།བདག་འཁོགས་བདག་སྐམས་བདེ་བ་རྣམས་ལས་ཉམས། །བདག་ཅག་རྫུ་འཕྲུལ་ཐོབ་པར་གྱུར་མ་ཡིན། །ཡི་གེ་མ་མཆིས་རྫུ་འཕྲུལ་གསུམ་རྣམས་ཀྱིས། །བསྟན་པའི་དགྲ་རྣམས་མོག་མོག་གྱུར་པར་མཛད། །བསྟན་པའི་འདྲེན་པ་ཁྱོད་ཀྱིས་དེ་རིང་ནི། །སངས་རྒྱས་སྲས་ལ་དུས་སྟོན་ཆེན་པོ་མཛད། །འཁོར་འདི་ཐམས་ཅད་ཐེ་ཚོམ་འཚལ་བར་གྱུར། །དགའ་བ་སྐྱེས་ཤིང་སེམས་ཀྱང་རབ་དགའ་སྟེ། །གང་ཞིག་གནས་ནས་ལྷ་ཚོགས་བདག་ཅག་ཀྱང་། །འཇིག་རྟེན་མགོན་པོ་སངས་རྒྱས་གྱུར་ཅིག་མཆི། །འཇམ་དབྱངས་སངས་རྒྱས་མང་པོ་བསྙེན་བཀུར་བགྱིས། །སངས་རྒྱས་སྲས་པོ་མཐའ་ཡས་རྣམས་ཀྱིས་བསྐོར། །འཇམ་པའི་དབྱངས་ནི་འཁོར་གྱི་ནང་ན་མཆིས། །ཆོ་འཕྲུལ་རྣམ་པར་ཕྱེ་སྟེ་བསྟན་དུ་གསོལ། །འདི་དག་ཆོས་ནི་གང་གི་ལྟས་ཤིག་ལགས། །ཐུབ་པ་ཆོས་ནི་གང་ཞིག་གསུང་བར་བཞེད། །འཁོར་འདི་ཐམས་ཅད་འབོད་ཅིང་མཆིས་ལགས་ན། །སེམས་ཅན་ཐུགས་བརྩེའི་སླད་དུ་བདག་ལ་གསུངས། །དེ་ནས་སངས་རྒྱས་ཀྱི་བྱིན་གྱི་རླབས་ཀྱིས་འཁོར་དེའི་ནང་ནས་དྲང་སྲོང་ཆེན་པོ་མེ་སྒྲོན་ཞེས་བྱ་བ་གཅིག་གིས་བྱང་ཆུབ་སེམས་དཔའ་རྒྱལ་བའི་ཕུང་པོ་ལ་འདི་སྐད་ཅེས་སྨྲས་སོ། །ཀྱེ་གཞོན་ནུ་རེ་ཤིག་ཁ་རོག་ཤིག་ཁོ་བོས་དྲི་བ་དྲི་བར་བྱའོ། །གལ་ཏེ་ཁོ་བོའི་དྲི་བ་ཁོང་དུ་ཆུད་པར་བྱེད་ན་ནི་དེ་ཐམས་ཅད་མཁྱེན་པ་ཞེས་བྱ་བའི་མིང་དང་ཡང་འཐུན་ནོ། །འོན་ཏེ་སྲེད་མེད་ཀྱི་བུ་དང་། དབང་ཕྱུག་ཆེན་པོས་ཕྱུང་བའི་འགྲོ་ལྡིང་བ་རྣམས་ཀྱིས་སྤྲུལ་པ་བྱེད་དུ་བཅུག་ན་འདིར་ངོ་མཚར་ཡང་མི་ཆེ་སྟེ། སྐྱེས་བུ་ངན་པ་དང་། སྒྱུ་མ་མཁན་རྣམས་ཀྱིས་འདི་འགྲུབ་བོ། །དེ་ནས་བཅོམ་ལྡན་འདས་ཀྱིས་འཛུམ་པའི་ཞལ་གྱིས་དྲང་སྲོང་གི་ཚོགས་ལ་ཀུན་ཏུ་གཟིགས་ནས་དྲང་སྲོང་ཆེན་པོ་མེ་སྒྲོན་ལ་འདི་སྐད་ཅེས་བཀའ་སྩལ་ཏོ། །ཚེ་དང་ལྡན་པ་དྲང་སྲོང་ཆེན་པོ་ཅི་ནུས་ཀྱིས་དྲི་བ་དྲིས་ཤིག་དང་རྣམ་པར་སྦྱར་བར་བྱའོ། །དེ་ནས་བཅོམ་ལྡན་འདས་ལ་དྲང་སྲོང་ཆེན་པོ་མེ་སྒྲོན་གྱིས་འདི་སྐད་ཅེས་གསོལ་ཏོ། །ཀྱེ་གཽ་ཏ་མ་སེམས་ཅན་གྱི་སྐྱེ་བ་གང་ནས་བྱུང་།