དྲིལ་བུ་སྣ་ཚོགས་ཀྱི་སྒྲས་ཀུན་དུ་རྒྱས་པར་འགེངས་པའི་དྲ་བའི་བླ་རེ་རྒྱ་མཚོ་སྤྲིན་རྣམས་དང་། པད་མ་འབར་བ་ཁ་དོག་མཐའ་ཡས་པ་སྣ་ཚོགས་སུ་སྣང་བའི་ནོར་བུའི་སྙིང་པོ་ཅན་གྱི་པད་མའི་དྲ་བའི་བླ་རེ་རྒྱ་མཚོ་སྤྲིན་རྣམས་དང་། གསེར་གྱི་ཟེ་བ་ཅན་གྱི་འོད་ཟེར་སྣང་བའི་རྒྱལ་མཚན་གྱི་བླ་རེ་རྒྱ་མཚོ་སྤྲིན་རྣམས་དང་། བཀོད་པ་བསམ་གྱིས་མི་ཁྱབ་པར་སྣང་བའི་འོད་མཐའ་ཡས་པ་བཀོད་པ་ཐམས་ཅད་ཀྱི་རྒྱན་གྱི་བླ་རེ་རྒྱ་མཚོ་སྤྲིན་རྣམས་ཀྱིས་ནམ་མཁའི་དཀྱིལ་ཀུན་དུ་ཁེབས་པར་བྱིན་གྱིས་བརླབས་ཏེ། སངས་རྒྱས་དང་། བྱང་ཆུབ་སེམས་དཔའ་གང་ཆེན་མཚོ་སྤྲིན་རྒྱ་མཚོ་ཐམས་ཅད་ལ་བསྟི་སྟང་དུ་བྱའོ། །བླ་མར་བྱའོ། །རི་མོར་བྱའོ། །མཆོད་པར་བྱའོ། །ནོར་བུ་རིན་པོ་ཆེ་སྣ་ཚོགས་ཐམས་ཅད་ཀྱི་གདུགས་རྒྱ་མཚོ་སྤྲིན་རྣམས་ཀྱིས་ནམ་མཁའི་དཀྱིལ་ཀུན་དུ་ཁེབས་པར་བྱིན་གྱིས་བརླབས་ལ་རིན་པོ་ཆེ་བཅུའི་འོད་ཟེར་སྣང་བ་བཀོད་པའི་མེ་ཏོག་གི་གདུགས་རྒྱ་མཚོ་སྤྲིན་རྣམས་དང་། མུ་ཏིག་ཁ་དོག་མཐའ་ཡས་པའི་མཛོད་ཀྱི་གདུགས་རྒྱ་མཚོ་སྤྲིན་རྣམས་དང་། སངས་རྒྱས་དང་། བྱང་ཆུབ་སེམས་དཔའ་ཐམས་ཅད་ཀྱི་སྙིང་རྗེའི་སྒོའི་སྒྲའི་ནོར་བུའི་རྒྱལ་པོའི་གདུགས་རྒྱ་མཚོ་སྤྲིན་རྣམས་དང་། རིན་པོ་ཆེ་སྣ་ཚོགས་ཀྱི་འོད་འཕྲོ་བའི་ཕྲེང་བའི་གདུགས་རྒྱ་མཚོ་སྤྲིན་རྣམས་དང་། རིན་པོ་ཆེའི་རྡུལ་ཀུན་དུ་སྣང་བས་རབ་ཏུ་བརྒྱན་པའི་དྲིལ་བུའི་དྲ་བ་དཔྱངས་པའི་གདུགས་རྒྱ་མཚོ་སྤྲིན་རྣམས་དང་། ནོར་བུ་ཐམས་ཅད་ཀྱི་སྡོང་པོའི་ཡལ་གའི་རྒྱན་ཅན་གྱི་གདུགས་རྒྱ་མཚོ་སྤྲིན་རྣམས་དང་། ཉི་མ་རྣམ་པར་སྣང་བར་བྱེད་པའི་འོད་འཕྲོ་བའི་ནོར་བུའི་རྒྱལ་པོ་དང་། སྤོས་དང་། བདུག་པ་ཐམས་ཅད་ཀྱི་གདུགས་རྒྱ་མཚོ་སྤྲིན་རྣམས་དང་། ཙན་དན་གྱི་ཕྱེ་མའི་མཛོད་ཀུན་དུ་རྒྱས་པར་འགེངས་པའི་གདུགས་རྒྱ་མཚོ་སྤྲིན་རྣམས་དང་། སངས་རྒྱས་ཀྱི་ཡུལ་རྒྱ་ཆེན་པོ་སྣང་བར་བྱེད་པ་ཀུན་དུ་བཀོད་པས་རྒྱས་པར་འགེངས་པའི་གདུགས་རྒྱ་མཚོ་སྤྲིན་མ་འདྲེས་པ་རྣམས་ཀྱིས་སངས་རྒྱས་དང་བྱང་ཆུབ་སེམས་དཔའ་རྒྱ་མཚོ་ཐམས་ཅད་ལ་བསྟི་སྟང་དུ་བྱའོ། །བླ་མར་བྱའོ། །རི་མོར་བྱའོ། །མཆོད་པར་བྱའོ། །རིན་པོ་ཆེ་ཐམས་ཅད་སྣང་བའི་དཀྱིལ་འཁོར་རྒྱ་མཚོ་སྤྲིན་རྣམས་དང་། རིན་པོ་ཆེ་འོད་འཕྲོ་བ་ཐམས་ཅད་ཀྱི་གཟུགས་ཀྱི་འོད་ཀྱི་དཀྱིལ་འཁོར་རྒྱ་མཚོ་སྤྲིན་མ་འདྲེས་པ་རྣམས་དང་།