Degé Kangyur volume 67, F.319.a

གཏོར། །​སིལ་སྙན་བྱེ་བ་དཀྲོལ་བར་བྱེད། །​སྤོས་ཀྱིས་ས་ལ་ཆག་ཆག་བཏབ། །​ཞིང་འདི་སྣང་བར་བྱེད་ནས་ནི། །​རྣམ་པ་དྲུག་ཏུ་གཡོ་བར་བྱས། །​མེ་ཏོག་བསགས་པ་དམ་པ་ཡི། །​མདོ་སྡེ་འདི་ནི་རབ་བཤད་པ། །​དེ་ན་འཁོར་སུ་གང་དག་ནི། །​སངས་རྒྱས་མཚམས་གནས་མ་གཏོགས་པར། གང་གཞན་ཐོས་པ་ཐམས་ཅད་ནི། །​སངས་རྒྱས་བླ་ན་མེད་པར་འགྱུར། །​ཕྱོགས་བཅུ་དག་ནི་ཐམས་ཅད་དུ། །​གང་གཱའི་བྱེ་སྙེད་ཞིང་ནས་ནི། །​བྱང་ཆུབ་སེམས་དཔའ་ལྷགས་ནས་སུ། །​མཉན་ནས་ཕྱིར་ཡང་སོ་སོར་དོང་། །​མདོ་སྡེ་འདི་ནི་བཤད་པའི་ཚེ། །​དགེ་སློང་བྱེ་བ་མང་ཆད་པ། །​དེ་དག་ཐམས་ཅད་དགྲ་བཅོམ་གྱུར། །​དེ་དག་གིས་ནི་འདྲེན་པ་མཐོང་། །​དགེ་སློང་དག་ནི་བརྒྱ་སྟོང་དང་། །​དགེ་སློང་མ་ཡང་དེ་བཞིན་ཏེ། །​སྟོང་ཕྲག་དྲུག་ཅུར་ཚང་བ་ཡིས། །​དེ་ཚེ་ཆོས་ལ་བཟོད་པ་ཐོབ། །​མི་སྐྱེ་བ་ཡི་ཆོས་རྣམས་ལ། །​བཟོད་པ་བླ་ན་མེད་ཐོབ་ནས། །​དེ་དག་སངས་རྒྱས་རྣམས་བལྟ་ཞིང་། །​སྲོག་ཆགས་རྣམས་ལ་ཆོས་ཀྱང་འཆད། །​དགེ་སློང་མ་ནི་ལྔ་བརྒྱ་དང་། །​དགེ་བསྙེན་མ་ནི་བཞི་བཅུ་དག །​རང་རང་གི་ནི་གོས་རྣམས་ཀྱིས། །​དེ་བཞིན་གཤེགས་ཀྱི་སྐུ་ལ་གསོལ། །​བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། ཚེ་དང་ལྡན་པ་ཤཱ་རིའི་བུ་ཡི་རངས་སོ། །​བྱང་ཆུབ་སེམས་དཔའ་སེམས་དཔའ་ཆེན་པོ་དེ་དག་དང་། དགེ་སློང་དེ་དག་དང་། ལྷ་དང་། མི་དང་། ལྷ་མ་ཡིན་དང་། དྲི་ཟར་བཅས་པའི་འཇིག་རྟེན་ཡི་རངས་ཏེ། །​བཅོམ་ལྡན་འདས་ཀྱིས་བཤད་པ་ལ་མངོན་པར་བསྟོད་དོ། །​འཕགས་པ་མེ་ཏོག་གི་ཚོགས་ཞེས་བྱ་བ་ཐེག་པ་ཆེན་པོའི་མདོ་རྫོགས་སོ།​། །​།རྒྱ་གར་གྱི་མཁན་པོ་ཛྙཱ་ན་སིད་དྷི་དང་། ཞུ་ཆེན་གྱི་ལོ་ཙྪ་བ་བན་དེ་དྷརྨ་ཏཱ་ཤཱི་ལ་སོགས་པས་ཞུ་ཆེན་བགྱིས་ཏེ་གཏན་ལ་ཕབ་པ།​། །



The English translation of this folio by 84000 Translating the words of the Buddha can be found at:
https://read.84000.co/translation/toh266.html?part=UT22084-067-005-825#UT22084-067-005-825