དེ་བཞིན་དུ་འཇིག་རྟེན་གྱི་བར་མཚམས་དེ་དག་ཐམས་ཅད་འོད་དེས་སྣང་བར་བྱས་སོ། །སེམས་ཅན་དམྱལ་བ་པའི་སེམས་ཅན་གང་དག་གི་ལུས་ལ་འོད་དེས་ཕོག་པ་དེ་དག་ཐམས་ཅད་ཀྱང་སྡུག་བསྔལ་རྩེ་ཞིལ་བར་གྱུར་ཏོ། །བཅོམ་ལྡན་འདས་དང་འཁོར་གྱི་དཀྱིལ་འཁོར་ཆེན་པོའི་ནང་དུ་ཡང་པད་མ་བཀྲ་ཞིང་བལྟ་ན་སྡུག་ལ་ཁ་དོག་བཟང་ཞིང་ཡིད་དུ་འོང་བ་འདབ་མ་བྱེ་བ་བརྒྱ་སྟོང་ཕྲག་དུ་མ་དང་ལྡན་པ། སྟེང་རིན་པོ་ཆེའི་དྲ་བ་དྲི་བསུང་དང་ལྡན་ཞིང་འཇམ་ལ་ཀ་ཙ་ལིན་དིའི་གོས་ལྟར་རེག་ན་བདེ་བ། བཀྲ་ཞིང་བལྟ་ན་སྡུག་པ་དག་གིས་ཀུན་ཏུ་ཁེབས་པ་བྱེ་བ་ཕྲག་དྲུག་ཅུ་ས་གཞི་བརྟོལ་ཏེ་མངོན་པར་འཐོན་པར་གྱུར་ཏོ། །པད་མ་དེ་དག་རེ་རེ་ལས་དྲི་ངད་བྱུང་བ་གང་ཡིན་པ་དེས་ཀྱང་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་དྲིས་ཁྱབ་པར་གྱུར་ཏོ། །སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདིའི་ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། མི་རྣམས་ཀྱི་སྤོས་གང་ཡིན་པ་དེ་དག་ཐམས་ཅད་ཀྱང་པད་མའི་དྲི་དེས་ཁྱབ་པར་གྱུར་ཏོ། །ལྷ་དང་། མི་རྣམས་དང་། ལྷ་མ་ཡིན་དང་། ནམ་མཁའ་ལྡིང་དང་། ཀླུ་དང་། གནོད་སྦྱིན་དང་། དྲི་ཟ་རྣམས་དང་། མི་འམ་ཅི་དང་། ལྟོ་འཕྱེ་ཆེན་པོ་གང་དག་གིས་སྣར་པད་མའི་དྲི་དེ་སོང་བ་དེ་དག་ཐམས་ཅད་ཀྱང་ཆོས་ཀྱི་དགའ་བ་དང་། ཆོས་མཉན་པའི་རྒྱུ་དང་ལྡན་པར་གྱུར་ཏེ་བདག་ཉིད་ཉོན་མོངས་པ་དང་བྲལ་བ་སྙམ་དུ་ཤེས་སོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་སྤྲིན་ཆེན་སྙིང་པོས་ཆོས་ཀྱི་འོད་ཀྱི་བཀོད་པ་དེ་མཐོང་ནས་ཐལ་མོ་སྦྱར་ཏེ་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་འདི་ལྟར་ཕྱོགས་བཅུར་འོད་གདའ་བ་འདི་དང་པད་མའི་བཀོད་པ་བྱུང་བ་འདི་སུའི་སྔ་ལྟས་ལགས། དེ་ནས་ལྷ་མོ་དྲི་མ་མེད་པའི་འོད་ཀྱིས་སྤྲིན་ཆེན་སྙིང་པོ་ལ་འདི་སྐད་ཅེས་སྨྲས་སོ། །འཕགས་པ་སྤྲིན་ཆེན་སྙིང་པོ་ཅིའི་ཕྱིར་བཅོམ་ལྡན་འདས་འདི་སུའི་སྔ་ལྟས་ལགས་ཞེས་སྨྲ། མཚན་མ་མེད་པའི་ཆོས་རྨི་ལམ་ལྟ་བུ་ཡིན་ཡང་འདྲི་བར་བྱེད་དམ་ཁྱོད་ལ་ནི་ད་དུང་ཡང་ཕྱིན་ཅི་ལོག་ཡོད་པ་འདྲའོ། །སྨྲས་པ། ལྷ་མོ་ལེགས་སོ། །ལེགས་སོ། །དེ་དེ་བཞིན་ཏེ། ལྷ་མོ་ཁྱོད་ལེགས་སོ། །ཁོ་བོ་ནི་རྨི་ལམ་ལྟ་བུའི་ཡུལ་དག་ལ་མཚན་མར་ལྟ་བ་འཛིན་པའི་འདུ་ཤེས་བཅོམ་ལྡན་འདས་ལ་ཞུ་བར་བྱེད་དོ། །སྨྲས་པ། འཕགས་པ་སྤྲིན་ཆེན་སྙིང་པོ་སུའི་དོན་གྱི་ཕྱིར་མཚན་མར་ལྟ་བ་འཛིན་པའི་འདུ་ཤེས་སྨྲ་བར་བྱེད།