།གཞན་ཡང་ལྷ་རྣམས་ཀྱི་རྒུད་པ་བཞི་པ་ནི་དེའི་ཚེ་ཉིད་ལ་ལྷ་གང་དག་དམ་པའི་ཆོས་ཉན་པ་ལ་གུས་པ་ལེགས་པར་སྐྱེས་པར་གྱུར་ཅིང་རྣ་བའི་ཁུང་བུ་ཤིན་ཏུ་ཕྱོགས་པ་ཡིད་རྩེ་གཅིག་ཏུ་གྱུར་པས་ཆོས་ཀྱི་མཚན་ཉིད་ཀུན་ཤེས་པར་བྱེད་པ་ལ་ཆེད་ཆེར་བྱེད་པ་ཆོས་དེ་དག་རྣམས་འཛིན་པར་བྱེད་དོ། །ཡིད་ལ་རབ་ཏུ་འཇོག་པར་བྱེད་དོ། །དེ་ཁོ་ན་བཞིན་དུ་རྗེས་སུ་འཇོག་གོ། །དུས་ཡུན་རིང་དུ་ཡིད་ལ་ཀུན་ཏུ་བཟུང་ནས་རབ་ཏུ་སྒྲུབ་པར་བྱེད་དོ། །ཆོས་ལ་ཇི་ལྟ་བ་བཞིན་དུ་གུས་པ་སྐྱེས་པ་དེ་དག་རྣམས་ཆོས་ཉན་པའི་མཐུ་སྟོབས་ཀྱིས་ཕྱིར་ཞིང་ཤིན་ཏུ་ལྷག་པ་ཉིད་དུ་གཟི་བརྗིད་དང་། ཆ་བྱད་དང་། རྒྱན་འགྱུར་ཏེ། ཐམས་ཅད་ཀྱང་བརྒྱ་ལོག་ཏུ་འགྱུར་རོ། །དེ་དག་རྣམས་ཀྱི་གཟི་བརྗིད་དེ་དག་མངོན་པར་འཕེལ་བར་གྱུར་པ་རྣམས་ཡང་དག་པར་མངོན་པར་མཐོང་ནས་ལྷ་གང་དག་ཤིན་ཏུ་ཡང་ལྷག་པར་མོས་པ་དམན་པའི་ཡིད་ཅན་དེ་དག་རྣམས་ངོ་ཚ་བར་འགྱུར་རོ། །དེ་ནི་དགའ་ལྡན་གྱི་ལྷ་དེ་དག་རྣམས་ཀྱི་རྒུད་པ་བཞི་པ་ཡིན་ནོ། །དེ་ལྟར་དགེ་སློང་དེས་དགའ་ལྡན་པའི་ལྷ་རྣམས་ཀྱི་རྒུད་པ་རྣམ་པ་བཞི་སོ་སོར་རབ་ཏུ་རིག་པར་བྱས་ནས་འཕྲུལ་དགའི་ལྷ་རྣམས་ཀྱི་རྒུད་པ་རྣམས་ཀྱང་སོ་སོར་རབ་ཏུ་རིག་པར་བྱེད་དོ། །དེ་སྲིད་དུ་བདེ་བར་གྱུར་པ་འདི་དག་འཕྲུལ་དགའི་ལྷ་རྣམས་ལ་ཡང་རྒུད་པ་རྣམ་པ་བཞི་ཡོད་པ་རྣམས་དེས་མཐོང་བ་ནི་ཇི་ལྟར་ལེགས་པར་བྱས་པའི་ལས་རྣམས་ཟད་པ་ན་ངེས་པར་རྐང་པ་དག་ལ་གྲིབ་མ་འབབ་པའོ། །ལུས་ཐམས་ཅད་ལས་ནི་འོད་ངེས་པར་འབྱུང་བར་འགྱུར་ལ་རྐང་པ་དག་གི་ནི་ཡོངས་སུ་ཉམས་པར་འགྱུར་བའི་རྒྱུ་འདིས་ན་རྐང་པ་ལ་གྲིབ་མ་འོང་ངོ་། །ཐམས་ཅད་ནས་འོད་ཀྱི་ཕྲེང་བ་དང་ལྡན་པའི་ལྷ་གཞན་གང་དག་གིས་གྲིབ་མ་དེ་དག་རྣམས་མཐོང་བར་འགྱུར་རོ། །དེ་དག་གིས་གྲིབ་མས་མངོན་པར་ཉམས་པའི་ལྷ་དམན་པ་དེ་དག་མངོན་པར་མཐོང་ནས་ཀྱང་ཡོངས་སུ་སྤོང་བར་བྱེད་ཅིང་བཞད་གད་དུ་ཡང་བྱེད་དེ། ལྷ་འདི་དག་ལ་ཡོངས་སུ་ཅོ་དྲིས་པར་གྱུར་ཏོ། །ལེགས་པར་བྱས་པའི་ལམ་རྣམས་ཡོངས་སུ་ཟད་པ་ངེས་པ་འབྱུང་ངོ་། །ཇི་ལྟར་ལེགས་པར་བྱས་པའི་ལས་ཡོངས་སུ་ཟད་པ་ཀུན་ནས་འབྱུང་བའི་དབང་དུ་འདི་གྱུར་པ་རྐང་པ་ལ་ཚ་ཡས་མནར་བའི་ལྷ་དེ་དག་རྣམས་ཀྱིས་དེ་ལྟར་དེ་སྐད་ཐོས་ནས་ཤིན་ཏུ་ངོ་ཚ་བའི་རྙེད་པ་དང་ལྡན་པར་འགྱུར་རོ།