།དེ་ལ་འདི་དག་རྣམས་ནི་ལྷ་གང་དག་གི་མཐོང་བའི་ཆོས་ཀྱི་འབྲས་བུ་ཡིན་ནོ། །འདོད་པ་ལ་མངོན་པར་དགའ་བའི་ལྷ་གང་དག་ཡིན་པ་དེ་དག་རྣམས་ཡང་མདོག་དང་། གཟུགས་དང་། ཆ་བྱད་དང་། རྒྱན་དམན་པར་འགྱུར་རོ། །དེ་དག་ནི་དགའ་ལྡན་པ་འདི་རྣམས་ཀྱི་རྒུད་པ་དང་པོ་ཡིན་ནོ། །གཞན་ཡང་དགའ་ལྡན་གྱི་ལྷ་རྣམས་ཀྱི་རྒུད་པ་གཉིས་པ་ཡོད་དེ། ཉེ་བར་ལོངས་སྤྱོད་པས་བསྡུས་པ་རྣམས་དང་། དམ་པའི་ཆོས་ཉན་པའི་དབང་དུ་བྱས་ནས་བརྒྱ་སྟོང་བྱེ་བ་ཕྲག་དུ་མའི་འཁོར་རྣམས་བྱང་ཆུབ་སེམས་དཔའ་ལྔ་བརྒྱས་རྣམ་པར་བརྒྱན་པ་ལ་གང་ཡང་དགའ་ལྡན་གྱི་མངའ་བདག་ཉེ་བར་ཞི་བས་དམ་པའི་ཆོས་སྟོན་པར་བྱེད་དོ། །འདི་ལྟ་སྟེ། མ་རིག་པའི་རྐྱེན་གྱིས་འདུ་བྱེད་རྣམས་ཞེས་བྱ་བ་རྒྱས་པར་རོ། །དམ་པའི་ཆོས་དེ་དག་ཐོས་ནས་ཀྱང་ལྷ་གང་དག་ཡིད་ལེགས་པར་གཏོད་པ་དང་རབ་ཏུ་དང་བའི་ཡིད་ཀྱིས་ཉན་པར་བྱེད་པ་དེ་དག་རྣམས་ཀྱི་གཟི་བརྗིད་དང་། ཆ་བྱད་དང་། རྒྱན་དང་། གཟུགས་དེ་དག་རྣམས་བརྒྱ་སྟོང་འགྱུར་དུ་ཤིན་ཏུ་ལྷག་པར་འཕེལ་བར་འགྱུར་རོ། །གང་ཡང་སེམས་ཀྱིས་རྐོ་ཏྲོག་ཏུ་གྱུར་པ་གློག་དང་ཟོ་ཆུན་ལྟར་ཀུན་ཏུ་འཁོར་བ་དེ་དག་རྣམས་ནི་སྲེད་པའི་ཡུལ་གྱི་དབང་གིས་ཀུན་ཏུ་ཁྲིད་པར་གྱུར་པ་དེ་དག་རྣམས་ཀྱི་གཟི་བརྗིད་དེ་དག་དང་། ཆ་བྱད་དང་། རྒྱན་དང་། གཟུགས་ཀྱང་ཟིལ་གྱིས་གནོན་པར་འགྱུར་ཏེ། འདི་ནི་རྒུད་པ་གཉིས་པ་ཡིན་ནོ། །རྩེད་མོ་བྱེད་པའི་ལྷ་རྣམས་ཀྱི་གཞན་ཡང་ལྟུང་བ་གསུམ་པ་ཡོད་དེ། ལྷ་དེ་དག་རྣམས་ཉིད་ལས་ལྷ་གང་དག་ཉན་པ་ལ་གུས་པའི་ཡིད་ཅན་རྣམས་ཀྱིས་ཆོས་ཀྱི་མཚན་ཉིད་རྣམས་ཇི་ལྟ་བ་བཞིན་དུ་རྟོགས་པར་འགྱུར་བ་དེའི་དུས་ན་ཡིད་དེ་ལ་སོང་བར་གྱུར་པ་དེ་དག་རྣམས་ཀྱི་འོད་ཀུན་ཏུ་གང་བ་དང་ཕྱིར་ཞིང་ཆེས་ལྷག་པར་གྱུར་པས་མངོན་པར་ཟིལ་གྱིས་གནོན་པར་བྱེད་དོ། །ལྷག་མ་རྣམས་ཀྱིས་ནི་དེ་བཞིན་དུ་མངོན་པར་རྒྱས་པར་མི་འགྱུར་རོ། །ཅི་ལྟར་ལྷ་དེ་དག་རྣམས་ཆོས་ཀྱི་མཚན་ཉིད་རྟོགས་པར་བྱེད་པའི་དུས་དེ་དག་ཏུ་ཆ་བྱད་དང་། རྒྱན་རྣམས་དང་། གཟུགས་ཀྱང་མངོན་པར་རྒྱས་པར་མི་འགྱུར་རོ། །འདི་ནི་ལྷ་དེ་དག་རྣམས་ཀྱི་རྒུད་པ་གསུམ་པའོ། །གཞན་ཡང་ལྷ་རྣམས་ཀྱི་རྒུད་པ་བཞི་པ་ནི་དེའི་ཚེ་ཉིད་ལ་ལྷ་གང་དག་དམ་པའི་ཆོས་ཉན་པ་ལ་གུས་པ་ལེགས་པར་སྐྱེས་པར་གྱུར་ཅིང་རྣ་བའི་ཁུང་བུ་ཤིན་ཏུ་ཕྱོགས་པ་ཡིད་རྩེ་གཅིག་ཏུ་གྱུར་པས་ཆོས་ཀྱི་མཚན་ཉིད་ཀུན་ཤེས་པར་བྱེད་པ་ལ་ཆེད་ཆེར་བྱེད་པ་ཆོས་དེ་དག་རྣམས་འཛིན་པར་བྱེད་དོ།