དེ་ལ་སུམ་ཅུ་རྩ་གསུམ་པ་རྣམས་ཀྱི་ལས་ཀྱི་འགྲོས་ཕྲ་མོ་འདི་དག་རྣམས་ཡང་འཐབ་བྲལ་བ་རྣམས་ཀྱིས་ཤེས་པར་བྱེད་ལ། སུམ་ཅུ་རྩ་གསུམ་པ་རྣམས་ཀྱི་འཆི་འཕོ་བ་དང་སྐྱེ་བས་བྱས་པའི་ལས་ཀྱི་འབྲས་བུ་རྣམས་ཡུལ་ཕྱོགས་འདིར་ཚོགས་པ་རྒྱུ་བ་ན་སྤྱོད་པའི་ལྷ་རྣམས་ཀྱིས་མཐོང་ངོ་། །དགའ་བའི་ཚལ་དང་། ཡོངས་འདུ་དང་། རྩུབ་འགྱུར་དང་། ཤིང་རྟ་སྣ་ཚོགས་རྣམས་སུ་ཁང་བུར་རྩེད་མོ་རྩེ་བ་ལ་ཆེད་ཆེར་བྱེད་པར་འགྱུར་ཞིང་ཡུལ་རྣམས་ལ་ཡོངས་སུ་ལོངས་སྤྱོད་པས་ངོམས་པ་མེད་པ་རྣམས་ལེགས་པར་བྱས་པའི་ལས་ཟད་ནས་མེའི་ཞགས་པས་ངེས་པར་བཅིངས་ནས་དམྱལ་བ་རྣམས་སུ་ལྟུང་ངོ་། །རྒྱུ་གང་དག་གིས་རྒྱལ་ཆེན་རིས་བཞི་པ་རྣམས་ལ་འགྱུར་བའི་ཟུག་གཟེར་དེ་དག་རྣམས་བཅུ་འགྱུར་གྱིས་སུམ་ཅུ་རྩ་གསུམ་པ་རྣམས་འགྱུར་རོ། །རྒྱུ་གང་གིས་ཞེ་ན། འདི་ལྟ་སྟེ། ཁ་ན་མ་ཐོ་བ་གང་དང་ལྡན་པས་ལྷ་ཡུལ་གྱི་བདེ་བ་རྣམས་ཕལ་ཆེ་བར་འགྱུར་བ་དེ་སྲིད་དུ་འབྲལ་བའི་སྡུག་བསྔལ་ཆེན་པོ་ཤིན་ཏུ་མི་བཟད་པར་འགྱུར་རོ། །ལས་རྣམས་ནི་དཔག་ཏུ་མེད་པའི་ཕྱིར་དང་། ཤིན་ཏུ་ཡང་རྣམ་པ་སྣ་ཚོགས་པའི་ཕྱིར་རོ། །ཇི་ལྟར་ལུས་འདི་ཉིད་ཀྱི་མིག་ལ་སོགས་པའི་གནས་གང་དག་ཡིན་པ་རྣམས་ཤིན་ཏུ་གཞོན་ཤ་དང་ལྡན་པར་གྱུར་པ་རྣམས་ནི་ཆེས་གཞོན་ཤ་དང་ལྡན་པའི་ཕྱིར་ན་གཟེར་ཟུག་ཆེས་དེ་དག་རྣམས་ལ་ལྷག་པར་འགྱུར་རོ། །དེ་བཞིན་དུ་རྒྱལ་ཆེན་བཞིའི་རིས་ཀྱི་ལྷ་རྣམས་ཀྱི་ཁྱད་པར་གྱིས་སུམ་ཅུ་རྩ་གསུམ་པ་རྣམས་ཆེས་ལྷག་པར་སྐྱེད་པ་ཡིན་ཞིང་དེ་དག་རྣམས་ཡུལ་དེ་ཡོངས་སུ་བཏང་བས་བྱས་པའི་ཡིད་མི་བདེ་བ་རྣམས་ཀྱང་ཆེས་ལྷག་པར་འགྱུར་རོ། །ཡིད་དང་ལྷན་ཅིག་ཏུ་སྡུག་བསྔལ་བར་འགྱུར་རོ། །དེ་ལ་གཉིས་པོ་འདི་དག་ལ་ནི་དཔེ་མེད་པ་ཡིན་ཏེ། བདེ་བ་དང་། སྡུག་བསྔལ་དག་གོ། །ལྷ་རྣམས་ཀྱི་བདེ་བ་དང་། དམྱལ་བ་པ་རྣམས་ཀྱི་སྡུག་བསྔལ་ལོ། །དེ་དེ་ལྟར་ལས་ཀྱི་ཞགས་པས་མནར་བས་མནར་བར་གྱུར་ནས་རབ་ཏུ་ལྟུང་བར་གྱུར་པས་རབ་ཏུ་ལྟུང་བ་རྣམས་རྣམ་པ་དུ་མར་ཤིན་ཏུ་མི་བཟད་པའི་ལྷང་ཀྱོག་གི་སྡུག་བསྔལ་རྣམས་ཁྱེར་བར་བྱེད་པ་མཆོད་རྟེན་གྱི་རྩིག་ལོགས་ལ་མཐོང་ངོ་། །