།དེ་ལྟར་འཐབ་བྲལ་གྱི་མངའ་བདག་མུ་སུ་ལུན་དྷ་དེས་མངོན་པར་མཐོང་ཞིང་འཆི་འཕོ་བའི་འཇིགས་པ་བཟློག་པར་མི་ནུས་པ་དུ་མ་ཁ་ནས་བརྗོད་ནས་ངེས་པར་འགྱུར་བའི་སྐལ་བ་ཅན་མངོན་པར་མཐོང་ལ། གང་ལྷ་དེ་དག་འདོད་པའི་ཡོན་ཏན་ལྔ་དང་ལྡན་པ་རྣམ་པ་དུ་མར་རྩེ་དགའ་ལ་འཆི་འཕོ་བའི་འཇིགས་པ་རྟོགས་པར་མི་འགྱུར་བ་རྣམས་ཕྱུགས་དང་མཚུངས་པར་རྟོགས་ནས། ཀྱེ་མ་འཆི་བ་དང་ཉེ་བ་ལ་ཇི་ལྟར་འདི་དག་རྣམས་འཇིགས་པ་ཀུན་ཏུ་སྐྱེ་བར་མི་འགྱུར། དེས་དེ་ལྟར་ཡིད་ལ་བསམས་ནས་འཇིགས་པའི་ཡིད་ཀྱང་དྲག་པོར་བྱས་ཀྱང་གཞན་དག་རྣམས་ལ་འཆི་འཕོ་བའི་འཇིགས་པ་དེ་གོ་བར་བྱེད་ནུས་པ་ཡང་མ་ཡིན་ནོ། །ཡུལ་དང་དུས་མ་ཡིན་པར་ཆོས་བཤད་པའི་རྒྱུ་མཚན་གྱིས་ཀྱང་མང་བར་འགྱུར་བའི་ཕྱིར་ཏེ། ལྷ་དེ་དག་ཐམས་ཅད་ཀྱང་ཡུལ་རྣམས་ལ་མཆོག་ཏུ་འཛིན་པ་དང་། ཡིད་ཀྱང་དེ་ལ་སོང་བ་སྟེ་དུས་མ་ཡིན་པར་དེ་དག་རྣམས་ལ་གཞུག་པར་བྱ་བར་མི་ནུས་པའི་ཕྱིར་རོ། །དེ་ནས་དེའི་ནང་འཇིགས་པར་བྱས་ནས་ཕྱིར་ཡང་ལྷ་དེ་དག་རྣམས་རྗེས་སུ་འཇུག་པར་བྱ་བའི་དོན་དུ་རྣམ་པ་དུ་མར་རྩེ་དགའ་ཞིང་ཀུན་ཏུ་ཡང་སྤྱོད་དོ། །དེ་ནས་ལྷ་དེ་འཇིག་རྟེན་ཐམས་ཅད་པའི་རྩེ་མོ་དེ་ལ་ལྷ་གང་དག་ཆེས་མངོན་པར་དགའ་བར་གྱུར་པའི་པད་མ་དང་། མེ་ཏོག་གི་ཚལ་དང་། ཉེ་བའི་ཚལ་དགའ་བ་དེ་དག་ལ་ལྷ་དང་ལྷ་མོ་ཕན་ཚུན་ལྷན་ཅིག་འགྲོགས་པར་གྱུར་པ་དེ་ལ་སོང་བའི་ཡིད་ཀྱིས་མྱོས་པ་ལ་དོན་གཅིག་པ་ཡུལ་གྱི་སྲེད་པའི་ཚོགས་ཀྱིས་དུག་གི་ཡུལ་ལ་ཆེད་ཆེར་འཛིན་པས་ནགས་དང་ཉེ་བའི་ནགས་དང་། མཚེའུ་དང་སའི་ཆ་ཤས་ལ་རྣམ་པ་དུ་མར་དགའ་བ་དང་གླུ་ལེན་པ་དང་། བདུད་རྩི་ཡང་མཆོག་ཏུ་དྲི་དང་རེག་བྱ་ཕུན་སུམ་ཚོགས་པ་རྣམས་འཐུང་ངོ་། །རྣམ་པར་རྟོག་པ་དུ་མས་གླུའི་སྒྲས་ཀྱང་དགའ་བར་བྱེད་དེ། དེ་དེ་ལྟར་དགའ་བར་གྱུར་པས་རྩེ་མོ་དེའི་ནང་ན་དབུས་ཀྱི་སྟེགས་བུ་ཡོད་པ་དེར་རྩེད་མོ་དང་བཅས་པས་རི་ལ་ཉེ་བར་ལེགས་པར་འགྲོའོ། །སྟེགས་བུ་དེ་ཡང་བཻ་ཌཱུརྱའི་རང་བཞིན་དུ་གྱུར་པར་མཐོང་ངོ་། །ལྷ་རྣམས་ལ་ཉམས་ཤིང་རྣམ་པར་འགྱུར་བར་བྱེད་པ་གང་ཞིག་སྐྱེད་དེ། དེ་དག་རྣམས་ཀྱི་རིན་པོ་ཆེ་རྣམ་པ་སྣ་ཚོགས་པ་གང་ཡིན་པ་དེ་དག་ཐམས་ཅད་བཻ་ཌཱུརྱ་དེའི་འོད་ཀྱིས་དེ་གཅིག་ཏུ་སྔོན་པོའི་གཟུགས་སུ་མངོན་པར་འགྱུར་རོ།