བདུད་སྡིག་ཅན་ཡིན་པར་སེམས་ཅན་རྣམས་ཀྱིས་ཤེས་ཀྱང་བདུད་ཀྱི་ལས་ཀྱང་མི་བྱེད་དོ། །འདོད་ཆགས་དང་། ཞེ་སྡང་དང་། གཏི་མུག་གི་འཇིགས་པ་ལ་སོགས་པ་མི་དགེ་བའི་ཕྱོགས་ཇི་སྙེད་པ་དེ་སྙེད་ཀྱི་བདུད་ཀྱི་ལས་རྟག་ཏུ་བྱེད་ལ། ཤིན་ཏུ་གཅོད་པར་བྱེད་པའི་བདུད་ཀྱི་ལས་ལ་རྟེན་པ་ཡང་མ་ཡིན་ནོ། །བྱང་གི་སྒྲ་མི་སྙན་ལ་ལར་ནི་བདག་ཉིད་མངལ་ནས་སྐྱེས་པ་ལྟ་བུར་སྟོན་ཏེ། སེམས་ཅན་རྣམས་ཀྱིས་བུ་བཙས་པར་ཤེས་ཀྱང་འཁྲིག་པ་ལ་བརྟེན་ནས་བྱུང་བ་ཡང་མ་ཡིན་ཞིང་བུའི་རང་བཞིན་ཡང་མ་ཡིན་ནོ། །བྱང་གི་སྒྲ་མི་སྙན་ལ་ལར་ནི་མངོན་པར་འབྱུང་བ་ཡང་སྟོན་ཏེ། སེམས་ཅན་རྣམས་ཀྱིས་མངོན་པར་འབྱུང་བར་ཤེས་ཀྱང་། དེ་ལ་མངོན་པར་འབྱུང་བའི་འདུ་ཤེས་འཇུག་པ་ཡང་མེད་དོ། །བྱང་གི་སྒྲ་མི་སྙན་ལ་ལར་ནི་གཙུག་ཕུད་བྲེག་པའི་ལས་ལྟ་བུར་སྟོན་ཏེ། སེམས་ཅན་རྣམས་ཀྱིས་གཙུག་ཕུད་འབྲེག་པའི་ལས་བྱེད་པར་ཤེས་ཀྱང་དེ་ལ་དེའི་འདུ་ཤེས་འཇུག་པ་ཡང་མེད་དོ། །བྱང་གི་སྒྲ་མི་སྙན་ལ་ལར་ནི་མཁན་པོའི་ཁྱིམ་དུ་འགྲོ་བ་ལྟ་བུར་སྟོན་ཏེ། བསླབ་པར་བྱ་བའི་ཡི་གེ་སློབ་པར་སེམས་ཅན་རྣམས་ཀྱིས་ཤེས་ཀྱང་བསྐལ་པ་དུ་མར་བསླབ་པའི་བྱ་བ་ཤིན་ཏུ་ཚར་ཕྱིན་པར་བྱས་ཤིང་བསྐལ་པ་བྱེ་བ་ཕྲག་བརྒྱ་སྟོང་དུ་མ་ནས་བཟོའི་བྱ་བ་ཐམས་ཅད་ཀྱང་མཐར་ཕྱིན་ཏོ། །བྱང་གི་སྒྲ་མི་སྙན་ལ་ལར་ནི་མིའི་སེང་གེ་དང་། ངང་པའི་སྟབས་སུ་འགྲོ་བ་ལྟ་བུར་སྟོན་ཏེ། སེམས་ཅན་རྣམས་ཀྱིས་མིའི་སེང་གེ་དང་། ངང་པའི་སྟབས་སུ་འགྲོ་བར་ཤེས་ཀྱང་བསྐལ་པ་བྱེ་བ་ཕྲག་དུ་མ་ལ་སོགས་པ་ནས་ངང་པའི་སྟབས་ཀྱི་འདུ་ཤེས་དེ་ཡང་སྤངས་སོ། །བྱང་གི་སྒྲ་མི་སྙན་ལ་ལར་ནི་བུ་དང་ཆུང་མ་ཡང་སྟོན་པར་བྱེད་དེ། སེམས་ཅན་རྣམས་ཀྱིས་འདོད་པ་ལ་ཡོངས་སུ་སྤྱོད་པར་ཤེས་ཀྱང་། དེའང་རྟག་ཏུ་ཆོས་འདོད་པ་ལ་ཡོངས་སུ་སྤྱོད་ཀྱི་ཉོན་མོངས་པ་དང་། འདོད་པ་ལ་གནས་པ་ཡང་མ་ཡིན་ནོ། །བྱང་གི་སྒྲ་མི་སྙན་ལ་ལར་ནི་བཤང་བ་དང་། གཅི་བ་ལྟ་བུར་སྟོན་པར་བྱེད་དེ། སེམས་ཅན་རྣམས་ཀྱིས་བཤང་བ་དང་། གཅི་བ་བྱེད་པར་ཤེས་ཀྱང་བསྐལ་པ་བྱེ་བ་ཕྲག་གྲངས་མེད་པ་ནས་བཤང་བ་དང་། གཅི་བའི་འདུ་ཤེས་ཀྱང་རྣམ་པར་སྤངས་ཏེ་འདུ་ཤེས་དེ་ཡང་འཇུག་པ་མེད་དོ། །བྱང་གི་སྒྲ་མི་སྙན་ལ་ལར་ནི་སོ་ཤིང་སྤྱོད་པ་ལྟ་བུར་སྟོན་ཏེ། སོ་ཤིང་འཆང་བར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་གྲངས་མེད་པ་ནས་ཉོན་མོངས་པའི་སོ་ཤིང་རྣམ་པར་སྤངས་ཏེ། ཁ་ཡང་ཨུད་པ་ལའི་དྲི་དང་ལྡན་ནོ།