དགེ་བསྙེན་མ་གང་གཱའི་བྱེ་མ་སྙེད་དག་དང་ལྷན་ཅིག་ཏུ་དེ་བཞིན་གཤེགས་པ་ལ་མཆོད་པ་ཆེན་པོ་དཔེ་མེད་པ་ཐོགས་ཏེ་འདིར་ལྷགས་སོ། །དེ་བཞིན་དུ་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མི་འམ་ཅི་དང་། ལྟོ་འཕྱེ་ཆེན་པོ་དང་། མི་དང་མི་མ་ཡིན་པ་དུ་མ་དེ་དག་ཀྱང་བཅོམ་ལྡན་འདས་ཀྱི་རྫུ་འཕྲུལ་གྱི་ཆོ་འཕྲུལ་དེ་མཐོང་ནས་བཅོམ་ལྡན་འདས་ག་ལ་བ་དེར་དོང་ངོ་། །དེ་ནས་གང་དག་ཕྱོགས་བཅུ་ནས་ལྷགས་པའི་བྱང་ཆུབ་སེམས་དཔས་དེ་དག་གིས་མཆོད་པ་བླ་ན་མེད་པས་བཅོམ་ལྡན་འདས་ལ་བསྙེན་བཀུར་བྱས་ཏེ། ཕ་རོལ་ཏུ་ཕྱིན་པ་དྲུག་གིས་ཡོངས་སུ་བསྒྲུབས་པའི་སྟན་དག་ལ་འཁོད་དོ། །མི་དང་མི་མ་ཡིན་པའི་བར་དུ་ཡང་ཅི་རིགས་པའི་སྟན་དག་ལ་འཁོད་དོ། །གང་དག་བཅོམ་ལྡན་འདས་ཀྱིས་སྤྲུལ་པ་ཕྱུང་བ་དེ་དག་ཀྱང་མནར་མེད་པ་ཡན་ཆད་འོག་མིན་གྱི་གནས་མན་ཆད་དུ་མངོན་པར་བྱུང་སྟེ་སླར་ཡང་ལོག་གོ། །ཕྱོགས་བཅུའི་སངས་རྒྱས་རྣམས་ཀྱི་སྤྲུལ་པ་ཕྱུང་བ་ཇི་སྙེད་པ་དེ་དག་ཐམས་ཅད་ནི་བཅོམ་ལྡན་འདས་ཤཱཀྱ་ཐུབ་པའི་སྤུའི་ཁུང་བུ་ཐམས་ཅད་དུ་ནུབ་བོ། །གང་དག་བཅོམ་ལྡན་འདས་ཀྱིས་སྤྲུལ་པ་ཕྱུང་བ་དེ་དག་ནི་སངས་རྒྱས་ཐམས་ཅད་ཀྱི་སྐུ་རྣམས་སུ་ནུབ་བོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་རྒྱལ་བའི་ཕུང་པོ་ཞེས་བྱ་བ་སྟན་ལས་ལངས་ཏེ། བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །ཀྱེ་མ་མི་རྣམས་ཀྱི་ནི་འདྲེན་པ་ཡིས། །སྔོན་ཆད་མ་བྱུང་མཛད་པ་སྣ་ཚོགས་འདི། །སྐྱེ་དགུ་ཀུན་ལ་མྱུར་དུ་ཀུན་བསྟན་པ། །དེ་ཡིས་བདུད་སྡེ་ཐམས་ཅད་མོག་མོག་བགྱིས། །ཕན་ཚུན་དག་ཏུ་ཚིག་ཏུ་སྨྲ་བགྱིད་པ། །ཀྱེ་མའོ་ཤིན་ཏུ་ངོ་མཚར་ཆེ་ཞེས་མཆི། །བདག་ཅག་ཅི་ཞིག་ཕྱིར་ནི་འདིར་ལྷགས་ཀྱེ། །བདག་ཅག་བཅོམ་མོ་བདག་ཅག་བཅོམ་ཞེས་མཆི། །དཀའ་ཐུབ་ཅན་བདག་དཀའ་ཐུབ་ཅན་མིན་གྱུར། །ཉམ་ཆུང་ལུས་ལ་པགས་པ་ཙམ་ཞིག་ལས། །བདག་འཁོགས་བདག་སྐམས་བདེ་བ་རྣམས་ལས་ཉམས།