Degé Kangyur volume 68, F.52.b

།ནག་པོའི་རྩ་ལག་བཞོན་བཅས་པས། །​གླགས་ནི་རྙེད་པར་ཡོང་མི་འགྱུར། །​ཞིང་རྣམས་བྱེ་བ་བསམ་ཡས་སུ། །​དེ་ནི་མཁའ་ལས་འགྲོ་འགྱུར་ཏེ། །​ཕུན་སུམ་ཚོགས་པའི་ཞིང་དེར་ནི། །​འཇིག་རྟེན་མགོན་པོ་རྣམས་ལ་བལྟ། །​བརྟན་པ་སངས་རྒྱས་རྣམས་མཐོང་ནས། །​དད་པ་བརྟན་པོ་ཐོབ་པར་འགྱུར། །​དེ་ཡི་བསམ་པ་མཁྱེན་ནས་སུ། །​མི་མཆོག་རྣམས་ནི་ལུང་སྟོན་ཏོ། །​ཐུབ་པ་རྣམས་ལས་མངོན་སུམ་བདག །​བྱང་ཆུབ་ལུང་བསྟན་ཐོས་ནས་སུ། །​རྟག་ཏུ་དགའ་དང་ལྡན་འགྱུར་ཞིང་། །​དེ་ནི་དོགས་པ་མེད་པར་འགྱུར། །​མཁས་པ་གང་ཞིག་མཚན་འདི་དག །​ཐོས་ནས་རབ་ཏུ་འཛིན་བྱེད་པ། །​དེ་ནི་ཡོན་ཏན་འདི་དག་དང་། །​རྒྱ་ཆེན་གཞན་ཡང་ལོས་ཀྱང་འཐོབ། །​ཐུབ་པ་དྲང་སྲོང་ཆེ་གྱུར་པ། །​འདི་དག་རྣམས་ཀྱི་མཚན་ཐོས་ནས། །​མི་གང་མཚན་རྣམས་འཛིན་བྱེད་པ། །​རྫུ་འཕྲུལ་ཆེ་མཁས་བསོད་ནམས་འདོད། །དེ་ལྟ་བས་ན་བདག་ཉིད་ཆེ། །​དེ་དག་རྣམས་ཀྱི་མཚན་ཐོས་ན། །​སྐྱེས་བུ་མཁས་པས་གཟུང་བྱ་ཞིང་། །​གཞན་དག་ལ་ཡང་བ་ཤད་པར་བྱ། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་དང་། དགེ་སློང་དེ་དག་དང་། བྱང་ཆུབ་སེམས་དཔའ་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ། །​འཕགས་པ་དཀྱིལ་འཁོར་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།​། །​།རྒྱ་གར་གྱི་མཁན་པོ་སུ་རེནྡྲ་བོ་དྷི་དང་། ཞུ་ཆེན་གྱི་ལོ་ཙཱ་བ་བན་དེ་ཡེ་ཤེས་སྡེས་བསྒྱུར་ཅིང་ཞུས་ཏེ་གཏན་ལ་ཕབ་པ། །༄༅། །​རྒྱ་གར་སྐད་དུ། ཨཱརྱ་མཾ་ག་ལ་ཨཥྚ་ཀཾ་ནཱ་མ་མ་ཧཱ་ཡཱ་ན་སཱུ་ཏྲ། བོད་སྐད་དུ། འཕགས་པ་བཀྲ་ཤིས་བརྒྱད་པ་ཞེས་བྱ་བ་ཐེག་པ་ཆེན་པོའི་མདོ། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །​འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་ཡངས་པ་ན་ཨ་མྲ་སྲུང་བའི་ཚལ་ན་བཞུགས་སོ།



The English translation of this folio by 84000 - Translating the words of the Buddha can be found at:
https://read.84000.co/translation/toh278.html?part=UT22084-068-012-69#UT22084-068-012-69