རིགས་རྣམས་དང་གནས་གསུམ་དུ་འགྲོ་བ་ལ་འདི་ལྟ་སྟེ། ཆུ་ན་ནི་ཆུ་ལ་རྒྱུ་བ་རྣམས་ཕན་ཚུན་ཟ་བར་གྱུར་པ་ཤིན་ཏུ་འཇིགས་པར་གྱུར་པའི་གྲང་བ་དང་ཚ་བས་བྱས་པའི་ཤིན་ཏུ་རྩུབ་པར་གྱུར་པའི་གནས་སྐབས་རྣམས་ལ་ཉེ་བར་ལོངས་སྤྱོད་པར་གྱུར་པའོ། །ཐང་ལ་ནི་ཐང་ལ་འགྲོ་བ་རྣམས་ཉི་མའི་འོད་ཀྱིས་བསྲེགས་པར་གྱུར་པས་ཡོངས་སུ་ཉམ་ཐག་པར་བྱེད་པའི་བཀྲེས་སྐོམ་གྱིས་ལུས་རྣམ་པར་བསྲེགས་པར་གྱུར་པ་རྣམས་ཕན་ཚུན་དུ་གསོད་ཅིང་འཆིང་བར་བྱེད་པའི་འཇིགས་པ་རྣམས་ཀྱིས་འཇིགས་པར་གྱུར་པ། མཆོག་ཏུ་སྡུག་བསྔལ་བར་གྱུར་པ་རྣམ་པ་བརྒྱ་སྟོང་དུ་མའི་གནས་སྐབས་ཉེ་བར་ལོངས་སྤྱོད་པར་བྱེད་པ། མི་དགེ་བའི་ལས་རྣམས་ཀྱིས་ཡོངས་སུ་བསྐུལ་ནས་རྣམ་པ་དེ་སྲིད་དུ་ནགས་དང་ཉེ་བའི་ནགས་རྣམས་ན་དུད་འགྲོ་རྣམས་ཉེ་བར་ལོངས་སྤྱོད་པར་བྱེད་པ་རྣམས་བརྗོད་པར་སླ་བ་ཡང་མ་ཡིན་ནོ། །དེ་བཞིན་དུ་ནམ་མཁའ་ལ་ཡང་ནམ་མཁའ་ལ་འགྲོ་བར་གྱུར་པའི་ཆེན་པོ་རྣམས་དང་། ཤིན་ཏུ་ཕྲ་བ་རྣམས་དང་། ཚོགས་པར་གྱུར་པ་དང་། ཚོགས་པ་མ་ཡིན་པ་རྣམས་ཀྱི་ལུས་ཅན་གྱི་བྱ་རྣམས་ཕན་ཚུན་དུ་གནོད་པ་བྱ་བར་སེམས་པས་བསྐྱེད་པའི་ཤིན་ཏུ་སྡུག་བསྔལ་བར་གྱུར་པའི་མི་བཟད་པའི་གནས་སྐབས་རྣམས་ལ་ཉེ་བར་ལོངས་སྤྱོད་དེ། ལྷ་བག་མེད་པས་ཡོངས་སུ་བསླུས་ནས་དུད་འགྲོར་སྐྱེས་པར་གྱུར་པ་རྣམས་ཡིན་ནོ། །དེ་བཞིན་དུ་གཞན་གང་དག་མངོན་པར་བག་མེད་པས་ཉེ་བར་བཅོམ་པ་རྣམས་ལས་ཁྱད་པར་དུ་འཕགས་པ་དགེ་བའི་ལས་ཅན་དེ་དག་རྣམས་ནི་ལྷའི་འཇིག་རྟེན་ནས་རབ་ཏུ་ཤི་འཕོས་ནས་མི་རྣམས་ཀྱི་འཇིག་རྟེན་དུ་སྐྱེས་པར་གྱུར་ནས་ལེགས་པར་བྱས་པའི་ལས་རྣམས་ཟད་པས་ཇི་ལྟ་བའི་དགེ་བའི་ལས་རྣམས་ལ་ལོངས་སྤྱོད་པར་བྱེད་དོ། །དགེ་བ་དང་མི་དགེ་བའི་ལས་རྣམས་ལ་ལོངས་སྤྱོད་པར་བྱེད་པས་མིའི་འཇིག་རྟེན་དུ་སྐྱེས་པ་ནི་ཐམས་ཅད་ཉིད་ཀྱང་ཡོངས་སུ་ཚོལ་བའི་སྡུག་བསྔལ་དུ་བྱིང་བར་གྱུར་པ་དམན་པ་དང་། བར་མ་དང་། ཁྱད་དུ་འཕགས་པ་རྣམས་འབྱོར་པ་ཇི་ལྟ་བ་བཞིན་དུ་ཡུལ་དང་དུས་རྣམས་སུ་ཆོས་སྒྲུབ་པ་དང་རྗེས་སུ་འཐུན་པར་གྱུར་པའི་འཕེལ་བ་དང་འགྲིབ་པ་རྣམས་མཆོད་རྟེན་གྱི་རྩིག་ལོགས་ལ་གསལ་བར་མཐོང་བར་གྱུར་ཏོ།