སྤྲིན་ཆེན་སྙིང་པོ་བརྟན་པའི་དཔེ་ནི་འཇིག་རྟེན་ཐམས་ཅད་ན་མེད་དེ། དེ་དང་འདྲ་བ་ཙམ་གྱི་ཕྱིར་དཔེ་རྣམ་པ་ལྔ་པོ་འདི་དག་ངས་དཔེར་བྱས་མོད་ཀྱི། འདི་ལ་གནས་པའི་བྱང་ཆུབ་སེམས་དཔའ་ལ་ནི་དཔེ་མེད་པར་རིག་པར་བྱའོ། །གསོལ་པ། བཅོམ་ལྡན་འདས་དེ་བཞིན་གཤེགས་པས་ཅི་ལས་དགོངས་ཏེ་ཐར་པ་ལ་ལྕགས་ཀྱི་མར་མེ་གུམ་པའི་ཚུལ་དང་འདྲ་ཞེས་གསུང་། བཀའ་སྩལ་པ། ང་ནི་ཐར་པ་ལ་ལྕགས་ཀྱི་མར་མེ་ཤི་བའི་ཚུལ་དང་འདྲ་ཞེས་མི་ཟེར་གྱི་ཉོན་མོངས་པ་ཟད་པ་ལ་ཟེར་རོ། །གསོལ་པ། བཅོམ་ལྡན་འདས་ཅི་མཁྱེན་བཞིན་དུ་ཐར་པ་ལ་མི་གསུང་གི། །ཉོན་མོངས་པ་ཟད་པ་ལ་གསུང་ངོ་ཞེས་ཤོ་བེ་གསུང་ངམ། ད་ལྟར་ནི་འདི་སྐད་གསུང་ལ་ཆོས་ཐམས་ཅད་ཆུ་ཟླ་དང་འདྲ་སྟེ། སྒྱུ་མ་ལྟ་བུའོ་ཞེས་ཀྱང་དེ་བཞིན་གཤེགས་པས་གསུངས་སོ། །བཀའ་སྩལ་པ། ཆུ་ཟླ་དང་འདྲ་བ་དང་། སྒྱུ་མ་ལྟ་བུ་དང་འདྲ་ཞེས་བྱ་བ་ནི་ཉོན་མོངས་པ་ཟད་པ་ལ་གསུངས་ཀྱི་ཆོས་ཐམས་ཅད་ལ་མ་གསུངས་ཏེ། ཆོས་ལ་ལ་ནི་རྟག །ཆོས་ལ་ལ་ནི་མི་རྟག་ཅེས་ང་སྨྲའོ། །ཡང་བཀའ་སྩལ་པ། ཇི་ལྟ་ཞེ་ན། སེམས་ཅན་གང་དག་ཐར་པའི་ཕྱོགས་སུ་གཏོགས་པ་དེ་དག་ནི་རྟག་པའི་ཆོས་ཅན་ཡིན་ནོ། །གང་དག་སེམས་ཅན་མེད་པ་དང་། སྲོག་མེད་པའི་ཕྱོགས་སུ་གཏོགས་པ་དེ་དག་ནི་མི་རྟག་པའི་ཆོས་ཅན་ཞེས་ང་སྨྲའོ། །གསོལ་པ། དངོས་པོ་མ་མཆིས་པའི་ཚུལ་དུ་བཀའ་སྩལ་ལགས་ན། ཅི་ལས་དགོངས་ཏེ་བཅོམ་ལྡན་འདས་དེ་བཞིན་གཤེགས་པས་ལྕགས་ཀྱི་མར་མེ་གུམ་པ་ལྟ་བུའི་ཚུལ་དུ་བསྟན་པ་མཛད། བཀའ་སྩལ་པ། དེ་ལ་དངོས་པོ་ཅི་ཞིག་ཡོད། གསོལ་པ། འབྲུ་མར་གྱི་སྣོད་དང་། ལྕགས་ཀྱི་རང་བཞིན་མཆིས་སོ། །བཀའ་སྩལ་པ། སྤྲིན་ཆེན་སྙིང་པོ་ལེགས་སོ། །ལེགས་སོ། །དེ་ལྟར་ལྟ་བར་འདོད་པའི་བྱང་ཆུབ་སེམས་དཔས་ཏིང་ངེ་འཛིན་འདི་ལ་གནས་པའི་བྱང་ཆུབ་སེམས་དཔའ་ལ་དངོས་པོའི་རང་བཞིན་དང་འདྲ་བར་བལྟ་བར་བྱའོ། །གལ་ཏེ་འབྲུ་མར་གྱི་སྣོད་དང་། ལྕགས་ཀྱི་རང་བཞིན་དང་ལྷན་ཅིག་ཏུ་མར་མེ་གུམ་པ་ལྟ་བུ་དེ་ཐར་པའི་ཚུལ་ཡིན་ནོ་ཞེས་དེ་བཞིན་གཤེགས་པས་བཤད་པར་གྱུར་ན་ནི་དེ་ལྟར་ན་དེ་བཞིན་གཤེགས་པ་ཆད་པར་སྨྲ་བར་ཡང་འགྱུར་བ་ཞིག་ན། སྤྲིན་ཆེན་སྙིང་པོ་ངས་ནི་དེ་སྐད་མ་བཤད་ཀྱི་དངོས་པོ་མེད་པའི་ཚུལ་དུ་བཤད་དེ།