Degé Kangyur volume 67, F.318.a

།འཇིག་རྟེན་དུ་ཡང་མྱུར་བར་ནི། །​གྲགས་ཆེན་ལྷ་ཡི་ལྷར་འགྱུར་རོ། །​སྟེང་གི་ཕྱོགས་ན་འཇིག་རྟེན་གྱི་ཁམས་རིན་པོ་ཆེའི་རིགས་ཞེས་བྱ་བ་ན། དེ་བཞིན་གཤེགས་པ་རིན་པོ་ཆེ་ཐམས་ཅད་ཀྱིས་བརྒྱན་པའི་གཟུགས་འཛིན་པ་ཞེས་བྱ་བ་བཞུགས་སོ། །​ཅིའི་ཕྱིར་འཇིག་རྟེན་གྱི་ཁམས་དེ་རིན་པོ་ཆེའི་རིགས་ཞེས་བྱ་ཞེ་ན། འོད་སྲུང་སངས་རྒྱས་ཀྱི་ཞིང་དེའི་སེམས་ཅན་རྣམས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་རབ་ཏུ་ཞུགས་ཏེ། སངས་རྒྱས་ཀྱི་ཞིང་དེ་ནས་སེ་གོལ་གཏོགས་པ་ཙམ་གྱིས་བྱང་ཆུབ་སེམས་དཔའ་བྱེ་བ་ཁྲག་ཁྲིག་བརྒྱ་སྟོང་མང་པོ་ཕྱོགས་བཅུའི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་ཀྱི་སེམས་ཅན་རྣམས་བྱང་ཆུབ་ཏུ་ཡོངས་སུ་སྨིན་པར་བྱེད། སངས་རྒྱས་བཅོམ་ལྡན་འདས་རྣམས་ལ་མཆོད་པ་བྱེད་ཅིང་ཕྱིར་ཡང་འཇིག་རྟེན་གྱི་ཁམས་དེར་འོང་ངོ་། །​དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འོད་སྲུང་ཆེན་པོས་འདི་སྐད་ཅེས་གསོལ་ཏོ། །​བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་དེའི་མིང་ཇི་སྐད་བགྱི་བ་དག་མཆིས། བཅོམ་ལྡན་འདས་ཀྱིས་བཀའ་སྩལ་པ། འདི་ལྟ་སྟེ། སེང་གེ་རྣམ་པར་རོལ་དང་། སེང་གེ་རྣམ་པར་བསྒྱིངས་དང་། སེང་གེའི་ཏོག་དང་། སེང་གེ་རྣམ་པར་སྤྲུལ་པ་དང་། ཤིན་ཏུ་བརྟན་པའི་མཐུ་རྟུལ་དང་། རྡོ་རྗེའི་བློ་གྲོས་མཚོན་ཆ་དང་། འོད་སྲུང་དེ་ལྟ་བུ་ལ་སོགས་པ་རྟག་ཏུ་བརྩོན་འགྲུས་བརྩམས་པའི་བྱང་ཆུབ་སེམས་དཔའ་དག་གི་མིང་གང་སུ་དག་གིས་ཐོས་པར་འགྱུར་བ་དེ་དག་ཐམས་ཅད་དེ་བཞིན་གཤེགས་པ་རིན་པོ་ཆེ་ཐམས་ཅད་ཀྱིས་བརྒྱན་པའི་གཟུགས་འཛིན་པ་དེའི་སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་རྣམས་ཐོབ་པར་འགྱུར་རོ། །​རིན་པོ་ཆེའི་རིགས་ཀྱང་རྗེས་སུ་ཐོབ་པར་འགྱུར་རོ། །​ཕྱིར་མི་ལྡོག་པའི་ཆོས་ཀྱི་འཁོར་ལོ་ཡང་རྙེད་པར་འགྱུར་རོ། །​བསྐལ་པ་བརྒྱ་ཚང་བར་འཁོར་བ་ལ་རྒྱབ་ཀྱིས་ཕྱོགས་པ་བྱས་པར་འགྱུར་རོ། །​དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་གསུངས་སོ། །​འཇིག་རྟེན་ཁམས་ནི་རིན་ཆེན་རིགས། །​རིགས་ཆེན་ཀུན་གྱིས་བརྒྱན་པ་སྟེ། །​དེ་ན་སངས་རྒྱས་བཞུགས་པ་ནི། །​དཔའ་བོ་དག་གིས་ཡོངས་སུ་བསྐོར། །​འཇིག་རྟེན་སྒྲོན་མ་དེ་མཚན་ནི། །​རིན་ཆེན་ཀུན་གྱིས་འཕགས་པ་སྟེ། །​རབ་ཏུ་བརྒྱན་པའི་གཟུགས་འཛིན་པ།



The English translation of this folio by 84000 - Translating the words of the Buddha can be found at:
https://read.84000.co/translation/toh266.html?part=UT22084-067-005-823#UT22084-067-005-823