ལས་དང་སྐྱེ་བ་རྒྱ་ཆེ་བར་བརྒྱུད་མར་སྦྲེལ་བ་རྣམས་མཐོང་བར་གྱུར་པ་ལ་ལོངས་སྤྱོད་རྣམས་གཞན་འཕྲུལ་དབང་བྱེད་པ་རྣམས་དང་། སུམ་ཅུ་རྩ་གསུམ་པའི་ལྷ་རྣམས་ནི་ཇི་ལྟར་པད་མ་རྣམས་ལ་ཉེ་བར་ལོངས་སྤྱོད་པར་བྱེད་པ། རང་གི་ལས་ལ་རྣམ་པར་སྤྱད་པ། དགེ་བ་དང་། མི་དགེ་བའི་ལས་རྣམས་ལ་ཉེ་བར་ལོངས་སྤྱོད་པར་བྱེད་དོ། །དེ་དག་རྣམས་ཇི་ལྟར་ལས་ལ་སྤྱོད་པ་ཡང་བདེ་བ་དང་བདེ་བ་མ་ཡིན་པ་རྣམས་ཀྱི་སྐལ་བ་ཅན་དུ་འགྱུར་ཏེ། དམྱལ་བ་དང་། ཡི་དགས་དང་། དུད་འགྲོ་དང་། ལྷ་དང་། མི་རྣམས་ཀྱི་སྐྱེ་གནས་རྣམས་སུ་ལས་ཀྱི་ཞགས་པས་ཀུན་ནས་བཅིངས་ནས་སོ་སོ་ཐ་དད་པ་དུ་མར་རྣམ་པར་རྒྱུ་བ་ཡིན་ལ་སུམ་ཅུ་རྩ་གསུམ་པའི་ལྷ་རྣམས་ཀྱང་ལས་ཀྱི་རླུང་གིས་བསྐྱོད་ནས་འཁོར་བ་ན་ཀུན་ཏུ་འཁྱམ་པ་ཡིན་པའི་ཕྱིར་དང་། གང་ན་སྐྱེ་གནས་གསུམ་པ་རྣམས་ན་དམྱལ་བའི་ལས་ཀྱི་འབྲས་བུ་ལ་ཡོངས་སུ་ལོངས་མ་སྤྱད་པར་གྱུར་པ་ནི་འགའ་ཞིག་ཀྱང་ཡོད་པ་མ་ཡིན་ན། དེ་དག་རྣམས་འགྲོ་བ་ལྔར་འགྲོ་བར་འགྱུར་བ་རྣམས་མཐོང་བ་ལ་ལྟ་སྨོས་ཀྱང་ཅི་དགོས། ལེགས་པར་བྱས་པའི་ལས་ཀྱི་ཞགས་པས་སྦྲེལ་དུ་ཟིན་ཀྱང་། དེ་དག་རྣམས་ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ཚ་བ་ལ་སོགས་པའི་མནར་མེད་པ་མ་གཏོགས་པའི་དམྱལ་བ་ཆེན་པོ་བདུན་པོ་རྣམས་སུ་སྐྱེ་བར་འགྱུར་རོ། །མནར་མེད་པའི་ལས་རྣམས་གང་ཡིན་པའི་རྒྱུ་རྣམས་ལྷ་རྣམས་ལ་མེད་པའི་རྒྱུ་འདིའི་ཕྱིར་ན་ལྷ་རྣམས་མནར་མེད་པ་པར་འགྱུར་བ་ནི་མ་ཡིན་ནོ། །དམྱལ་བ་བདུན་པོ་རྣམས་སུ་ནི་སྐྱེ་བར་འགྱུར་བ་ཡང་ཡིན་ནོ། །སུམ་ཅུ་རྩ་གསུམ་པའི་ལྷ་རྣམས་ཡང་སོས་དེར་སྐྱེ་བར་མི་འགྱུར་བ་ཡང་མ་ཡིན་ཏེ། ལན་གྲངས་གཞན་ལ་མྱོང་བར་འགྱུར་བའི་སྲོག་གཅོད་པའི་ལས་རྣམས་ཀྱིས་སམ། ལྷ་དང་ལྷ་མ་ཡིན་རྣམས་ཀྱི་འཁྲུག་པས་གསོད་པའི་ལས་ཀྱིས་ཀྱང་རུང་སྟེ། ཡུལ་གྱི་ལས་ཀྱི་ས་རྣམས་ལ་གནས་པའི་ལྷ་རྣམས་ཐམས་ཅད་ལ་ཡང་སྲོག་གཅོད་པ་དང་མ་བྱིན་པར་ལེན་པ་ཡོད་ལ། རྒྱལ་ཆེན་བཞིའི་རིས་ཀྱི་ལྷ་རྣམས་དང་། སུམ་ཅུ་རྩ་གསུམ་པ་རྣམས་ལ་ནི་ཤིན་ཏུ་ཕལ་ཆེ་བ་ཡིན་ལ། དེ་བཞིན་དུ་ལྷ་རྣམས་ཀྱི་གནས་གཞན་བཞི་པོ་གཞན་རྣམས་ན་ཡང་ཡིན་ནོ། །