ཁ་ན་མ་ཐོ་བ་རྡུལ་ཕྲ་རབ་ཙམ་ལ་ཡང་འཇིགས་པར་ལྟ་བ། ཡང་དག་པའི་ལྟ་བ་མངོན་དུ་བྱས་པ། སྡིག་པའི་གྲོགས་པོ་ཡོངས་སུ་སྤངས་པ། རྟག་ཏུ་ཡང་ལས་དང་འབྲས་བུ་ལ་དད་པ་དང་ལྡན་པ། སེམས་ཤིན་ཏུ་མཉམ་པར་བཞག་པས་གང་གིས་ལུས་ཀྱི་ལེགས་པར་སྤྱོད་པ་དང་ངག་གིས་ལེགས་པར་སྤྱོད་པ་བྱས་པར་གྱུར་པ་ཚུལ་ཁྲིམས་ཡོན་ཏན་གསུམ་དང་ལྡན་པའི་ཚུལ་ཁྲིམས་བསྲུངས་པར་གྱུར་པ་ལ་འདི་ལྟ་སྟེ། སྲོག་གཅོད་པ་དང་མ་བྱིན་པར་ལེན་པ་དང་། འདོད་པ་ལོག་པར་གཡེམ་པ་ལས་དེ་ལ་སྲོག་གཅོད་པ་དང་མ་བྱིན་པར་ལེན་པ་ནི་སྔ་མ་བཞིན་ནོ། །འདོད་པས་ལོག་པར་གཡེམ་པ་སྤངས་པར་གྱུར་པ་ཡང་ཇི་ལྟར་བུད་མེད་ལ་དར་ཙམ་ཅིག་ཀྱང་སོ་སོར་ལྟ་བ་དང་རོ་མྱང་བར་མི་བྱེད་ལ། མཚན་མོ་ཡང་ཡིད་ཀྱིས་མིག་གི་གཟུགས་དང་ལྷན་ཅིག་ཏུ་རྣམ་པར་རྟོག་པར་མི་བྱེད་དོ། །འདོད་པ་ཆུང་བར་འགྱུར་ཞིང་མཆོག་ཏུ་ཆོག་ཤེས་པ་དང་། ཉིན་མོ་སྤྱོད་པའི་སར་འགྲོ་བ་ན་ཡང་ཡིད་ཤིན་ཏུ་མཉམ་པར་བཞག་པར་འགྱུར་རོ། །སེམས་ཤིན་ཏུ་ལེགས་པར་གཟུང་བའི་ཐག་པས་འཛིན་པས་དབང་པོ་རྣམས་མྱུར་དུ་འཛིན་པར་བྱེད་དོ། །ལུས་ཀྱི་རྗེས་སུ་འབྲངས་པའི་བློ་དང་ལྡན་པར་འགྱུར་རོ། །སེམས་ལེགས་པར་བསྲུངས་པ་ལ་ཀུན་ནས་དགའ་བར་འགྱུར་རོ། །ཁམས་དང་སྐྱེ་མཆེད་དང་ཕུང་པོ་རྣམས་ལ་རབ་ཏུ་དཔྱོད་པ་ལ་དགའ་བར་འགྱུར་རོ། །ཚོགས་པ་དང་འདུས་པ་ལ་དགའ་བར་མི་འགྱུར་རོ། །ཉི་མ་ཕྱེད་ཀྱང་སྤྱོད་ཡུལ་ལ་འདྲེ་བར་མི་བྱེད་དོ། །མི་གཡོ་ཅན་ནམ་གཏུམ་མོའམ་ཁྱིམ་ལའང་སྟེན་པར་མི་བྱེད་དོ། །གྲོང་དུ་འཇུག་པའི་རང་བཞིན་ཅན་དུ་མི་འགྱུར་རོ། །གྲོང་ཁྱེར་དང་ལམ་པོ་ཆེ་དང་བཞི་མདོ་རྣམས་སུ་འགྲོ་བ་དང་། འོང་བའི་ངང་ཚུལ་ཅན་དུ་མི་འགྱུར་རོ། །གཉེན་དང་གྲོགས་ལྟ་བ་ལ་བརྩོན་པར་མི་འགྱུར། དེ་ལ་མྱུར་བའི་བློ་དང་ལྡན་པར་འགྱུར་རོ། །རྟག་ཏུ་བརྩོན་པ་དང་ལྡན་པར་འགྱུར་རོ། །ཤེས་པ་དང་རྣམ་པར་ཤེས་པའི་སྤྱོད་ཡུལ་ལ་རྟག་ཏུ་བརྩོན་པར་འགྱུར་རོ། །ཚུལ་བཞིན་ཡིད་ལ་བྱེད་པས་རྟག་ཏུ་ཡང་བླ་མ་ལ་སྟེན་པར་བྱེད་དོ། །རྣམ་པ་དེ་ལྟ་བུའི་ཚུལ་ཁྲིམས་བྱེད་པ་པོ་དེ་ལུས་ཞིག་ནས་ཤི་བའི་ཕ་རོལ་ཏུ་འཐབ་བྲལ་གྱི་ལྷ་རྣམས་ཀྱིས་ལས་ཚོགས་པ་རྒྱུན་གྱིས་རྒྱུ་བའི་ལྷ་རྣམས་ཀྱི་ནང་དུ་སྐྱེའོ།