།དེ་ལ་རེས་འགའ་ནི་གཅིག་ས་བོན་གྱི་འོས་སུ་འགྱུར་གྱི་ལྷག་མ་ས་བོན་གྱི་འོས་སུ་མི་འགྱུར་བ་དེ་ཇི་ལྟ་བུ། དྲང་སྲོང་ཆེན་པོས་གསོལ་པ། ཀྱེ་གཽ་ཏ་མ་རླུང་དང་ཉི་མས་ཤིང་ཏོག་རྣམས་མ་རུང་བར་བགྱིས་སོ། །བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་དེ་དེ་བཞིན་ཏེ། ལས་ཀྱི་རླུང་གིས་ཀྱང་སེམས་ཅན་གྱི་འབྲས་བུ་རྣམས་མ་རུང་བར་བྱས་སོ། །དྲང་སྲོང་ཆེན་པོ་ཁ་ཅིག་ནི་མངལ་ན་གནས་པ་ཉིད་ཀྱི་ཚེ་སྲིན་བུ་རྣམས་ཀྱིས་ཟོས་སོ། །ཁ་ཅིག་ནི་ལས་ཀྱི་རླུང་རྣམས་ཀྱིས་ཕྱེ་མར་བྱས་སོ། །དྲང་སྲོང་ཆེན་པོ་ཤིང་གི་ཉེས་པ་ནི་ཉུང་ངོ་། །སེམས་ཅན་གྱི་ཉེས་པ་ནི་མང་ངོ་། །དྲང་སྲོང་ཆེན་པོ་ཡང་སེམས་ཅན་གྱི་ཁམས་ནི་ཡོངས་སུ་རྟོག་པས་ཀུན་ནས་བསླང་བ་སྟེ། དྲང་སྲོང་ཆེན་པོ་སེམས་ཅན་རྣམས་ཀྱི་སེམས་དང་སེམས་ལས་བྱུང་བ་འཇུག་པ་ཇི་སྙེད་པ་དེ་སྙེད་དུ་སྲིད་པ་ལ་དམིགས་ཏེ། དྲང་སྲོང་ཆེན་པོ་དེའི་ཕྱིར་སེམས་ཅན་གྱི་ཁམས་ནི་ཡོངས་སུ་རྟོག་པས་ཀུན་ནས་བསླང་བའོ་ཞེས་ང་སྨྲའོ། །དྲང་སྲོང་ཆེན་པོས་གསོལ་པ། ཀྱེ་གཽ་ཏ་མ་དེ་དེ་བཞིན་ཏེ། ཞུ་བ་བརྗོད་པ་འདི་ནི་རྣམ་པར་དག་གོ། །ཅིའི་སླད་དུ་བསྐལ་པས་སྲེག་པར་འགྱུར་བ་བཀའ་སྩོལ་ཅིག །བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་ཆོས་ཀྱི་དབྱིངས་འདུས་མ་བྱས་པའི་ཕྱིར་བསྐལ་པས་སྲེག་པར་འགྱུར་རོ། །དྲང་སྲོང་ཆེན་པོ་གལ་ཏེ་བསྐལ་པས་སྲེག་པར་མི་འགྱུར་ན་ཆོས་ཀྱི་དབྱིངས་གཉིས་སུ་འགྱུར་ཏེ། ལ་ལ་མི་རྟག་ལ། ལ་ལ་རྟག་པར་འགྱུར་རོ། །དེའི་ཚེ་དེ་བཞིན་གཤེགས་པ་བདེན་པ་སྨྲ་བར་མི་འགྱུར་རོ། །དྲང་སྲོང་ཆེན་པོ་གང་གི་ཕྱིར་འདི་ཐམས་ཅད་རྟག་པ་མ་ཡིན། བརྟན་པ་མ་ཡིན། དབུགས་ཕྱིན་པ་མ་ཡིན་པ་དེའི་ཚེ་དེ་བཞིན་གཤེགས་པ་ཐམས་ཅད་མཁྱེན་པ་ཞེས་བྱ་བ་དེའི་མིང་ཐོབ་བོ། །དྲང་སྲོང་ཆེན་པོས་བྲམ་ཟེའི་ཁྱེའུ་ལ་སྨྲས་པ། འདི་ཐམས་ཅད་མཁྱེན་པར་མཚན་གསོལ་པ་ནི་འཐུན་ནོ། །བཅོམ་ལྡན་འདས་ཀྱིས་བཀའ་སྩལ་པ། དྲང་སྲོང་ཆེན་པོ་གལ་ཏེ་བསྐལ་པས་བསྲེགས་པར་མ་གྱུར་ན་འདི་ནི་དུས་བཟང་པོའོ། །འདི་ནི་དུས་ངན་པའོ་ཞེས་བྱ་བར་དུས་ཐ་དད་པ་མེད་པར་འགྱུར་རོ། །དྲང་སྲོང་ཆེན་པོ་གལ་ཏེ་ཡང་བསྐལ་པས་བསྲེགས་པར་མ་གྱུར་ན་ལེགས་པར་བྱས་པ་དང་།