Degé Kangyur volume 66, F.277.a

ཁྱོད་ཀྱིས་ཅི་ནས་ཀྱང་ཆོས་ཟབ་མོ་འདི་ལ་མངོན་སུམ་དུ་འགྱུར་བ་དེ་ལྟར་སྒོམས་ཤིག་དང་། ད་ལྟར་གྱི་ང་བཞིན་དུ་ཁྱེད་ཀྱང་ཡེ་ཤེས་མཐོང་བར་འགྱུར་རོ་ཞེས་སྨྲ་ཞིང་། ཆོས་འདི་ལྟ་བུ་ཟབ་མོ་ཟབ་པ་དག་མངོན་པར་ནི་མ་བྱས་ཀྱི། བཀླགས་པ་ཙམ་གྱིས་བསྟན་ཏོ་ཞེས་ནི་མི་ཟེར་བར་རྙེད་པ་དང་བཀུར་སྟིའི་ཕྱིར་བདག་འཚོང་བར་བྱེད་དེ། དེའི་རྐྱེན་གྱིས་དུས་གསུམ་གྱིས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་དག་དང་། འཕགས་པའི་གང་ཟག་དག་གི་སྤྱན་སྔར་ཉེས་པ་དང་བཅས་པར་འགྱུར། ལྟུང་བ་ལྕི་བ་འབྱུང་བར་འགྱུར། ལྷ་དང་མི་རྣམས་ཐེག་པ་ཆེན་པོས་བསླུས་པར་འགྱུར་ཏེ། དེ་ནི་དེའི་ཉན་ཐོས་ཀྱི་ཐེག་པར་ཡང་མི་འགྱུར་ན་ཐེག་པ་ཆེན་པོ་ལྟ་ཅི་སྨོས། ཐེག་པ་ཆེན་པོ་ལ་འཇུག་པའི་རྟོགས་པའི་ཁྱད་པར་ལྟ་ཅི་སྨོས། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལྟ་ཅི་སྨོས། འདི་ལྟ་སྟེ། དཔེར་ན་མི་ཞིག་འབྲོག་དགོན་པ་ཆེན་པོར་སོང་བ་ལས་བཀྲེས་པ་དང་སྐོམ་པས་ཉེན་ཅིང་ངལ་བར་གྱུར་ནས་དེ་འབྲས་བུ་ཆེན་པོ་དང་ལྡན་པའི་ཤིང་གི་དྲུང་དུ་ཟས་ཀྱི་ཕྱིར་འདུག་ནས། དེས་ཤིང་འབྲས་བུ་ཆེན་པོ་དང་ལྡན་པ་དྲི་དང་ལྡན་པ་རོ་དང་ལྡན་པ་བོར་ཏེ་དུག་གི་ཤིང་རོ་མེད་པ་ལ་འཇོགས་ནས་དུག་གི་འབྲས་བུ་ཟའོ། །​ཟོས་ནས་འཆི་བའི་དུས་བྱེད་དེ། གང་ཟག་དེ་ཡང་དཔེ་དེ་དང་འདྲ་བར་བརྗོད་དོ། །​དེ་བས་ན་མིར་རྙེད་པ་ཤིན་ཏུ་དཀོན་པ་རྙེད་ནས་དགེ་བའི་བཤེས་གཉེན་ལ་གནས་ཏེ་ཐེག་པ་ཆེན་པོ་ལ་འཇུག་པར་འདོད་པ་ལས་རྙེད་པ་དང་། བཀུར་སྟི་དང་། གྲགས་པའི་ཕྱིར་བདག་ལ་བསྟོད། གཞན་ལ་སྨོད་པར་བྱེད་པས་ལྟུང་བའི་ལྕི་བ་དེ་འདྲ་བ་བྱུང་བར་གྱུར་ནས་ལྟུང་བའི་རྩ་བ་དེའི་ཕྱིར་ཤེས་པ་ཐམས་ཅད་ཀྱིས་ཤིན་ཏུ་སྨད་ཅིང་ངན་སོང་དུ་འགྲོ་བར་འགྱུར་ཏེ། གང་ཟག་དེ་འདྲ་བ་ནི་རྒྱལ་རིགས་དང་། བྲམ་ཟེ་དང་། རྗེའུ་རིགས་དང་། དམངས་རིགས་ཐམས་ཅད་ཀྱིས་མི་བསྟེན་པར་བྱའོ། །​གང་དེ་སྟེན་པར་བྱེད་པ་དེ་ནི་ཤེས་པ་ཐམས་ཅད་ཀྱི་འདས་པ་དང་བཅས་པ་ཡིན་ཏེ། དེ་ཡང་བྱང་ཆུབ་སེམས་དཔའ་ལས་དང་པོ་པའི་ལྟུང་བའི་རྩ་བ་དྲུག་པའོ། །​གཞན་ཡང་རིགས་ཀྱི་བུ་མ་འོངས་པའི་དུས་ན་རྒྱལ་རིགས་རྣམས་ཀྱི་མདུན་ན་འདོན་གྱི་ཕྱག་དར་བའམ། བློན་པོའི་ཕྱག་དར་བའམ། དཔའ་བོའི་ཕྱག་དར་བའམ། སྨན་པའི་ཕྱག་དར་བ།



The English translation of this folio by 84000 - Translating the words of the Buddha can be found at:
https://read.84000.co/translation/toh260.html?part=UT22084-066-018-345#UT22084-066-018-345