Degé Kangyur volume 66, F.279.b

དག་ནི་མེས་འཆི་བའི་དུས་བྱེད་པར་མི་འགྱུར། ཆུས་མ་ཡིན། མཚོན་གྱིས་མ་ཡིན། དུག་གིས་འཆི་བར་མི་བྱེད་དེ། དེ་དག་ཚེ་ཟད་པ་མ་གཏོགས་པར་མི་འམ་མི་མ་ཡིན་པ་སུས་ཀྱང་དེ་དག་གི་སྲོག་དབྲོག་པར་མི་ནུས། དུས་མ་ཡིན་པར་མི་འཆི། ནད་བུ་ཅན་དུ་མི་འགྱུར། བཀྲེས་པ་དང་སྐོམ་པས་འཆི་བའི་དུས་བྱེད་པར་མི་འགྱུར། རྒྱལ་པོའི་ཆད་པས་ཆོད་པར་མི་འགྱུར། འཆི་བའི་དུས་ལ་བབ་ཀྱི་བར་དུ་ལྟུང་བའི་རྩ་བ་འབྱུང་བར་མི་འགྱུར་ཏེ། དེ་དག་མིག་གིས་གཟུགས་མི་མཐོང་། རྣ་བས་སྒྲ་མི་ཐོས། སྣས་དྲི་མི་ཚོར། ལྕེས་རོ་མི་མྱོང་། ལུས་ཀྱིས་རེག་བྱ་མི་ཤེས་ཤིང་། ད་དུང་དུ་དབུགས་ཕྲ་མོ་འབྱུང་བ་དང་འཇུག་པར་བྱེད། ད་དུང་དུ་དེའི་ལུས་ལ་ཚེ་དང་། དྲོད་དང་། རྣམ་པར་ཤེས་པ་འཇུག་པར་འགྱུར་བ་དེའི་ཚེ། དེ་དག་ལ་བྱང་ཆུབ་སེམས་དཔའ་ནམ་མཁའི་སྙིང་པོ་ཐ་མལ་པར་སྟོན་པར་བྱེད་དེ། སེམས་ཅན་གང་སྔོན་བྲམ་ཟེ་ལ་གུས་པར་གྱུར་པ་དེ་དག་གི་རྣམ་པར་ཤེས་པ་ལ་ནི་རིགས་ཀྱི་བུ་དེ་བྲམ་ཟེའི་གཟུགས་སུ་སྟོན་ཏོ། །​གང་འདོད་པའི་དབང་ཕྱུག་ལ་གུས་པ་དེ་དག་ལ་ནི་འདོད་པའི་དབང་ཕྱུག་གི་བར་དུ་སྟོན་པ་ནས། གང་སྲེད་མེད་ཀྱི་བུ་ལ་གུས་པ་དང་། གང་དབང་ཕྱུག་ཆེན་པོ་ལ་གུས་པ་དང་། བརྒྱ་བྱིན་ལ་གུས་པ་དང་། འཁོར་ལོས་སྒྱུར་བ་ལ་གུས་པ་དང་། ཉི་མ་དང་། ཟླ་བ་དང་། ཡུལ་འཁོར་སྲུང་དང་། འཕགས་སྐྱེས་པོ་དང་། མིག་མི་བཟང་དང་རྣམ་ཐོས་ཀྱི་བུ་ལ་གུས་པ་དང་། གང་དག་ལྷ་དང་། རི་དང་། ཤིང་དང་། ཆུ་མིག་དང་། མཚེའུ་དང་། ལྟེང་ཀ་སྣ་ཚོགས་ལ་གུས་པའི་བར་དུ་གང་དང་གང་གི་སྐྱབས་སུ་སོང་བའི་སེམས་ཅན་དེ་དག་ལ་དེ་ལྟ་དེ་ལྟར་སེམས་ཅན་དེ་དག་གི་མདུན་དུ་བསྟན་ནས། གང་གི་བསམ་པ་ཅི་འདྲ་བ་བཞིན་དུ་དེའི་གཟུགས་ཀྱིས་འདི་སྐད་ཅེས་སྨྲའོ། །​འཕགས་པའི་བདེན་པ་བཞི་དག་ལ། །​གང་དག་ཤེས་རབ་ཀྱིས་མཐོང་བ། །འཁོར་བའི་སྲིད་པ་སྒྲོལ་བའི་ཕྱིར། །​འཁོར་བ་ན་ནི་དེ་ཀུན་ཤེས། །​སེམས་ཅན་དེ་དག་གིས་ཆོས་འདི་དག་རྣམ་པར་ཤེས་པས་ཤེས་པར་བྱས་ནས་མཐོ་རིས་ལ་གཞོལ་བར་འགྱུར་རོ། །​སེམས་ཅན་གང་དག་སངས་རྒྱས་ལ་མངོན་པར་དད་པ་དེ་དག་གི་མདུན་དུ་འདུག་སྟེ། སངས་རྒྱས་



The English translation of this folio by 84000 Translating the words of the Buddha can be found at:
https://read.84000.co/translation/toh260.html?part=UT22084-066-018-350#UT22084-066-018-350