དེ་དག་རྣམས་ཀྱི་རིན་པོ་ཆེ་རྣམ་པ་སྣ་ཚོགས་པ་གང་ཡིན་པ་དེ་དག་ཐམས་ཅད་བཻ་ཌཱུརྱ་དེའི་འོད་ཀྱིས་དེ་གཅིག་ཏུ་སྔོན་པོའི་གཟུགས་སུ་མངོན་པར་འགྱུར་རོ། །ཐམས་ཅད་གཅིག་ཏུ་སྔོན་པོའི་ཚོགས་སུ་སྐྱེས་སོ། །ལྷ་དེ་དག་གིས་རྣམ་པ་དེ་ལྟ་བུའི་སྔོན་པོ་དེ་རྣམས་ཉེ་བར་རྟོགས་ནས་མཆོག་ཏུ་ངོ་མཚར་སྐྱེས་ནས་འདི་སྐད་ཅེས་བརྗོད་པར་གྱུར་ཏེ། ཇི་ལྟར་གཞལ་ཡས་ཁང་བརྒྱ་སྟོང་མང་པོ་བདག་ཅག་གིས་མཐོང་བ་ལ་བཻ་ཌཱུརྱའི་འོད་འདི་ནི་བདག་ཅག་གིས་མཐོང་བའི་འོད་རྣམས་མ་ཡིན་ན་ཇི་ལྟར་དེ་དག་རི་འདི་གང་ཞིག་གི་གཟི་བརྗིད་ཡིན་པར་གྱུར། དེ་ནས་དེ་དག་དེ་ལྟར་བརྗོད་པ་དང་དེ་ལས་སྔོན་གྱི་ལྷ་ཅིག་གིས་སྔོན་ཐོས་པའི་གཏམ་རྒྱུད་བརྗོད་པ་འདིའི་རྒྱུ་གང་ཡིན་པ་རྣམས་ཇི་ལྟ་བ་བཞིན་དུ་ཉོན་དང་། ལྷ་རྣམས་འོད་སྔོ་ཞིང་ཆེ་བ་གང་ཡིན་པ་འདི་དང་འདི་ལྟ་བུའི་གཟི་བརྗིད་ཀྱང་འདི་ལྟར་རྗེས་སུ་ཐོས་ཏེ། ཇི་ལྟར་འགའ་ཞིག་གི་དུས་སུ་ཡང་དག་པར་རྫོགས་པའི་སངས་རྒྱས་འོད་སྲུང་དུ་གྲགས་པ་ལ་མཆོད་པ་བྱེད་ནས་དགའ་ལྡན་གྱི་མངའ་བདག་རབ་ཏུ་ཞི་བ་འཛམ་བུའི་གླིང་དུ་བབས་པར་འགྱུར་ལ་དེས་འཇིག་རྟེན་ཐམས་ཅད་པའི་རྩེ་མོ་འདིའི་ནོར་བུ་བཻ་ཌཱུརྱ་འདི་དག་ཏུ་ལྷ་དེ་དག་རྣམས་ངོ་མཚར་བ་དང་དགའ་བར་འགྱུར་བའི་ནོར་བུ་ཅིག་འདིར་བཅུག་གོ། །ཇི་ལྟར་འདིའི་གཟི་བརྗིད་ཀྱིས་འཐབ་བྲལ་བ་རྣམས་ཀྱི་ལས་ཀྱི་འབྲས་བུ་ལྕི་བ་ཉིད་དང་ཡང་བ་ཉིད་ཤེས་པ་དང་། ང་རྒྱལ་ཡང་ཆག་པར་འགྱུར་རོ། །གང་དག་གིས་ཆོས་ཀྱི་གཤིས་དང་ལྡན་པར་འགྱུར་རོ། །འཐབ་བྲལ་བ་རྣམས་དང་། དགའ་ལྡན་པ་རྣམས་ཀྱི་ཁྱད་པར་གང་ཡིན་པ་དེ་ཡང་འཐབ་བྲལ་བ་རྣམས་ཀྱི་ནོར་བུ་འདིས་ཁྱད་པར་དུ་ཤེས་པར་འགྱུར་ཏེ། དེ་དག་རྣམས་རྣམ་པ་དེ་སྲིད་ཀྱི་བདེ་བ་དང་ཡང་དག་པར་ལྡན་ལ་དེ་དག་གི་ཁྱད་པར་གྱིས་བདག་ཅག་རྣམས་གང་ཡིན་པ་ནི་ཅུང་ཟད་ཙམ་དང་། འོད་ཀྱི་ཚད་དང་མདོག་དང་དབྱིབས་ཤིན་ཏུ་ཆུང་བ་དང་། སྟོབས་ཤིན་ཏུ་ཆུང་བ་དང་ས་རྣམས་ཤིན་ཏུ་ཆུང་བས་ཅི་ཡང་མ་ཡིན་ནོ། །ལས་ཀྱི་མཐའ་རྣམས་ཀྱིས་དེས་ནོར་བུ་དེའི་གཟི་བརྗིད་ཉེ་བར་དམིགས་ནས་ཡིད་མཆོག་ཏུ་ཀུན་ནས་རངས་པར་འགྱུར་རོ། །གང་དག་བག་མེད་པས་བག་མེད་པར་གནས་པ་འབྱུང་བར་འགྱུར་བ་དེ་དག་གི་རྒྱགས་པ་དང་བྲལ་བར་འགྱུར་རོ།