སྤྲིན་ཆེན་སྙིང་པོ་ངས་ནི་དེ་སྐད་མ་བཤད་ཀྱི་དངོས་པོ་མེད་པའི་ཚུལ་དུ་བཤད་དེ། ལྕགས་ཀྱི་མར་མེ་ཤི་བའི་ཚུལ་དུ་བཤད་པ་གང་ཡིན་པ་དེ་ནི་ཉོན་མོངས་པ་རབ་ཏུ་ཞི་བའི་ཐ་ཚིག་སྟེ་དངོས་པོ་ནི་ཡོད་ཅེས་བྱ་བའི་ཐ་ཚིག་གོ། །གསོལ་པ། སངས་རྒྱས་ཐམས་ཅད་ཀྱིས་རབ་ཏུ་བསྒྲིམས་ཏེ་བསྐལ་པ་བྱེ་བ་ཕྲག་མང་པོར་བཙལ་ཀྱང་མི་རྙེད་དོ་ཞེས་གསུངས་པའི་དོན་འདི་ཡང་བཅོམ་ལྡན་འདས་དེ་བཞིན་གཤེགས་པས་བཤད་དུ་གསོལ། བཀའ་སྩལ་པ། སྤྲིན་ཆེན་སྙིང་པོ་དེ་དེ་བཞིན་ཏེ། དེ་བཞིན་གཤེགས་པ་ཐམས་ཅད་ཀྱིས་སྲིད་པ་ཐམས་ཅད་དུ་བསྐལ་པ་བྱེ་བ་ཕྲག་གྲངས་མེད་པ་ལ་སོགས་པར་རབ་ཏུ་བསྒྲིམས་ཏེ་བཙལ་ཀྱང་སེམས་ཅན་དུ་འདུ་ཤེས་པ་རྙེད་པར་འགྱུར་བ་དེ་ནི་གནས་མེད་དོ། །འདི་ལྟ་སྟེ་དཔེར་ན། རྒྱལ་པོ་ཞིག་རང་གི་ཁང་བཟངས་ཀྱི་བཙུན་མོའི་འཁོར་ནས་བྱུང་སྟེ། གནས་གཞན་ཞིག་ཏུ་སོང་བར་མཐོང་བ་ལ་རྒྱལ་པོ་བཙུན་མོའི་འཁོར་གྱི་ནང་ན་འདུག་གོ་ཞེས་བྱ་བ་དེ་ནི་གནས་མེད་དོ། །དེ་བཞིན་དུ་ཏིང་ངེ་འཛིན་འདི་ལ་གནས་པ་བདག་དང་། སེམས་ཅན་དང་ལྡན་པ་སྲིད་པ་ཐམས་ཅད་སྤངས་པ་ཀུན་ནས་ཉོན་མོངས་པ་མེད་པའི་བྱང་ཆུབ་སེམས་དཔའ་སེམས་དཔའ་ཆེན་པོ་སེམས་ཅན་གྱི་དོན་ལ་སྲིད་པའི་ཉེས་པ་དང་རྣམ་པར་འདྲེས་ཤིང་འདུག་གོ་ཞེས་བྱ་བ་དེ་ནི་གནས་མེད་དོ། །དེ་བས་ན་བཅོམ་ལྡན་འདས་ཀྱིས་སྲིད་པ་ཐམས་ཅད་ན་ཡང་རྟག་པར་གནས་པའི་ཆོས་ཡུངས་འབྲུ་ཙམ་ཡང་མེད་དོ་ཞེས་བྱ་བ་དེ་ནི་བདག་དང་སེམས་ཅན་དང་སྲོག་དང་། གང་ཟག་མེད་དོ་ཞེས་བསྟན་པ་ཡིན་ཏེ་ཤིན་ཏུ་ཡུན་རིང་དུ་གནས་པ་ནི་སངས་རྒྱས་ཀྱི་ཆོས་ལ་གནས་པ་ཡིན་པར་འདུ་ཤེས་བསྐྱེད་པར་བྱའོ། །ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ནི་ཆགས་པ་ཡང་མ་ཡིན། མ་ཆགས་པ་ཡང་མ་ཡིན། ཉེ་བར་ལེན་པའི་ཆོས་ལ་གནས་པ་ཡང་མ་ཡིན་ཏེ། རྟག་པ་དང་། ཐེར་ཟུག་པ་དང་། བརྟན་པ་དང་། བདེ་བ་དང་། འཇིགས་པ་མེད་པ་དང་། ང་རྒྱལ་མེད་པ་དང་། ཀུན་ནས་ཉོན་མོངས་པ་མེད་པ་དང་། བདག་དང་། སེམས་ཅན་དང་། སྲོག་དང་། གང་ཟག་ཉིད་ཡིན་ཏེ། སྤྲིན་ཆེན་སྙིང་པོ་དེ་བས་ན་རྟག་པ་དང་། ཐེར་ཟུག་པ་དང་། བརྟན་པའོ་ཞེས་ང་སྨྲའོ། །སྤྲིན་ཆེན་སྙིང་པོ་ངས་ཉན་ཐོས་ཀྱི་ཐེག་པར་དགེ་སློང་དག་ཡོངས་སུ་གཟུང་བར་བྱ་བ་གང་ཡིན་པ་དེ་ཡོངས་སུ་གཟུང་བར་གྱིས་ཤིག