ལྷའི་རིས་ནས་དེ་སྲིད་དུ་འོག་ཏུ་རབ་ཏུ་ལྟུང་བར་གྱུར་པ། རྣམ་པར་ཁྲོས་པའི་ཡིད་ཀྱིས་ཀུན་ཏུ་ངུ་བར་བྱེད་པ། རང་གི་སེམས་ཀྱིས་ཡོངས་སུ་བསླུས་པ། ལེགས་པར་བྱས་པའི་ལས་རྣམས་ཡོངས་སུ་ཟད་པ། བག་མེད་པས་རྣམ་པར་རྒྱུ་བས་བསླུས་པར་གྱུར་པ། བདེ་བའི་མཆོག་རྣམས་ལ་ལོངས་སྤྱད་ནས་སྡུག་བསྔལ་གྱི་མཆོག་ལ་ལོངས་སྤྱོད་པ་ལ་གཅིག་པུ་ཞིག་གྲོགས་དང་གཉེན་རྣམས་ཀྱིས་ཡོངས་སུ་སྤངས་ནས་སྐྱབས་མེད་པའི་དམྱལ་བར་ལྟུང་ངོ་། །འདི་ལ་དང་པོ་ཁོ་ནར་རེ་ཞིག་རྒྱལ་ཆེན་བཞིའི་རིས་ཀྱི་ལྷ་རྣམས་རབ་ཏུ་ལྟུང་བར་གྱུར་པ་རྣམས་མངོན་པར་མཐོང་སྟེ། དེ་དག་ལ་སྲོག་གཅོད་པ་ཡང་ཡོད་དེ། སྲོག་གཅོད་པའི་སྐྱོན་དང་མ་བྱིན་པར་ལེན་པས་ཀྱང་ངོ་། །ཇི་ལྟར་སྲོག་གཅོད་པར་བྱེད་པ་ཡིན་ན། རྒྱལ་ཆེན་རིས་བཞིའི་ལྷ་དེ་དག་རྣམས་ཡང་ལྷ་དང་ལྷ་མ་ཡིན་རྣམས་ཀྱི་འཁྲུག་པ་ལ་སྲོག་གཅོད་པར་བྱེད་དོ། །རྟག་ཏུ་ཡང་རྣམ་པར་རྒྱལ་བར་འགྱུར་ཏེ། ཅོད་པན་འཕྲོག་པ་དང་མཚོན་རྣམས་འཕེན་པར་བྱེད་དོ། །ལས་དུ་མའི་རྐྱེན་རྣམས་ཀྱིས་ཀྱང་སྟེ། ལན་གྲངས་གཞན་ལ་མྱོང་བར་འགྱུར་བའམ། ལས་གཞན་རྣམས་ཀྱིས་ཀྱང་ལྷ་རང་གི་སེམས་ཀྱིས་བསླུས་པ་རྣམས་ནི་ཅི་ནས་ཀྱང་ལྟུང་བར་འགྱུར་རོ། །གང་གི་ཚེ་ལྷ་རྣམས་འཆི་འཕོ་བར་འགྱུར་བ་ན་ཕུང་པོ་རྣམས་འགག་པར་འགྱུར་རོ། །དེའི་ཚེ་ན་དམིགས་པ་རྣམས་འཇུག་པ་དང་། དམྱལ་བ་པ་རྣམས་ཀྱི་སྲིད་པ་བར་མ་དོར་རབ་ཏུ་འབྱུང་བར་འགྱུར་ཏེ། དེས་བདེ་བ་ལས་སྡུག་བསྔལ་ལ་མཚམས་སྦྱོར་བ་ཐོབ་པར་འགྱུར་ན་འཁོར་བ་པ་གཞན་རྣམས་གང་དག་རྣམ་པ་དུ་མའི་སྒོ་ནས་དམྱལ་བར་སྐྱེ་བར་འགྱུར་བའི་ཟུག་གཟེར་གྱི་སྡུག་བསྔལ་དུ་གྱུར་པ་རྣམས་ལ་སྨོས་ཀྱང་ཅི་ཞིག་དགོས། དེ་ལ་ལས་ཆེན་པོ་འདིས་ཤིན་ཏུ་མནར་བ་གང་ཡིན་པའི་སེམས་ཅན་རྣམས་ལྷ་རྣམས་ནས་ཤི་འཕོས་ནས་དམྱལ་བ་རྣམས་སུ་སྐྱེའོ། །དེ་ལྟར་ལྷ་དེ་དག་རྣམས་ཀྱིས་བཅོམ་ལྡན་འདས་དེས་སྤྲུལ་པ་གང་ཡིན་པའི་སྤྲུལ་པ་རྣམས་མཐོང་ངོ་། །གཞན་ཡང་ཡུལ་ཕྱོགས་གཞན་ན་རྒྱལ་ཆེན་བཞིའི་རིས་ཀྱི་ལྷ་རྣམས་ལྷའི་འཇིག་རྟེན་ནས་ཤི་འཕོས་ནས་ཡི་དགས་སུ་སྐྱེས་པ་རྣམས་མཐོང་སྟེ། རྣམ་པ་དེ་སྲིད་ཀྱི་ཟས་བདེ་བ་དེ་དག་རྣམས་ལས་རྣམ་པ་དེ་སྲིད་ཀྱི་བཀྲེས་པ་དང་སྐོམ་པ་ཤིན་ཏུ་ཆེ་བའི་དགོན་པ་རྣམས་སུ་སྐྱེ་བར་འགྱུར་རོ།