།འདི་ནི་གཟུགས་འགོག་པར་འགྲོ་བའི་ལམ་མོ། །དེ་བཞིན་དུ་ཚོར་བ་དང་། འདུ་ཤེས་དང་། འདུ་བྱེད་དང་། རྣམ་པར་ཤེས་པ་རྣམས་ལ་ཡང་རྒྱ་ཆེར་མཚན་ཉིད་སྟོན་པར་མཛད་དོ། །སེམས་ཅན་ཐམས་ཅད་བདེ་ལེགས་སུ་བྱེད་པ། ཉོན་མོངས་པ་མེད་པ། མྱ་ངན་ལས་འདས་པའི་གྲོང་ཁྱེར་དུ་ལེགས་པར་འཇུག་པར་བྱེད་པ། འགྲོ་བ་ཐམས་ཅད་སྒྲིབ་པ་མེད་པར་མཛད་པའི་ཆོས་སྟོན་པར་མཛད་དོ། །དེ་ནས་ཚུལ་ཁྲིམས་བཟང་པོས་དེ་ལྟར་བཅོམ་ལྡན་འདས་བྱམས་པ་ཆོས་སྟོན་པར་མཛད་པ་ཐོས་པར་གྱུར་པ་ནས་སྔ་མ་བཞིན་ཏེ། དེ་དག་རྣམས་ཀྱིས་ཀྱང་དེ་དང་ལྷན་ཅིག་ཏུ་དེ་ཁོ་ན་བཞིན་ཐོས་པར་གྱུར་ཏོ། །དེ་ནས་དེ་དག་རྣམས་སྔོན་གོམས་པའི་དགེ་བའི་ལས་རྣམས་ཀྱིས་ལེགས་པར་བསྐུལ་བར་གྱུར་པས་ཕན་ཚུན་དུ་གཏམ་སྐད་བསྟུན་ནས། དེ་དག་ཐམས་ཅད་ཀྱང་གང་ན་ཚུལ་ཁྲིམས་བཟང་པོ་ཡོད་པ་དེར་ཉེ་བར་འོངས་པར་གྱུར་ཏོ། །སྟོང་ཕྲག་ཉི་ཤུ་པོ་དེ་དག་རྣམས་ཐམས་ཅད་ཀྱང་ཚུལ་ཁྲིམས་བཟང་པོ་ལ་གྲོས་བྱེད་པར་འགྱུར་ཏེ། རྒྱས་པར་ནི་སྔ་མ་བཞིན་ནོ། །དེ་ནས་དེ་དག་རྣམས་ཀྱིས་གཙོ་བོས་ཐོས་པར་གྱུར་ཅིང་སྔོན་གྱི་དགེ་བའི་ལས་ཀྱིས་ལེགས་པར་བསྐུལ་ནས་ཐབས་ཅིག་ཁོ་ནར་ལངས་ཏེ། ཡི་རངས་པར་གྱུར་པས་ལེགས་པར་གུས་པ་སྐྱེས་ཤིང་དགའ་བར་གྱུར་པས་བཞིན་གྱི་མདངས་རབ་ཏུ་དང་བ་དང་ལྡན་པར་གྱུར་ནས། ཐམས་ཅད་དང་ཡང་དག་པར་ལྡན་པ་རྣམས་གང་ན་བཅོམ་ལྡན་འདས་བྱམས་པ་བཞུགས་པ་དེར་བློ་རྣམ་པར་རྒྱས་པ་རྣམས་ཀྱིས་བརྒྱ་བྱིན་ཡོངས་སུ་བསྐོར་བ་བཞིན་དུ་ཉེ་བར་ལེགས་པར་འགྲོ་བའོ། །དེ་ནས་བཅོམ་ལྡན་འདས་སྐྱེས་བུ་ཆེན་པོའི་མཚན་སུམ་ཅུ་རྩ་གཉིས་ཀྱིས་ཉེ་བར་མཛེས་པར་གྱུར་པའི་སྐུ་བྱ་བ་ནི་རྒྱས་པར་ཏེ། ཆོས་སྟོན་པར་མཛད་པར་རྒྱང་རིང་བ་ཉིད་ནས་མཐོང་སྟེ། ལྷ་དང་མིར་བཅས་པའི་སྐྱེ་དགུ་རྣམས་ལ་ཕན་པ། དགེ་སྦྱོང་དང་བྲམ་ཟེར་བཅས་པའི་ཚོགས་ཀྱི་སྐྱེ་དགུ་རྣམས་ཀྱིས་ཡོངས་སུ་བསྐོར་ཅིང་མདུན་དུ་བདར་ཏེ། ཐོག་མ་བར་དང་ཐ་མར་དགེ་བའི་ཆོས་སྟོན་པར་མཛད་པ་ནི་མཚོ་བཞིན་དུ་རབ་ཏུ་དང་བར་གྱུར་པ། ཤིན་ཏུ་རྙོག་པ་མེད་པ། སྡུག་བསྔལ་ཐམས་ཅད་ཟད་པར་བྱེད་པ། འཁོར་བ་ཐམས་ཅད་ཀྱི་འཆིང་བ་རྣམས་གཏན་ནས་གྲོལ་བར་བྱེད་པ་མྱ་ངན་ལས་འདས་པའི་མཐར་ཐུག་པར་གྱུར་པའི་ཆོས་རྣམས་སྟོན་པར་མཛད་དོ།