིན་པའི་འབྲས་བུ་རྣམས་ཡིན་ནོ།