Degé Kangyur volume 70, F.3.a

བཟའ་བ་དང་བཏུང་བའི་ཆུ་ཀླུང་བརྒྱ་སྟོང་ཕྲག་མང་པོ་དང་ལྡན་པ་ཁ་དོག་སྣ་ཚོགས་པའི་བྱ་རྣམས་ཀྱིས་ཉེ་འཁོར་ན་ཅ་ཅོའི་སྒྲ་རབ་ཏུ་འབྱིན་པ་དང་ཤིན་ཏུ་མཉན་པར་འོས་པའི་ལྷ་མོའི་ཚོགས་ཀྱིས་གླུ་མཆོག་གི་སྒྲ་རྣམས་ཀྱིས་ཀུན་ཏུ་གང་བར་གྱུར་པའི་བྱའི་སྒྲ་རྣམས་དང་འདྲེས་པས་ཡིད་འཕྲོག་པར་བྱེད་དོ། །གཞན་ཡང་ལྷ་གཞན་རྣམས་ཞུགས་པར་གྱུར་པ་ན་ལྷ་གསར་དུ་སྐྱེས་པ་དེས་མཐོང་བ་ནི་ཤིན་ཏུ་ངོ་མཚར་བར་གྱུར་པའི་པད་མའི་ཚལ་རིང་དུ་ནི་དཔག་ཚད་གསུམ་མོ། །​རྒྱར་ནི་དཔག་ཚད་གཉིས་པའི་པད་མ་ཆེན་པོའི་ནགས་རྣམས་ནི་དབྱིབས་དུ་མ་དང་གཟུགས་དུ་མས་ཉེ་བར་མཛེས་པར་གྱུར་པ་ལ་འདི་ལྟ་སྟེ། སྟོན་ཀའི་དུས་ན་ནམ་མཁའ་དྲི་མ་དང་བྲལ་བ་ལ་རབ་ཏུ་འབར་བའི་གཟའ་དང་སྐར་མས་མཛེས་པ་བཞིན་དུ་དེའི་ཉེ་འཁོར་རྣམས་ན་ཡང་ལྷ་དང་ལྷ་མོའི་ཚོགས་ཕལ་ཆེ་བར་གྱུར་པ་བརྒྱ་སྟོང་གིས་ཡོངས་སུ་གང་བར་གྱུར་པ་དང་། རབ་ཏུ་དགའ་བའི་ལྷ་དང་ལྷ་མོའི་ཚོགས་རྣམས་ཀྱིས་ནི་གར་རྣམས་དང་། རྒོད་པར་བྱེད་པ་རྣམས་ཀྱིས་ཀྱང་རྔ་སྒྲ་ཡན་ལག་ལྔ་དང་ལྡན་པས་ཕན་ཚུན་ཐབས་ཅིག་ཏུ་དགའ་བར་གྱུར་ཅིང་། ཕན་ཚུན་དུ་ལེགས་པར་གཏམ་འདྲེ་བ་འབྱུང་བའི་ཡིད་ཅན་རྣམས་ཕན་ཚུན་དུ་ཡུད་ཙམ་ཅིག་ཀྱང་ཀུན་ཏུ་ཆགས་པ་དང་། དགའ་བ་དང་ཡང་བྲལ་བར་འགྱུར་བ་མ་ཡིན་ནོ། །​དེ་ལྟར་གྱུར་པའི་ཡིད་དེ་ལྟ་བུར་གྱུར་པའི་སེམས་ཀྱིས་ངལ་བར་གྱུར་པ་ཡང་མེད་པ་བློ་ཡང་དེ་དག་སྐྱེ་བའི་ཡིད་དེས་ཀུན་ཏུ་དྲངས་པ་རྣམས་ཀྱི་ཉེ་འཁོར་ན་ཆེས་རབ་ཏུ་དགའ་བའི་ལྷའི་ཚོགས་ཀྱིས་ཡོངས་སུ་བསྐོར་བའོ། །​གཞན་ཡང་ལྷ་དེས་མཐོང་བ་ནི་པད་མའི་ནགས་དེ་དག་རྣམས་ན་རྣམ་པ་སྣ་ཚོགས་པའི་བྱ་རྣམས་ཆུ་ལ་རྒྱུ་བ་དག་ཀྱང་ཕན་ཚུན་དུ་དགའ་ཞིང་ཀུན་ཏུ་སྤྱོད་པར་ཡང་བྱེད་དོ། །​ཕན་ཚུན་དུ་ཆགས་པའི་ཡིད་ཅན་དེ་དག་རྣམས་ཀྱང་དེ་བཞིན་དུ་ཕན་ཚུན་དུ་གྲོགས་ཀྱི་བྱ་བ་ཡང་རྗེས་སུ་བྱེད་དོ། །​དེ་དག་རྣམས་དེ་བཞིན་དུ་ལྷ་རྣམས་ཀྱི་རྗེས་སུ་བྱ་བ་ཡང་བྱེད་ལ། ལྷ་རྣམས་ཇི་ལྟ་བ་བཞིན་དུ་དེ་དག་རྣམས་དེ་ལྟ་བ་བཞིན་དུ་ངུར་པ་དང་། བྱ་ཀ་དམ་པ་དང་བྱ་ཀཱ་རཎ་ཌ་བ་པ་དང་། དེ་དག་རྣམས་ལྷན་ཅིག་ཏུ་པད་མའི་ནགས་དེ་ལ་རྣམ་པ་དུ་མ་དགའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh287.html?part=UT22084-068-021-101117#UT22084-068-021-101117