རྒྱན་དང་ཆ་བྱད་སྣ་ཚོགས་པ་དང་ལྡན་པ་མཐོང་ན་སྡུག་པར་གྱུར་པའི་གཟུགས་བྱིས་པ་སོ་སོའི་སྐྱེ་བོ་རྣམས་ཡིད་འཕྲོག་པར་བྱེད་པའི་ལུས་མངོན་པར་མཐོང་ནས་ཀྱང་དེ་དག་རྣམས་ཡིད་འཕྲོག་པར་འགྱུར་བ་དང་། ཡིད་འདོད་ཆགས་སུ་ཆུད་པར་ཡང་འགྱུར་ན་གང་དག་འདིར་བུད་མེད་དངོས་སུ་ཡོད་པ་རྣམས་ལ་ལྟ་ཅི་སྨོས། གཞན་དག་རྣམས་དང་བདག་ཉིད་ཀྱང་ཀུན་དུ་འདོད་ཆགས་པར་བྱེད་པ་པོའི་ལུས་ཞིག་པར་གྱུར་པ་ན་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེའོ། །དེ་ནས་དེའི་ཚེ་བཅོམ་ལྡན་འདས་འོད་སྲུང་དེས་ཚིགས་སུ་བཅད་པ་གསུངས་པ། ཇི་ལྟར། ལས་ཀྱིས་བཀྲ་བ་མ་བསམས་པར། །གང་ཞིག་རི་མོ་ལ་འཇུག་པ། །རི་མོའི་ལས་ཀྱིས་དེ་བསྲེགས་ནས། །དམྱལ་བའི་རྗེས་སུ་རྒྱུག་པ་ཡིན། །གང་ཞིག་བདེ་ལེགས་མི་སེམས་པར། །ཟག་བཅས་ལ་ནི་ཉེར་ཆགས་པ། །སྙིང་ལ་ཆགས་ཅན་རྨོངས་པ་དེ། །གཡང་སའི་རྗེས་སུ་རྒྱུག་པ་ཡིན། །ལོང་བ་ལ་བརྟེན་སྐྱེས་བུ་གང་། །བསམ་གཏན་སྒོམ་པར་བྱེད་པ་ན། །རང་ཉིད་བཀྲ་བ་དེ་བཏང་ནས། །དེ་ལ་བྱིས་རྣམས་རབ་ཏུ་ཆགས། །རི་མོའི་ལས་ལ་རྣམ་སྤྱོད་པའི། །རི་མོའི་ཞགས་པས་བྱིས་པ་དེ། །རི་མོའི་ལས་ཀྱིས་རྨོངས་པ་ཡིས། །དབང་མེད་པར་ནི་དམྱལ་བར་ཁྲིད། །ཚོན་གྱི་རི་མོ་བཀྲར་གྱུར་ཡང་། །སེམས་ཀྱི་རི་མོའི་དཔེར་མི་ཕོད། །ཆར་གྱིས་རི་མོ་དེ་རབ་འཇིག །ལས་ཀྱི་རི་མོ་འདི་འཇིག་མིན། །ཤིན་ཏུ་བཀྲ་བའི་རི་མོ་གང་། །རི་མོ་དམ་པར་དེ་མི་འདོད། །ལས་ཀྱི་རི་མོའི་རི་མོ་ཆེ། །ཁམས་གསུམ་གོ་འཕང་བཀྲ་བར་བྱས། །སྣ་ཚོགས་རི་མོའི་གཟུགས་ཀྱིས་གང་། །སེམས་ཅན་འགྲོ་བ་ལྔ་ན་འཁྱམ། །ལས་རྣམས་སྣ་ཚོགས་དེ་དག་ཀུན། །རི་མོ་མཁན་གྱིས་རྣམ་པར་བྲིས། །རི་མོ་མཁན་གྱི་སེམས་འདིས་ནི། །ལས་ཀྱི་དྲ་བ་རྣམ་བཀྲར་བྱས། །གང་འདི་དྲ་བས་བཅིངས་ནས་ནི། །འགྲོ་བ་འཁྲུལ་བ་རྣམ་པར་རྨོངས། །ཆར་ཚད་རྡུལ་དང་དུ་བ་ཡིས། །ཚོན་སྐྱེས་རི་མོ་འཇིག་པ་ཡིན། །བསྐལ་པ་བྱེ་བ་སྟོང་དུ་ཡང་། །སེམས་ཀྱི་རི་མོ་འཇིག་མི་འགྱུར། །ས་གཞི་རྣམས་ནི་འཇིག་འགྱུར་ཞིང་། །རྒྱ་མཚོ་ཡང་ནི་སྐམ་འགྱུར་ཡང་། །སེམས་ཀྱིས་བྱས་པའི་རི་མོ་གང་། །དེ་ནི་ཉམས་སུ་མྱོང་བར་གནས། །རང་གི་ལས་ཀྱི་རི་མོ་ཡང་། །རྣམ་པར་རྨོངས་པས་མ་མཐོང་ངོ་། །