Degé Kangyur volume 68, F.45.b

མོས་པ་ལ་མཁས་པ་ཞིག་ཀྱང་འཁོར་དེ་ཉིད་དུ་འོངས་སོ། །​དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་བག་ཚ་བ་མེད་པར་གནས་པ་སྟན་ལས་ལངས་ཏེ། ཆོས་གོས་ཕྲག་པ་གཅིག་ཏུ་གཟར་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་རིགས་ཀྱི་བུ་བཅུ་པོ་འདི་དག་ནི་དགུང་ལོ་བདུན་དུ་གཟུངས་ཀྱི་དོན་ལ་བརྩོན་པར་གྱུར་ན་དེ་དག་བསམ་པ་མ་གྲུབ་ཅིང་བསྟན་པ་འདི་ལས་སླར་མཆིས་པ་ཁྱིམ་ན་གནས་པར་གཡར་གྱིས་བླངས་པ་ལགས་ན། དེའི་སླད་དུ་བཅོམ་ལྡན་འདས་ཀྱིས་རིགས་ཀྱི་བུ་དེ་དག་ལ་ཅི་ནས་མྱུར་བ་ཁོ་ནར་ཡེ་ཤེས་ཐོབ་པར་འགྱུར་བ་དེ་ལྟར་ལེགས་པར་ལུང་དབོག་པར་མཛད་དུ་གསོལ། དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་སེམས་དཔའ་ཆེན་པོ་བག་ཚ་བ་མེད་པར་གནས་པ་ལ་འདི་སྐད་ཅེས་བཀའ་སྩལ་ཏོ། །​རིགས་ཀྱི་བུ་འདི་ལྟར་དེ་དག་གིས་སངས་རྒྱས་མི་སྤང་བ་ཞེས་བྱ་བའི་ཆོས་ཀྱི་རྣམ་གྲངས་འདི་མ་ཐོས་ལ། སངས་རྒྱས་སྤོང་བ་ནི་རྗེས་སུ་ཐོབ་སྟེ། དེས་ན་རིགས་ཀྱི་བུ་དེ་དག་མྱུར་དུ་ཤེས་པ་འདི་ལ་མ་སྐྱེས་སོ། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་བག་ཚ་བ་མེད་པར་གནས་པས་ཚིགས་སུ་བཅད་པ་འདི་དག་གིས་ཞུས་སོ། །​ཆོས་ཀྱི་རྒྱལ་པོ་འོད་མཛད་པ། །​མི་ཡི་ཉི་མ་ཁྱོད་ལ་ཞུ། །​བྱང་ཆུབ་སེམས་དཔའི་ལས་སྤྱོད་པ། །​སྤྱོད་པ་གང་ལགས་དེ་བསྟན་གསོལ། །དཔག་མེད་ཁྱབ་པར་འཕགས་པའི་བློ་གྲགས་པ། །​སངས་རྒྱས་ཐོགས་མེད་སྟོབས་བཅུ་མཚུངས་མ་མཆིས། །​སྲིད་གསུམ་འབྱུང་བ་རྣམ་གྲོལ་སྤྲོས་མི་མངའ། །​སངས་རྒྱས་བྱང་ཆུབ་སྤྱོད་པ་དྲི་མེད་གསུངས། །​དཔག་མེད་ཡེ་ཤེས་མངའ་བ་ཁྱོད་ལ་ཞུ། །​ཡིད་གཉིས་གཅོད་པར་མཛད་པ་ཁྱོད་ལ་ཞུ། །​བཅོམ་ལྡན་མཚུངས་པ་མི་མངའ་ཁྱོད་ལ་ཞུ། །​བྱང་ཆུབ་སེམས་དཔའི་སྤྱོད་པའི་ཚུལ་གང་ལགས། །​རྒྱལ་བ་བདུད་ཐུལ་བདེ་གཤེགས་གང་གིས་ན། །​ཉོན་མོངས་ཀུན་ལས་རྣམ་པར་གྲོལ་བར་འགྱུར། །​ཐུགས་རྗེས་ཉོན་མོངས་ཐུལ་ལ་བྱང་ཆུབ་ལམ།



The English translation of this folio by 84000 - Translating the words of the Buddha can be found at:
https://read.84000.co/translation/toh276.html?part=UT22084-068-010-113#UT22084-068-010-113