དེ་ལྟར་ཚོགས་པ་རྒྱུ་བ་ན་རྣམ་པར་སྤྱོད་པའི་ལྷ་དེ་དག་རྣམས་ཕན་ཚུན་དུ་གཏམ་བྱེད་དོ། །ཡུལ་གྱི་སྲེད་པའི་འཇིགས་པ་འཇིགས་སུ་རུང་བ་སྡུག་བསྔལ་དེ་དག་རྣམས་ཐམས་ཅད་མངོན་སུམ་དུ་གྱུར་པར་མངོན་པར་མཐོང་བར་གྱུར་པ་དང་། གཞན་ཡང་མུ་སུ་ལུན་དྷ་དེ་ཉིད་དང་བཅས་པའི་ཚོགས་པ་རྒྱུ་བའི་ས་ན་རྣམ་པར་སྤྱོད་པའི་ལྷ་དེ་དག་མཆོད་རྟེན་དེ་ཉིད་ཀྱི་རྩིག་ལོགས་ལ་ལྟ་བར་རྩོམ་པར་གྱུར་ཅིང་ཤི་འཕོས་ནས་ཀྱང་འཐབ་བྲལ་གྱི་མངའ་བདག་འདི་གང་དུ་སྐྱེ་བར་འགྱུར། འདིའི་འགྲོ་བ་ནི་གང་དུ་འགྱུར་སྙམ་པས་དེ་དག་རྣམས་སླར་ཡང་རྩིག་པའི་ཡུལ་ཕྱོགས་དེ་ལ་ལྟ་བར་རྩོམ་མོ། །དེ་ནས་ལྷ་དེ་དག་རྣམས་ལྷའི་རིས་དེ་ལས་ཤི་འཕོས་པར་གྱུར་ནས་མུ་སུ་ལུན་དྷ་དེ་དང་ལྷན་ཅིག་ཏུ་ཐམས་ཅད་ཀྱང་བྱམས་པའི་གསུང་རབ་ལ་འཛམ་བུའི་གླིང་དུ་སྐྱེ་བར་འགྱུར་བ་མཐོང་སྟེ། ཐམས་ཅད་ཀྱང་དབང་པོ་ཚང་བ་དང་། ཐམས་ཅད་ཀྱང་རིགས་ཆེན་པོར་སྐྱེ་བ་དང་། ཐམས་ཅད་ཀྱང་ཕན་ཚུན་ལྷན་ཅིག་ཏུ་ཡུལ་གཅིག་ཏུ་སྐྱེ་བ་དང་། ཐམས་ཅད་ཀྱང་ཕན་ཚུན་དུ་མཆོག་ཏུ་སྙིང་དགའ་བར་འགྱུར་བ་དང་ཡང་དག་པར་ལྡན་པ་དང་ཁྱིམ་ཆེན་པོར་ལེགས་པར་སྐྱེ་བ་དང་། ནོར་ཆེན་པོའི་ཁྱིམ་དང་། ཡོན་ཏན་ཆེན་པོ་དང་ལྡན་པ་དང་། བདག་ཉིད་ཀྱི་སྐྱེ་བ་བཟང་པོར་གྱུར་པར་མཐོང་ངོ་། །མུ་སུ་ལུན་དྷ་ནི་ཡུལ་དེ་ཉིད་ཀྱི་རྒྱལ་རིགས་ཤིང་སཱ་ལ་ཆེན་པོར་སྐྱེ་བར་འགྱུར་ཞིང་ནོར་ཆེན་པོ་དང་ལྡན་པ་དང་། མཐུ་སྟོབས་ཆེ་བར་གྱུར་པ་དང་། སྐྱེ་བོ་ཐམས་ཅད་ཀྱིས་མཆོད་པ་དང་། བྱེ་བ་ཕྲག་བརྒྱ་སྟོང་གི་རིན་པོ་ཆེས་གང་བར་གྱུར་པ་དེར་སྐྱེས་པའི་བུ་ཐུ་བོ་འདིའི་མིང་ཡང་ཚུལ་ཁྲིམས་བཟང་པོའོ། །དུས་དེའི་ཚེ་ན་བཅོམ་ལྡན་འདས་བྱམས་པའི་ཞལ་སྔ་ནས་ཆོས་སྟོན་པར་མཛད་དེ། ཐབས་སུ་གྱུར་པའི་མྱ་ངན་ལས་འདས་པའི་གྲོང་ཁྱེར་དུ་འགྲོ་བར་བྱེད་པ། འཕགས་པའི་བདེན་པ་བཞིའི་ཡོན་ཏན་དང་ལྡན་པ། དང་པོར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ་དང་། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བའི་ཆོས་སྟོན་པར་མཛད་པ་ནི་འདི་ལྟ་སྟེ། འདི་ནི་གཟུགས་སོ། །འདི་ནི་གཟུགས་ཀུན་འབྱུང་བའོ། །འདི་ནི་གཟུགས་འགོག་པའོ། །འདི་ནི་གཟུགས་འགོག་པར་འགྲོ་བའི་ལམ་མོ།