Degé Kangyur volume 66, F.36.b

ཉེས་པར་བྱས་པའི་ལས་རྣམས་ཀྱི་རྣམ་པར་སྨིན་པ་ཐ་དད་པ་མེད་པར་འགྱུར་རོ། །​དྲང་སྲོང་ཆེན་པོ་ཡང་འདི་ལྟ་སྟེ། བསྐལ་པས་སྲེག་པ་འདི་ནི་དེ་བཞིན་གཤེགས་པ་རྣམས་ཀྱི་ཐབས་མཁས་པ་སྟེ། དྲང་སྲོང་ཆེན་པོ་སེམས་ཅན་ཇི་སྙེད་བསྐལ་པས་སྲེག་པར་འགྱུར་བ་ཐོས་ནས་དད་པར་འགྱུར་བའི་སེམས་ཅན་དེ་སྙེད་དེ་བཞིན་གཤེགས་པས་བསྡུ་བའི་དངོས་པོས་སྡུད་པར་འགྱུར་རོ། །​དྲང་སྲོང་ཆེན་པོ་འདི་ལྟ་སྟེ། དཔེར་ན་ཁ་ཆུ་ལྡག་པའི་སྦྲུལ་ནི་མིག་གིས་ཀྱང་རྡུབ། རྣ་བ་དང་། སྣ་དང་། ཁའི་སྒོ་ནས་ཀྱང་རྡུབ་བོ། །​དྲང་སྲོང་ཆེན་པོ་དེ་བཞིན་གཤེགས་པ་ལ་ཡང་དེ་ལྟར་བལྟ་སྟེ། སྦྱིན་པས་ཀྱང་སྡུད། སྙན་པར་སྨྲ་བས་ཀྱང་སྡུད། དོན་སྤྱོད་པས་ཀྱང་སྡུད། དོན་འཐུན་པས་ཀྱང་སྡུད་དོ། །​དྲང་སྲོང་ཆེན་པོ་འདི་ལྟ་སྟེ། དཔེར་ན་གསེར་ལ་གནོད་པར་བྱ་བའི་ཕྱིར་མེར་འཇུག་པ་མ་ཡིན་གྱིས། གསེར་དུལ་མ་མ་ཡིན་པ་འདི་ཇི་ལྟར་ན་དུལ་མར་འགྱུར་སྙམ་ནས་དེའི་ཕྱིར་མེར་འཇུག་སྟེ། ཤིན་ཏུ་བསྲེགས་པའི་ཕྱིར་རིན་པོ་ཆེའི་འོས་སུ་འགྱུར་རོ། །​རིན་པོ་ཆེས་སྤྲས་པ་དེའི་རིན་ཐང་མེད་པར་འགྱུར་ཏེ། དྲང་སྲོང་ཆེན་པོ་དེའི་ཕྱིར་གསེར་བརྡུང་བ་དང་བསྲེག་པས་རྣམ་པར་སྦྱོང་ངོ་། །​དྲང་སྲོང་ཆེན་པོ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་ཀྱང་རྒྱུ་མེད་པར་སྲེག་པའི་བསྐལ་པ་མི་འབྱིན་ཏེ། འདིར་སེམས་ཅན་གང་ལ་ཡང་གནོད་པར་མི་འགྱུར་རོ། །​དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་མེ་སྒྲོན་གྱིས་འདི་སྐད་ཅེས་གསོལ་ཏོ། །​བཅོམ་ལྡན་འདས་བསྐལ་པས་སྲེག་པའི་མེ་ཕྱུང་ཡང་སེམས་ཅན་གང་ལ་ཡང་གནོད་པར་མི་འགྱུར་བ་ནི་ངོ་མཚར་ཏོ། །​བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་དེ་བཞིན་གཤེགས་པ་རྣམས་ནི་སེམས་ཅན་གང་ལ་ཡང་གནོད་པར་མི་མཛད་དོ། །​དྲང་སྲོང་ཆེན་པོ་འདི་ལྟ་སྟེ། དཔེར་ན་ཕྱོགས་བཅུ་རྣམས་སུ་ཆར་ཕྲ་མོའི་རྒྱུན་འབབ་པ་དེ་བས་ནི་དྲང་སྲོང་ཆེན་པོ་དེ་བཞིན་གཤེགས་པ་རྣམས་དང་། ས་བཅུ་ལ་གནས་པའི་བྱང་ཆུབ་སེམས་དཔའ་རྣམས་ཉེ་བར་གནས་ཏེ། རང་གི་ལག་གིས་སེམས་ཅན་ཐར་པར་བྱེད་པ་ནི་ཆེས་མང་ངོ་། །​དྲང་སྲོང་ཆེན་པོ་དེའི་ཚེ་སེམས་ཅན་དེ་དག་གིས་དེ་བཞིན་གཤེགས་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh246.html?part=UT22084-066-004-230#UT22084-066-004-230