ལྷ་རྣམས་ལྷ་རྫས་ཀྱི་མ་རྙིངས་པའི་མེ་ཏོག་རྣམས་ཀྱིས་ཉེ་བར་བརྒྱན་པར་གྱུར་ཏོ། །མཆོག་ཏུ་དྲི་ཞིམ་པ་རྣམས་གང་དག་གི་དཔེར་བྱ་བར་སླ་བ་ཡང་མ་ཡིན་པའི་མེ་ཏོག་གི་ཕྲེང་བས་ཁ་དོག་སྣ་ཚོགས་པའི་འོད་ཀྱིས་ཤིན་ཏུ་གསལ་བར་བྱས་པར་གྱུར་པ་རྣམས་གང་གི་ཁྱད་པར་གྱིས་ཉི་མའི་དཀྱིལ་འཁོར་གྱིས་ཀྱང་བཅུ་དྲུག་ཆར་ཡང་མི་ཕོད་དོ། །ཕྲེང་བ་དེ་དག་རྣམས་ལ་ཡང་རིན་པོ་ཆེ་བདུན་གྱིས་སྤྲས་པར་གྱུར་པའི་བྱ་རྣམས་དང་བུང་བས་རྟག་ཏུ་སྒྲ་འབྱིན་པ་རྣམས་ཀྱིས་ཁྱབ་པར་གྱུར་པའོ། །དེ་ལ་གང་གི་ཚེ་གཞན་འཕྲུལ་དབང་བྱེད་ཀྱི་ལྷ་རྣམས་ལ་རྒུད་པ་འབྱུང་བའི་དུས་སུ་གྱུར་པ་ན་དེའི་ཚེ་རྣམ་པ་སྣ་ཚོགས་པའི་མེ་ཏོག་གི་ཕྲེང་བ་མཆོག་ཏུ་དྲི་ཞིམ་པོ་དེ་དག་རྣམས་བུང་བ་དེ་དག་གིས་ཡོངས་སུ་བཏང་ནས་གཞན་དག་ཏུ་འགྲོ་བར་བྱེད་དོ། །ཡིད་འབྱུང་བའི་སྒྲ་རྣམས་ཀྱང་འདོན་ཏོ། །དེའི་རྒུད་པ་དེ་དག་རྣམས་ཡིད་རབ་ཏུ་གསལ་བར་གྱུར་པའི་ལྷ་གཞན་དག་རྣམས་ཀྱིས་ལེགས་པར་མངོན་པར་མཐོང་ནས་དེ་དག་ལ་བགྲོ་བར་བྱེད་དེ་བསོད་ནམས་ཟད་པར་གྱུར་པའི་ལྷའི་བར་དུ་གཅོད་པར་བྱེད་པ་རྣམས་ཅི་ལྟ་བ་བཞིན་དུ་འདིར་འོངས་སོ། །དེ་ནི་བག་མེད་པ་རྣམས་བག་མེད་པར་སྤྱོད་པའི་རྒུད་པ་དང་པོ་སྟེ། དེ་བུང་བ་རྣམས་ཀྱིས་ཡོངས་སུ་སྤངས་ནས་གཞན་དུ་སོང་བར་གྱུར་པ་དེ་ཡང་ཐོས་ནས་བསོད་ནམས་ཟད་པར་གྱུར་པའི་ལྷ་དེ་དག་རང་ཉིད་སོ་སོར་རབ་ཏུ་རིག་པར་བྱེད་དོ། །དཔེ་མེད་པའི་ཡུལ་གྱི་བདེ་བ་རྣམས་མཐོང་ནས་བདག་ཉིད་ལ་ཡོངས་སུ་གདུང་བ་ཆེན་པོ་དང་ལྡན་པར་འགྱུར་ཏེ། ཡིད་གདུང་བར་བྱེད་པ་གང་དག་གི་ཁྱད་པར་རྣམས་ཀྱིས་དམྱལ་བ་རྣམས་ཀྱི་མེ་དང་ཡང་འདྲ་བར་འགྱུར་རོ། །འདི་ནི་གཞན་འཕྲུལ་དབང་བྱེད་ཀྱི་ལྷ་རྣམས་ཀྱི་རྒུད་པའི་གནས་དང་པོའོ། །གཞན་ཡང་ཐག་ཉེ་བར་གྱུར་པ་གཞན་གཉིས་པ་འབྱུང་བར་འགྱུར་བ་དེ་དག་ནི་ལྷ་རྣམས་འཆི་འཕོ་བར་འགྱུར་བའི་དུས་ན་འདི་ལྟ་སྟེ། མཆོག་ཏུ་འཇམ་ཞིང་དཀར་པོར་གྱུར་པའི་འོད་ཀྱི་ཕྲེང་བར་གྱུར་པའི་ལྷ་གང་དག་གི་ཁྱད་པར་གྱིས་ཉི་མ་ནི་སྲིན་བུ་མེ་ཁྱེར་ཙམ་དུ་སྣང་བར་གྱུར་ལ། ལྷ་དེ་དག་རྣམས་ཀྱི་ལུས་ལ་ནི་ཆེན་པོར་གྱུར་པ་ཉིད་ཀྱི་བློ་འབྱུང་བ་ཡིན་ཏེ། རབ་ཏུ་གསལ་བའི་རིའི་རྩེ་མོ་རྣམས་དང་རྩིག་པའི་ལོགས་རྣམས་ལ་དེ་དག་མེ་ལོང་བཞིན་དུ་མཐོང་བར་འགྱུར་རོ།