བསམ་གཏན་ལ་སྙོམས་པར་འཇུག་པ་ན་བར་ཆད་བྱེད་པའི་ཐ་མལ་པའི་ཚོན་རྣམས་ཀྱིས་རི་མོས་བཀྲ་བའི་ལས་གཞན་རྣམས་ཉིད་བྱེད་དོ། །གཞན་ཡང་རེག་བྱ་དེ་ཉིད་ལ་ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་བློ་གྲོས་དམན་པ་རྣམས་ཀྱིས་རེག་བྱ་དེ་གཞན་ཉིད་དུ་རྣམ་པར་རྟོག་པར་བྱེད་དོ། །ཚུལ་བཞིན་མ་ཡིན་པའི་ཡིད་ལ་བྱེད་པར་གྱུར་པས་ཇི་ལྟར་བདག་གི་རེག་བྱ་འདི་དག་ནི་མཆོག་ཏུ་བདེ་བར་གྱུར་པ། མཆོག་ཏུ་ལུས་རྒྱས་པའི་རྒྱུ་འདིས་བདག་ཚིམ་པར་བྱས་པ་དག་གིས་བདག་བདེ་བར་གནས་པར་བྱའོ། །དེ་བཞིན་དུ་ཐོས་པ་དང་མི་ལྡན་པའི་བྱིས་པ་སོ་སོའི་སྐྱེ་བོ་གང་ཡིན་པ་དེ་དག་རྣམས་ཀྱིས་རེག་བྱ་ལ་ཚུལ་བཞིན་མ་ཡིན་པའི་ཡིད་ལ་བྱེད་པས་དཔྱོད་པར་བྱེད་དོ། །འདི་དག་རྣམས་ནི་ཚོན་ནག་པོ་དང་ཀུན་ནས་ལྡན་པར་གྱུར་པས་དམྱལ་བ་དང་། ཡི་དགས་དང་། དུད་འགྲོ་རྣམས་སུ་སྐྱེ་བར་འགྱུར་རོ། །དེ་ནི་ཚོན་ནག་པོས་རྣམ་པར་བཀྲ་བར་བྱས་པ་ཡིན་ནོ། །དེ་དགེ་སྦྱོང་ངན་པ་དགེ་སྦྱོང་དུ་ཁས་འཆེས་པ་འདིས་དཔྱོད་པར་མི་བྱེད་ཅིང་། ལས་རྣམ་པར་བཀྲ་བ་དེ་དག་སྤངས་ནས་བསམ་གཏན་སྒོམ་པ་ན་བར་ཆད་བྱེད་པར་འགྱུར་བའི་རྣམ་པར་བཀྲ་བ་གཞན་ཉིད་དུ་གྱུར་པ་འཇིག་རྟེན་པའི་ཚོན་གཞན་ཉིད་ཀྱིས་རྣམ་པར་བཀྲ་བར་བྱེད་དོ། །གཞན་ཡང་དགེ་སྦྱོང་དུ་ཁས་འཆེས་པ་འཇིག་རྟེན་པའི་ལས་རྣམས་ལ་མངོན་པར་དགའ་བར་གྱུར་པས་ཡིད་ཀྱིས་དམ་པའི་ཆོས་རྣམས་སེམས་པར་མི་བྱེད་དོ། །འཕགས་པའི་བདེན་པ་བཞིར་འགོག་པ་དང་། ལམ་རྣམ་པ་བཅུ་དྲུག་དབུགས་འབྱུང་བ་དང་རྔུབ་པ་དྲན་པ་དང་། བསམ་གཏན་བཞི་དང་། ཚངས་པའི་གནས་པ་བཞི་དང་། འབྲས་བུ་བཞི་དང་། ཆོས་དེ་དག་རྣམས་སྤངས་ནས་རང་བཞིན་གྱིས་མི་ཤེས་པར་གྱུར་པ། ཆགས་པས་བདག་གི་སེམས་ཀུན་ནས་བསྒོ་བར་བྱེད་པ་འབའ་ཞིག་ཏུ་གྱུར་པ་གཞན་ཉིད་བྱེད་དེ། བསམ་གཏན་སྒོམ་པ་ན་བར་དུ་གཅོད་པར་བྱེད་པར་གྱུར་པ་གཞན་དུ་ན་ཀུན་ནས་ཉོན་མོངས་པར་གྱུར་པ་ཤེས་པ་མ་ཡིན་པའི་རྣམ་པར་བཀྲ་བའི་ལས་གཞན་རྣམས་ཉིད་བྱེད་དོ། །གང་གི་རྒྱུས་ཚུལ་བཞིན་མ་ཡིན་པའི་ཡིད་ལ་བྱེད་པ་རྣམས་འཕེན་པར་གྱུར་པས་ལུས་ཞིག་པར་གྱུར་པ་དང་ངན་སོང་ལོག་པར་ལྟུང་བ་དམྱལ་བ་རྣམས་སུ་སྐྱེ་བར་འགྱུར་རོ། །གཞན་ཡང་སྐྱོན་ཆེན་པོར་གྱུར་པ་གང་གི་ཚེ་བུད་མེད་རྣམས་མངོན་པར་འདྲིད་པར་བྱེད་པ་ནི་དམྱལ་བར་འགྲོ་བར་འགྱུར་བའི་རྒྱུ་ཡིན་ཏེ། མཛེས་པར་གྱུར་པ། རྒྱན་དང་ཆ་བྱད་སྣ་ཚོགས་པ་དང་ལྡན་པ་མཐོང་ན་སྡུག་པར་གྱུར་པའི་གཟུགས་བྱིས་པ་སོ་སོའི་སྐྱེ་བོ་རྣམས་ཡིད་འཕྲོག་པར་བྱེད་པའི་ལུས་མངོན་པར་མཐོང་ནས་ཀྱང་དེ་དག་རྣམས་ཡིད་འཕྲོག་པར་འགྱུར་བ་དང་།