ལྷན་ཅིག་སྤྱོད་པ་དང་བཅས་ནས་ཆུའི་རྩེད་མོ་རྣམས་བྱེད་པར་འགྱུར་བས་འདོད་པའི་ཡོན་ཏན་ལྔས་ཆེས་ཕུན་སུམ་ཚོགས་པ་ལ་ཉེ་བར་ལོངས་སྤྱོད་པ་དེ་དག་རྣམ་པ་དེ་ལྟ་བུའི་དགའ་བ་ཡང་དག་པར་སྐྱེ་ཞིང་རྣམ་པ་དུ་མར་དགའ་བར་བྱས་ན། གཞན་ཡང་མཆོག་ཏུ་ཡིད་འཕྲོག་པའི་སྒྲ་འབྱུང་བར་འགྱུར་ཏེ། རྣམ་པར་འདྲེས་པ་རྣམ་པ་སྣ་ཚོགས་པ་རྣམས་ལ་འདི་ལྟ་སྟེ། ཀླུའི་སྒྲ་དང་། དྲི་ཟའི་སྒྲ་དང་། ཆུའི་སྒྲ་དང་། རྣམ་པ་སྣ་ཚོགས་པར་བྱ་སྒྲ་འབྱིན་པ་སྟེ། སྒྲ་དེ་དག་རྣམས་ཕན་ཚུན་དུ་རྣམ་པར་འདྲེས་པ་དང་། ཕན་ཚུན་དུ་ཚིག་ཐ་མི་དད་པ་རྣམས་ཀྱིས་དགའ་བར་གྱུར་པའི་ཚིག་དང་གཅིག་ཏུ་རྒྱུན་ན་སྒྲ་སྒྲོགས་པ་ཀུན་ནས་འདྲེས་པ་རྣམས་ཀྱང་དེ་བཞིན་དུ་མཛེས་པ་དང་། དེ་ལྷན་ཅིག་སྤྱོད་པ་དང་བཅས་པའི་ལྷ་དེ་དག་རྣམས་དང་། བྱ་རྣམ་པར་སྒྲ་འབྱིན་པ་ཀུན་ཏུ་འདྲེས་པ་རྣམས་དང་། དེ་བཞིན་དུ་དེ་དག་རྣམས་ཀྱི་གླུའི་སྒྲ་དུ་མ་རྣམ་པར་འདྲེས་པའི་ཚིག་རྣམས་ཐོས་ན་ཡིད་འཕྲོག་པར་འབྱུང་ངོ་། །གང་དག་རིའི་གསེབ་གཞན་རྣམས་ལ་ལྷ་རྣམས་རྩེ་དགའ་བ་དེ་དག་རྣམས་ཀྱི་དོན་འདོད་པ་ཐམས་ཅད་མཆོག་ཏུ་ཕུན་སུམ་ཚོགས་པ་ལ་རྩེ་བ་རྣམས་ལ་གཙོ་བོར་མི་བྱེད་དོ། །གང་ཡང་ཕྱོགས་གཞན་ན་རི་དགས་དང་བྱ་རྣམས་དགའ་བར་བྱེད་ཅིང་། རྣམ་པ་སྣ་ཚོགས་པར་མཆོག་ཏུ་དགའ་བར་གྱུར་པའི་བཟའ་བ་གང་ཡིན་པ་རྣམས་ཟ་བར་བྱེད་པ་དེ་རྗེས་སུ་བཏང་ནས། རྣ་བ་དང་མིག་གཡོ་བ་མེད་པར་གང་རྣམ་པར་འདྲེས་པའི་བྱའི་རྣམ་པར་བརྗོད་པ་དང་། ལེགས་པར་འདྲེས་པའི་གླུའི་སྒྲ་རྣམས་ཉན་པར་བྱེད་དོ། །དེ་ལྟར་བླངས་པའི་མི་རྟག་པ་མཆོག་ཏུ་དགའ་བ་གང་དག་ལན་ཅིག་དང་། ལན་ཅིག་མ་ཡིན་པར་ཡང་གླུའི་སྒྲ་རྣམས་ཉན་པར་བྱེད་དོ། །དེ་ལྟར་གླུ་འདིའི་སྒྲ་དགའ་བར་གྱུར་པ་ཡིན་ཏེ། གང་ལས་གཞན་ན་གནས་པའི་ལྷའི་ཚོགས་རྣམས་ཀྱང་སྤྲོ་བར་འགྱུར་བ་ཡིན་ནོ། །དེ་ནས་དེ་ལྟར་རྒྱུན་ན་རབ་ཏུ་རྣམ་པར་རྒྱུ་བའི་ལྷ་རྣམས་དུས་ཤིན་ཏུ་རིང་པོར་མཆོག་ཏུ་དགའ་བར་གྱུར་པའི་གཞི་རྫིང་བུ་ལྔ་ལ་བདེ་བ་ལ་ལོངས་སྤྱོད་ནས། གང་ན་བཏུང་བ་དགའ་བ་ཞེས་བྱ་བའི་ནགས་བཏུང་བས་ཡང་དག་པར་གང་བ་བགྲོད་ན་དགའ་བར་གྱུར་པ་དེར་འགྲོའོ། །བཏུང་བའི་དོན་དང་རྒྱགས་པས་གནས་པའི་དོན་དུ་དེ་གང་གི་ཚེ་བཏུང་བའི་དོན་དུ་དགའ་བ་དེར་རིམ་གྱིས་ཕྱིན་པར་འགྱུར་རོ།