དབང་པོ་རབ་ཏུ་གསལ་བར་གྱུར་པས་གང་ན་བཅོམ་ལྡན་འདས་དྲང་སྲོང་གི་མཆོག་གསེར་ཐུབ་དེའི་མཆོད་རྟེན་འདི་ཀུན་ཏུ་ལྷམ་མེ་བ་བཞུགས་པ་དེར་ཏེ་སྔར་བཞིན་ནོ། །དེ་ནས་ལྷ་དེ་དག་ཉིད་ཐམས་ཅད་མུ་སུ་ལུན་དྷ་དང་བཅས་པ་རྣམས་གང་གི་ཚེ་དྲང་སྲོང་མཆོག་གི་སྐུ་གདུང་དེའི་དྲུང་དུ་ཉེ་བར་ལེགས་པར་འགྲོ་བའོ། །ཉེ་བར་ལེགས་པར་ཕྱིན་པ་དེ་དག་རྣམས་ལ་གཞན་ཡང་འཐབ་བྲལ་བའི་བདག་པོ་དེས་འདི་སྐད་ཅེས་སྨྲས་སོ། །མཆོད་རྟེན་འདིའི་ནང་དུ་ཡང་དེ་བཞིན་གཤེགས་པ་གསེར་ཐུབ་དེས་འཇིག་རྟེན་པ་རྣམས་ལ་ཕན་པ་དང་། འཇིག་རྟེན་ལ་བྱམས་ཤིང་རྗེས་སུ་བརྩེ་བར་གྱུར་པས་མི་རྟག་པ་ཉིད་རྣམ་པ་ཐམས་ཅད་ཀྱི་སྒོ་ནས་བསྟན་པ་ཡིན་ལ། དེ་མངོན་སུམ་དུ་ལེགས་པར་མཐོང་ནས་ཀྱང་ལྷ་ཁྱེད་རྣམས་ཐམས་ཅད་ཤིན་ཏུ་ཡིད་འབྱུང་བར་འགྱུར་བ་དང་། རྩིག་པ་འདི་དག་གི་ལོགས་ལ་གང་དག་དེ་བཞིན་གཤེགས་པ་དེས་བསྟན་ཅིང་སྤྲུལ་པ་མཛད་པ་རྣམས་ལ་རྟག་པར་རྒྱུན་དུ་བལྟ་བར་ཡང་གྱིས་ཤིག །དེས་དེ་སྐད་ཅེས་སྨྲས་ནས་ལྷ་རྣམས་ཁྲིད་ནས་མཆོད་རྟེན་དུ་ཞུགས་སོ། །མཆོད་རྟེན་དེ་ཡང་རྒྱར་དཔག་ཚད་བཅུ་པའོ། །མཆོད་རྟེན་དེའི་ནང་ན་ཡང་འདུས་བྱས་མ་ལུས་པ་མི་རྟག་པ་དང་། ཕུན་སུམ་ཚོགས་པ་རྣམས་རྒུད་པར་འགྱུར་བ་དང་། ལས་བདག་གིར་བྱ་བ་དང་། རང་དབང་མེད་པ་སྟེ། སོ་སོ་སོ་སོར་འགྲོ་བ་ལྔ་པོ་རྣམས་ཡོངས་སུ་སྤྲུལ་པ་རྣམས་ཤིན་ཏུ་དྲི་མ་མེད་པ་གཟུགས་བརྙན་གྱི་གཟུགས་རྣམས་སོ་སོར་མཐོང་བ་ཡིན་ཏེ། མཆོད་རྟེན་གྱི་རྩིག་ལོགས་ལ་གཟུགས་དེ་དག་རྣམས་ཡོངས་སུ་རྫོགས་པ་དང་བཅས་པ་ཤིན་ཏུ་གསལ་བ་སོ་སོ་སོ་སོར་གྱུར་པ་དང་། རྣམ་པ་སྣ་ཚོགས་པར་གྱུར་པ་རྣམས་གསལ་བར་མཐོང་ངོ་། །དེ་དག་རྣམས་ལས་ཡུལ་ཕྱོགས་གཅིག་ན་དམྱལ་བ་བརྒྱད་མཐོང་བ་ལ་འདི་ལྟ་སྟེ། ཡང་སོས་དང་། ཐིག་ནག་དང་། བསྡུས་འཇོམས་དང་། ངུ་འབོད་དང་། ངུ་འབོད་ཆེན་པོ་དང་། ཚ་བ་དང་། རབ་ཏུ་ཚ་བ་དང་། མནར་མེད་པའི་དམྱལ་བ་རྣམས་སུ་ཡང་རབ་ཏུ་ལྟུང་བར་འགྱུར་བའི་ལྷ་རྣམས་མངོན་པར་མཐོང་བ་ལ་རང་གི་ལས་ཀྱི་རླུང་གིས་རབ་ཏུ་ལྟུང་བར་གྱུར་པ་མགོ་བོ་ནི་ཐུར་ལ་རྐང་པ་ནི་གྱེན་ལ་བསྟན་པ། ཉེ་འཁོར་ཀུན་ནས་རབ་ཏུ་འབར་བའི་ལུས་ཅན་རྣམས་ཐམས་ཅད་དུ་ཀིང་ཤུ་ཀའི་ཤིང་འདྲ་བར་གྱུར་པ་དེ་སྲིད་དུ་མཐོང་བར་གྱུར་པ།