Degé Kangyur volume 66, F.271.a

ལེ་ལོ་ཅན་དག་བརྩོན་འགྲུས་ལ་གཞོག་པར་འདོད་ན། དེ་དག་ལ་རིགས་ཀྱི་བུ་འདི་ནི་ཐབས་སྟོན་པར་བྱེད་དོ། །​གང་སྙིང་རྗེ་ཆེན་པོ་དང་མ་བྲལ་ཞིང་བདག་ལ་ལྟ་ཞིང་སེམས་ཅན་ཐམས་ཅད་ལ་བཏང་སྙོམས་སུ་བྱེད་ལ། བདག་གིས་ཐབས་གང་གིས་སེམས་ཅན་འདི་དག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལ་སེམས་བཞག་པ་དང་། ཐབས་མཁས་པ་ལ་དགོད་པ་དང་། ཚངས་པའི་གནས་བཞི་ནས་སྙིང་རྗེ་ཆེན་པོའི་བར་ལ་དགོད་པར་བྱ་སྙམ་དུ་སེམས་པ་དེས་བྱང་ཆུབ་སེམས་དཔའ་ནམ་མཁའི་སྙིང་པོ་ལ་ཕྱག་བྱའོ། །​དགོན་པའམ། དབྱེའམ། བླ་གབ་མེད་པར་ཨ་ག་རུ་དང་། རྒྱ་སྤོས་དང་། དུས་ཀྱི་རྗེས་སུ་འབྲང་བས་བདུག་པར་བྱའོ། །​ཐལ་མོ་སྦྱར་ཏེ་ཕྱོགས་མཚམས་ཀུན་ཏུ་ཡན་ལག་ལྔས་ཕྱག་འཚལ་ནས་སྔགས་ཀྱི་ཚིག་འདི་བཟླས་པར་བྱའོ། །​ཏདྱ་ཐཱ། སུ་མྲི་ཤ །སུ་མྲི་ཤ །​ཀཱ་རུ་ཎི་ཀ། ཙ་ར་ཙ་ར། བི་ཙ་ར། སྃ་ཙ་ར། ཀཱ་རུ་ཎི་ཀ །​མུར་མུར། བེ་ག་དྷ་རི། མ་ཙ་མེ། བྷུ་ཛ་བཱ་ད། མ་ཧཱ་ཀཱ་རུ་ཎི་ཀཱ། ཙི་ན་ཏ་མ་ཎི་པཱུ་རཱ་ཡ། ཀཱ་རུ་ཎི་ཀ སརྦ་ཤ་མེསྠ་པཱ་ཡ། ཨ་ཛྙཱ་དྷཱ་རི། སྥུ་གུང་སྥུ་གུང་། རུ་ཏི་བི་བེ་ཀ་གུང་དྲིཥྚི་བི་བེ་ཀ་གུང་། པཱུ་ར་ཡ་ཀཱ་རུ་ཎི་ཀ །​པཱུ་རཱ་ཡན་ཏུ་མ་མ། ཨ་ཤ་སརྦ་པན་ཐ་ཙ། ཨ་ཤོ་ཀ་ག་ཏི་སྭཱ་ཧཱ། སྔགས་འདི་ལན་དུ་མར་བཟླས་ཏེ་ཉལ་བར་བྱའོ། །​རིགས་ཀྱི་བུ་དེ་ནི་དེ་ལ་མིའི་གཟུགས་སམ། རི་དགས་ཀྱི་གཟུགས་སམ། བྱའི་གཟུགས་སམ། བདག་ཉིད་དུ་སྟོན་པའམ། དེའི་བསོད་ནམས་ཀྱི་སྐལ་པ་ཇི་ལྟ་བུ་དེ་འདྲ་བའི་གཟུགས་སམ། ཚིག་གིས་དེ་ལ་ཚུལ་གཅིག་པ་དེ་འདྲ་བའི་ཐབས་སྟོན་པར་བྱེད་དེ། ཐབས་གཅིག་པོ་དེས་སེམས་ཅན་ཁྲག་ཁྲིག་བརྒྱ་ཕྲག་སྟོང་དུ་མ་དག་ཡོངས་སུ་སྨིན་པར་བྱེད་ནུས་སོ། །​གང་ཐེག་པ་ལ་མི་གནས་པ་དང་། གང་ཉན་ཐོས་ཀྱི་ཐེག་པ་ལ་གནས་པ་དང་། རང་སངས་རྒྱས་ཀྱི་ཐེག་པ་ལ་གནས་པའི་སེམས་ཅན་དག་དེས་ཐང་ཅིག་ཡུད་ཙམ་དང་ལྡན་པའི་ཤེས་རབ་དང་། ཐབས་ཆུང་ཟད་ཀྱིས་ཀྱང་བླ་ན་མེད་པའི་ཐེག་པ་ཆེན་པོ་ལ་ཕྱིར་མི་ལྡོག་པར་གཞོག་པ་ནས།



The English translation of this folio by 84000 - Translating the words of the Buddha can be found at:
https://read.84000.co/translation/toh260.html?part=UT22084-066-018-333#UT22084-066-018-333