ཤཱ་རིའི་བུ་ཆོས་བཞི་དང་ལྡན་ན་བྱང་ཆུབ་སེམས་དཔས་བསྔགས་པའི་བྱ་བ་རྗེས་སུ་འཐོབ་པར་འགྱུར་ཏེ། བཞི་གང་ཞེ་ན། ཤཱ་རིའི་བུ་འདི་ལ་བྱང་ཆུབ་སེམས་དཔའ་ལྷག་པའི་ང་རྒྱལ་ཅན་དུ་མི་འགྱུར་བ་ཡིན། ང་རྒྱལ་ཚར་གཅོད་པའི་ཕྱིར་ཞུགས་པ་ཡིན། ཆགས་པ་མེད་པར་འགྱུར་བ་ཡིན། ཆགས་པ་སྤོང་བའི་ཕྱིར་ཞུགས་པ་ཡིན། ཞེ་སྡང་མེད་པར་འགྱུར་བ་ཡིན། བྱམས་པ་བསྒོམ་པ་ལ་མངོན་པར་དགའ་བ་ཡིན། རྨོངས་པ་མེད་པར་འགྱུར་བ་ཡིན། ཤེས་རབ་ཀྱི་སྟོབས་དང་ལྡན་པ་ཡིན། ཤེས་རབ་ཉེ་བར་རྟོན་པ་ཡིན། ཤེས་རབ་ཀྱིས་སྤྱོད་པ་ཡིན། ཤེས་རབ་ཀྱི་བདག་པོར་གྱུར་པ་ཡིན། ཤེས་རབ་ཀྱིས་ངེས་པར་འབྱུང་བ་ཡིན། རྨོངས་པའི་དྲ་བ་སྤོང་བའི་ཕྱིར་ཞུགས་པ་ཡིན། མུན་པ་མུན་ནག་འཇོམས་པའི་ཕྱིར་ཞུགས་པ་ཡིན། ཤེས་རབ་ཀྱི་རྒྱུ་ལྷུར་ལེན་ཅིང་མཐུ་དང་ལྡན་པ་ཡིན། ཤེས་རབ་ངེས་པར་རྙེད་པ་ཡིན་ཏེ། ཤཱ་རིའི་བུ་ཆོས་དང་པོ་འདི་དང་ལྡན་ན་བྱང་ཆུབ་སེམས་དཔའ་བསྔགས་པའི་བྱ་བ་རྗེས་སུ་འཐོབ་པར་འགྱུར་རོ། །ཤཱ་རིའི་བུ་གཞན་ཡང་བྱང་ཆུབ་སེམས་དཔའ་ནི་སེམས་ཅན་རྣམས་ཀྱི་ཐར་པའི་བྱ་བ་དོན་དུ་གཉེར་བ་ཡིན་ཏེ། ཤཱ་རིའི་བུ་འདི་ལྟ་སྟེ། དཔེར་ན་སྐྱེས་བུ་ཞིག་བུ་གཅིག་པ་སྡུག་ཅིང་ཡིད་དུ་འོང་བ་མི་འཐུན་པ་མེད་པ་དེ་རྒྱལ་པོས་གསད་སར་བོར་བ་མཐོང་བར་གྱུར་ལ། དེའི་ཕ་དང་མ་ཀྱེ་མའོ་བུ་གཅིག་པ་ཀྱི་ཧུད་བུ་གཅིག་བདག་ཅག་འབོར་རམ་ཞེས་ཀུན་ཏུ་སྨྲ་ཞིང་སྨྲེ་སྔགས་འདོན་པས་རྣམ་པར་སྨྲ་བར་བྱེད་དོ། །ཤཱ་རིའི་བུ་དེ་བཞིན་དུ་དུས་གང་གི་ཚེ་ལྷག་པའི་བསམ་པ་ཕུན་སུམ་ཚོགས་པའི་བྱང་ཆུབ་སེམས་དཔའ་སེམས་ཅན་གང་ཡང་རུང་བ་ཞིག་སྡིག་པ་བྱེད་པ་མཐོང་བ་ན། །ཀྱེ་མའོ་གང་དུ་སེམས་ཅན་ཤེས་རབ་འཆལ་བ་རྣམས་ནི་བདག་གི་ཡང་དག་པའི་འཚོ་བ་ལས་རྣམ་པར་ཉམས་པར་བྱེད་དོ། །ཞེས་དེ་ལ་བྱང་ཆུབ་སེམས་དཔའ་སྙིང་རྗེ་སྐྱེ་བར་འགྱུར་རོ། །ཤཱ་རིའི་བུ་གཞན་བསྲུང་ངོ་སྙམ་ན་བདག་བསྲུང་བར་བྱའོ། །ཤཱ་རིའི་བུ་བྱང་ཆུབ་སེམས་དཔའ་ཕན་པ་འདོད་པ་འདི་ལྟ་བུ་དང་ལྡན་པས་སྲོག་གི་ཕྱིར་ཡང་སྡིག་པའི་ལས་མི་བྱེད་དོ། །ཤཱ་རིའི་བུ་ཆོས་གཉིས་པོ་འདི་དང་ལྡན་ན་བྱང་ཆུབ་སེམས་དཔའ་བསྔགས་པའི་བྱ་བ་རྗེས་སུ་འཐོབ་པར་འགྱུར་རོ།