།དེ་ལས་ཤི་འཕོས་ནས་གཞན་ཡང་སུམ་ཅུ་རྩ་གསུམ་གྱི་ལྷར་སྐྱེས་སོ། །དེ་ལས་དེ་ཤི་འཕོས་ནས་ཀྱང་འཛམ་བུའི་གླིང་གི་རྒྱལ་པོ་རྫུ་འཕྲུལ་དང་ལྡན་པ་མཐུ་ཆེན་པོར་གྱུར་པར་སྐྱེས་སོ། །དེ་ལ་སྐྱེས་པར་གྱུར་པ་དེས་བག་མེད་པར་གྱུར་ནས་འདོད་པའི་དབང་གིས་རྨོངས་པས་སྲོག་གཅོད་པ་དང་། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་ལ་སོགས་པ་མི་དགེ་བར་གྱུར་པའི་མི་དགེ་བ་རྣམས་བསྒོམས་པའི་སེམས་རྐོ་ཏྲོག་ཏུ་གྱུར་པའི་ཕྱིར་ན། དེ་ལུས་ཞིག་པར་གྱུར་ནས་རབ་ཏུ་ཚ་བའི་དམྱལ་བ་ཆེན་པོར་སྐྱེས་སོ། །དེ་ལ་ཡང་དམྱལ་བའི་ལས་ཀྱིས་ཀུན་ནས་བསླང་བའི་སྡུག་བསྔལ་དཔེ་མེད་པ་རྣམ་པ་དུ་མ་དང་ལྡན་པ་རྣམ་པར་རྟོག་པ་བརྒྱ་སྟོང་དུ་གྱུར་པ་རྣམས་ཉེ་བར་འབྱུང་ངོ་། །དེ་ཡང་དེའི་སེམས་དགྲར་གྱུར་པས་བསླུས་པ་ཡིན་ནོ། །དེ་ནས་ལྷ་དེ་དག་གཞན་ཡང་དེའི་ཕུན་སུམ་ཚོགས་པ་དང་རྒུད་པས་བྱས་པའི་བདེ་བ་དང་སྡུག་བསྔལ་དུ་མ་རྣམས་མཐོང་བར་གྱུར་ནས་དེ་དག་རྣམས་ཕན་ཚུན་འདི་བཞིན་དུ་གཏམ་བྱེད་དེ། ཤིན་ཏུ་མི་བཟད་སྙིང་པོའི་སྟོབས། །སྟོབས་ཆེན་བསྲན་པར་མི་བཟོད་པ། །གང་གིས་བྱིས་པ་རྣམས་འཚེད་པའི། །ལས་རྣམས་སེམས་ཀྱིས་བྱེད་པ་ཡིན། །ལས་རྣམས་ཐམས་ཅད་སེམས་ཀྱི་རྒྱུས། །སྲིད་པ་ནས་ནི་སྲིད་པར་འབྱུང་། །གང་གིས་བྱིས་པ་རྣམ་འཚེད་པའི། །སྲིད་རབ་འཇུག་བྱེད་སྡུག་བསྔལ་ནི། །སྣ་ཚོགས་སྡུག་བསྔལ་རང་བཞིན་གྱི། །དྲག་པོ་བསྲན་དཀའ་སྟོབས་པོ་ཆེ། །ལས་ཀྱིས་འཇིག་རྟེན་འཕེལ་བྱེད་ཀྱང་། །སྐྱོ་བར་འགྱུར་བའང་མ་ཡིན་ནོ། །ལྷ་ཡི་འཇིག་རྟེན་ནས་ནི་མིར། །མི་ནས་ཕྱིས་ཀྱང་དམྱལ་བར་རོ། །དམྱལ་ནས་དུད་འགྲོའི་སྐྱེ་གནས་ལ། །དུད་འགྲོའི་འགྲོ་ལས་ཡི་དགས་སྐྱེར། །དེ་ལྟར་ལས་བུང་འཁོར་བས་ཕུག །སྐྱེ་དགུ་ལས་ནི་རླུང་བསྐྱོད་ནས། །འཁོར་ཡང་འགྲོ་བ་ཀུན་རྨོངས་པས། །འདི་ཡང་རྟོགས་པ་མ་ཡིན་ནོ། །དེ་ལྟར་ཚོགས་པ་རྒྱུ་བ་ན་རྣམ་པར་རྒྱུ་བའི་ལྷ་རྣམས་ཕན་ཚུན་དུ་གཏམ་བྱེད་དོ། །རྣམ་པ་དུ་མར་རྣམ་པ་སྣ་ཚོགས་པའི་ལས་ཀྱིས་བྱས་པ་གང་ཡིན་པ་དེ་དག་རྣམས་ཀྱང་ཡང་དག་པ་ཇི་ལྟ་བ་བཞིན་དུ་མཆོད་རྟེན་དེའི་ལོགས་ལ་བཅོམ་ལྡན་འདས་གསེར་ཐུབ་ཀྱིས་སྤྲུལ་པར་གྱུར་པ་དེ་ལ་ལས་དུ་མས་བྱས་པ་རྣམས་གསལ་བར་མངོན་དུ་མཐོང་ནས་གཞན་ཡང་དེ་ལས་གཞན་པའི་འཐབ་བྲལ་གྱི་བདག་པོའི་དགེ་བ་དང་མི་དགེ་བས་བྱས་པའི་སྐྱེ་བ་རྣམ་པ་དུ་མ་རྣམས་ལྟ་བར་རྩོམ་མོ།