གལ་ཏེ་བྱང་ཆུབ་སེམས་དཔའ་ལམ་དེ་ཡོངས་སུ་བཟུང་ཡང་བསྐལ་པ་བྱེ་བ་འདས་ནས་ཐ་ན་འདུག་པ་ཙམ་གྱི་བདེ་བ་འདོད་པའི་སེམས་གཅིག་སྐྱེས་ན་ཡང་དེ་ལ་བྱང་ཆུབ་སེམས་དཔས་འདི་ལྟར་སེམས་གཟེངས་བསྟོད་པར་བྱ་སྟེ། བདག་གིས་གང་གཟུང་ནས་འདུག་པ་དེ་ཡང་མང་དུ་ཡིན་ཏེ། སེམས་ཅན་ཐམས་ཅད་ལ་གནོང་བསྐུར་རོ། །ཤཱ་རིའི་བུ་གང་གིས་མྱུར་དུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བ་འདི་ནི་བྱང་ཆུབ་སེམས་དཔའི་བདེན་པའི་རྣམ་པ་བཞི་པའོ། །ཤཱ་རིའི་བུ་ཅིའི་ཕྱིར་མངོན་པར་རྫོགས་པར་སངས་རྒྱས་པ་ཞེས་བྱ་ཞེ་ན། མ་མཁྱེན་པའི་མཁྱེན་པ་མཁྱེན་པས་མངོན་པར་མཁྱེན་པ་དང་། མཁྱེན་པའི་ཆོས་དེ་ལ་རབ་ཏུ་གནས་པས་སྤྱོད་པ་དེས་ན་མངོན་པར་སངས་རྒྱས་པ་ཞེས་བྱའོ། །བླ་ན་མེད་པ་ཞེས་བྱ་བ་ཡང་དེ་བཞིན་གཤེགས་པས་ཆོས་གང་རྡུལ་ཙམ་ཡང་ལུས་ཤིང་མ་རྒལ་བ་མེད་པ་དེས་ན་དེ་བཞིན་གཤེགས་པ་སྟེ་ཕ་རོལ་ཏུ་བྱོན་པ་ཞེས་བྱའོ། །ཤཱ་རིའི་བུ་ཅིའི་ཕྱིར་ཡང་དག་པར་རྫོགས་པའི་སངས་རྒྱས་ཞེས་བྱ་ཞེ་ན། ཐུགས་མཉམ་པ་དང་། ཐུགས་རྙོག་པ་མེད་པ་དང་། ཐུགས་མི་འཁྲུགས་པས་ཆོས་རྣམས་མངོན་པར་མཁྱེན་པ་དང་། ཆོས་ཐམས་ཅད་མཉམ་པ་ཉིད་དང་། ཆོས་ཐམས་ཅད་མི་མཉམ་པ་མེད་པར་མངོན་པར་མཁྱེན་པ་དེས་ན་ཡང་དག་པར་རྫོགས་པའི་སངས་རྒྱས་ཞེས་བྱའོ། །ཤཱ་རིའི་བུ་ཆོས་འདི་བཞི་དང་ལྡན་པའི་བྱང་ཆུབ་སེམས་དཔའ་ནི་བརྩོན་འགྲུས་མི་འཕྲོགས་པར་གྱུར་ཏེ། ཉོན་མོངས་པ་ཐམས་ཅད་ཀྱིས་མི་གོས་པར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱའོ། །ཤཱ་རིའི་བུ་བྱང་ཆུབ་སེམས་དཔའི་ཆོས་བཞི་སྒྲུབ་པ་འདི་ནི་དེ་བཞིན་གཤེགས་པས་མཁྱེན་པ་དང་། གཟིགས་པ་དང་། ཐུགས་སུ་ཆུད་པ་དང་། བརྙེས་པ་དང་། མངོན་སུམ་དུ་མཛད་པས་མངོན་པར་རྫོགས་པར་འཚང་རྒྱ་བ་ཡིན་ཏེ། བྱང་ཆུབ་སེམས་དཔའ་གནས་དེ་དག་ལས་མ་ཉམས་ཤིང་བསྒྲུབ་པའི་རྣམ་པ་ཀུན་རྫོགས་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འགྱུར་རོ། །