མི་དགེ་བའི་ལས་དེས་ལྷུང་བར་གྱུར་ནས་ལུས་ཞིག་པ་དང་ལན་གྲངས་གཞན་ལ་མྱོང་བར་གྱུར་པའི་ལས་ཀྱིས་ངུ་འབོད་ཀྱི་དམྱལ་བ་ཆེན་པོར་སྐྱེས་སོ། །དེ་ལྟར་རྟོགས་པར་གྱུར་ཅིང་གཞན་འཐབ་བྲལ་གྱི་མངའ་བདག་གཉིས་པའི་ལས་དང་། ཆོས་དང་། སྡིག་པ་དང་། ངན་སོང་རྣམས་ཀྱང་མངོན་པར་ལེགས་པར་མཐོང་ནས་འཁོར་བ་འདི་ཐམས་ཅད་འབར་བར་མཐོང་བར་གྱུར་ཏོ། །ཞེས་དེ་ལྟར་ཡང་ཕན་ཚུན་དུ་རྗོད་པར་བྱེད་དེ། གང་བདག་ཅག་རྣམས་ལ་ནི་ཕ་མ་དང་མཚུངས་པར་གྱུར་པའི་གཞན་རྣམས་འགའ་ཞིག་གིས་ཀྱང་མ་བྱས་པ་དེ་འཐབ་བྲལ་གྱི་མངའ་བདག་མུ་སུ་ལུན་དྷ་འདིས་བྱས་ཏེ། དམྱལ་བ་རྣམས་དང་། ལེགས་པར་བྱས་པ་དང་། ཉེས་པར་བྱས་པའི་ལས་རྣམ་པ་དུ་མ་རྣམས་གང་ཡིན་པའི་འབྲས་བུ་རྣམ་པར་སྨིན་པ་དེ་དག་རྣམས་ཇི་ལྟ་བ་བཞིན་དུ་ལེགས་པར་བསྟན་ནོ། །ཕན་ཚུན་དུ་དེ་སྐད་ཅེས་སྨྲས་ནས། ཡང་གཞན་འཐབ་བྲལ་གྱི་བདག་པོ་རྣམས་ཤི་འཕོས་པ་རྣམས་བལྟ་བར་བྱ་བའི་དོན་དུ་དེ་དག་དང་ཐག་ཉེ་བར་འགྲོ་བར་བྱེད་དེ། ལས་དང་འབྲས་བུ་ལེགས་པར་བལྟ་བའི་དོན་དུ་མཆོད་རྟེན་གྱི་ལོགས་དེ་དག་རྣམས་ལ་བཅོམ་ལྡན་འདས་གསེར་ཐུབ་དེས་འཐབ་བྲལ་གྱི་མངའ་བདག་གཟི་བརྗིད་དང་ལྡན་པའི་ལས་དང་འབྲས་བུ་སྤྲུལ་པར་གྱུར་པ་རྣམས་ཇི་ལྟ་ཇི་ལྟ་བ་བཞིན་དུ་མཐོང་བར་གྱུར་ཏོ། །གཟི་བརྗིད་དང་ལྡན་པ་དེ་སྔོན་གྱི་དུས་ན་འཐབ་བྲལ་གྱི་མངའ་བདག་དེར་གྱུར་པ་ནི་དེས་སྔོན་ཡིད་རབ་ཏུ་དང་བར་གྱུར་པས་མཆོག་ཏུ་བཅོམ་པའི་མཚན་མོ་དམ་པའི་ཆོས་ཉན་པ་རྣམས་དང་། སངས་རྒྱས་བཅོམ་ལྡན་འདས་དང་། ཆོས་དང་དགེ་འདུན་ལ་ཡང་མར་མེ་རབ་ཏུ་སྦར་རོ། །དེ་རྒྱུ་དེ་དག་དང་། རྐྱེན་དེ་དག་དང་། གཞི་དེ་དག་གིས་ལུས་ཞིག་པར་གྱུར་ནས་མཐོ་རིས་བདེ་འགྲོའི་འཇིག་རྟེན་རྣམས་ལས་འཐབ་བྲལ་བ་རྣམས་ཀྱི་ནང་དུ་འཐབ་བྲལ་བའི་མངའ་བདག་གཟི་བརྗིད་དང་ལྡན་པ་ཞེས་བྱ་བར་གྱུར་ཏོ། །དེ་རིང་དུ་རྒྱལ་པོ་བྱས་ཏེ། ཇི་སྲིད་དུ་ཚེ་ཟད་ནས་ལུས་ཞིག་སྟེ། གཞན་ཡང་རྒྱལ་པོ་རིགས་བཞིའི་ལྷར་སྐྱེས་སོ། །དེ་དེ་ལས་ཤི་འཕོས་ནས་བྱང་ཕྱོགས་སྒྲ་མི་སྙན་དུ་སྐྱེས་སོ། །དེ་ལས་ཤི་འཕོས་ནས་གཞན་ཡང་སུམ་ཅུ་རྩ་གསུམ་གྱི་ལྷར་སྐྱེས་སོ།