།མཆོག་ཏུ་དགའ་བར་འགྱུར་བའི་ལྷ་རྫས་ཀྱི་ཡུལ་ལྔ་དང་ཡང་དག་པར་ལྡན་པ་དེ་ལ་དགའ་བར་བྱེད་དོ། །དེ་ཟད་ནས་སླར་ཡང་ལས་ཀྱི་དབང་གིས་འགྲོ་བས་དམྱལ་བ་དང་ཡི་དགས་དང་དུད་འགྲོ་རྣམས་སུ་སྐྱེ་བའོ། །གལ་ཏེ་ཡང་གཞན་རྣམས་ནས་འཆི་འཕོས་ནས་ཀྱང་མི་རྣམས་དང་སྐལ་བ་མཉམ་པར་མིར་སྐྱེས་ན་ཡང་དེ་མཆོག་ཏུ་ལོངས་སྤྱོད་དང་ལྡན་པར་འགྱུར་རོ། །མཆོག་ཏུ་གནོད་པ་མེད་པ་དང་ལོངས་སྤྱོད་ཅན་དང་རིགས་མཆོག་ཏུ་སྐྱེ་བ་དང་། ཡུལ་ལྗོངས་ཀྱི་མི་ཐམས་ཅད་དང་འཐུན་པ་དང་། ཡུལ་ལྗོངས་ཀྱི་མི་ཐམས་ཅད་ཀྱིས་མཆོད་པ་དང་། འཚེ་བ་མེད་པ་དང་ནད་མེད་པ་མཆོག་ཏུ་ཡིད་གཞུངས་པ་དང་མཆོག་ཏུ་ཡང་བྲན་ཕོ་བྲན་མོ་དང་ལས་བྱེད་པ་དང་ཞོ་ཤས་འཚོ་བ་རྣམས་འཐུན་པར་འགྱུར་རོ། །རྗེས་སུ་ཆགས་པར་འགྱུར་བའི་གྲོང་ཁྱེར་ཕུན་སུམ་ཚོགས་པ་དང་ལྡན་པ་དང་ཡུལ་ལྗོངས་སུ་སྐྱེ་བར་འགྱུར་རོ། །གང་ན་ཆོས་དང་ཆོས་མ་ཡིན་པ་མི་ཤེས་པའི་ཀླ་ཀློར་གྱུར་པའི་ཡུལ་དེར་སྐྱེ་བར་མི་འགྱུར་རོ། །དབང་པོ་ཡོངས་སུ་རྫོགས་པར་ཡང་འགྱུར་རོ། །ཡིད་རྒྱས་པ་དང་སེམས་དང་བཅས་པ་དང་། མཆོག་ཏུ་དབང་དུ་གྱུར་པའི་བློ་དང་ཡང་ལྡན་པར་འགྱུར་ཏེ། དེ་ཡིས་ལེགས་པར་བྱས་ཤིང་བསགས་ལ་མཆོག་ཏུ་འཕགས་པའི་སྐྱེ་བོ་ལེགས་པའི་ཡོན་ཏན་གསུམ་དང་ལྡན་པ་ནི་ངེས་པར་ལྷར་སྐྱེ་བར་འགྱུར་བའི་ལས་ཀྱི་རྒྱུ་འཐུན་པས་ཡིན་ནོ།། །།འཕགས་པ་དམ་པའི་ཆོས་དྲན་པ་ཉེ་བར་གཞག་པ། བམ་པོ་བཞི་བཅུ་རྩ་བརྒྱད་པ། གཞན་ཡང་དགེ་སློང་ལས་ཀྱི་འབྲས་བུ་རྣམ་པར་སྨིན་པ་ཤེས་པ་དེ་འཐབ་བྲལ་བའི་ལྷ་རྣམས་ཀྱི་ས་ལ་ཀུན་ཏུ་ལྟ་བར་བྱེད་པ་ན། དེས་ཐོས་པ་ལས་བྱུང་བའི་ཤེས་རབ་ཀྱིས་འཐབ་བྲལ་བའི་ལྷ་རྣམས་ཀྱིས་ཇི་ལྟ་བ་བཞིན་དུ་ཡོད་པ་མཐོང་བ་ནི་རྒྱུན་གྱིས་རྒྱུ་བ་ཞེས་བྱ་བའོ། །དེས་ལས་གང་དག་གིས་སེམས་ཅན་རྣམས་སྐྱེ་བར་འགྱུར་བ་དེས་ཐོས་པ་ལས་བྱུང་བའི་ཤེས་རབ་ཀྱིས་མཐོང་བ། ལེགས་པར་བྱས་པའི་ལས་ཀྱི་མཐའ་ལ་སྤྱོད་པ། དྲང་པོ་དྲང་པོའི་སེམས་དང་ལྡན་པ། ཆོས་པ་ཆོས་ཀྱི་རྗེས་སུ་འབྲང་བ། མ་ཉམས་ཤིང་མ་སྨས་པར་སྤྱོད་པ་སྡིག་པ་ཡོངས་སུ་སྤངས་པ་དེས་འདོད་པ་རྣམས་ཡོངས་སུ་སྤངས་པའི་དགེ་བའི་བཤེས་གཉེན་གྱི་སེམས་དང་ལྡན་པ། ཁ་ན་མ་ཐོ་བ་རྡུལ་ཕྲ་རབ་ཙམ་ལ་ཡང་འཇིགས་པར་ལྟ་བ།