ཏིང་ངེ་འཛིན་འདི་ནི་སོ་སོའི་སྐྱེ་བོ་དང་ཐུན་མོང་མ་ལགས་སོ། །རང་སངས་རྒྱས་དང་ཐུན་མོང་མ་ལགས་སོ། །བཅོམ་ལྡན་འདས་ཏིང་ངེ་འཛིན་འདི་ནི་གང་དག་སངས་རྒྱས་ཀྱི་ཆོས་ཞེས་བརྗོད་པ་དེ་དག་དང་ཡང་ཐུན་མོང་མ་ལགས་སོ། །བཅོམ་ལྡན་འདས་དེ་ལྟར་ན་ཏིང་ངེ་འཛིན་འདི་ནི་ལྡན་པ་ཡང་མ་ལགས། མི་ལྡན་པ་ཡང་མ་ལགས་སོ། །དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་གང་ཕྲད་པར་འགྱུར་བའམ། ཕྲད་པར་འགྱུར་བ་མ་ལགས་པའི་ཆོས་དེ་དག་མ་མཆིས་པའི་སླད་དུའོ། །ཆོས་འགའ་ཞིག་མ་མཆིས་ན་ནི་དེ་ལྟ་ཡང་ལགས་ན་འགའ་ཡང་མ་མཆིས་པ་དེ་ལ་ནི་ཕྲད་པ་ཡང་མ་མཆིས་མི་ཕྲད་པ་ཡང་མ་མཆིས་ལགས་སོ། །བཅོམ་ལྡན་འདས་དེ་ལྟར་ན་ཏིང་ངེ་འཛིན་འདི་ནི་ཐུན་མོང་མ་ལགས་སོ། །བཅོམ་ལྡན་འདས་གཞན་ཡང་ཏིང་ངེ་འཛིན་འདི་ལ་སུ་ཡང་སྙོམས་པར་མི་འཇུག་སྟེ། དེ་ཅིའི་སླད་དུ་ཞེ་ན། བཅོམ་ལྡན་འདས་སེམས་ཅན་ཐམས་ཅད་ཏིང་ངེ་འཛིན་ལ་སྙོམས་པར་ཞུགས་པའི་སླད་དུའོ། །བཅོམ་ལྡན་འདས་དེ་ལྟ་ལགས་པས་མཉམ་པ་ཉིད་ལ་ནི་སྙོམས་པར་འཇུག་པ་ཡང་མ་མཆིས། ཞུགས་པ་ཡང་མ་མཆིས་ལགས་ཏེ། དེ་ལྟར་ན་ཏིང་ངེ་འཛིན་འདི་ནི་བརྗོད་པར་བགྱི་བ་མ་ལགས་སོ། །བཅོམ་ལྡན་འདས་གཞན་ཡང་ཏིང་ངེ་འཛིན་འདི་ནི་སེམས་ཅན་ཐམས་ཅད་དང་ཐུན་མོང་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་འདི་ལྟར་སེམས་ཅན་ཐམས་ཅད་ཀྱིས་མཉམ་པ་ཉིད་ཐོབ་ལགས་ཏེ། བཅོམ་ལྡན་འདས་དེའི་སླད་དུ་ཏིང་ངེ་འཛིན་འདི་ནི་སེམས་ཅན་ཐམས་ཅད་དང་ཐུན་མོང་ལགས་སོ། །བཅོམ་ལྡན་འདས་གཞན་ཡང་ཏིང་ངེ་འཛིན་འདི་ནི་སུས་ཀྱང་ཐོབ་པ་མ་ལགས་ཏེ། དེ་ཅིའི་སླད་དུ་ཞེ་ན། བཅོམ་ལྡན་འདས་མཉམ་པ་ཉིད་ཀྱི་ཚོགས་མ་མཆིས་པའི་སླད་དུ་སྟེ། བཅོམ་ལྡན་འདས་ཆོས་ཐམས་ཅད་ཀྱི་མཉམ་པ་ཉིད་ནི་མི་དམིགས་པ་ལགས་པའི་སླད་དུའོ། །བཅོམ་ལྡན་འདས་གཞན་ཡང་སེམས་ཅན་ཐམས་ཅད་དང་ཐུན་མོང་ལགས་པ་དེ་ལྟར་ཏིང་ངེ་འཛིན་འདི་ཡང་ཐུན་མོང་ལགས་སོ། །ཇི་ལྟར་སེམས་ཅན་ཐམས་ཅད་མི་འཕྲོགས་པ་དེ་ལྟར་ཏིང་ངེ་འཛིན་འདི་ཡང་མི་འཕྲོགས་པའོ། །བཅོམ་ལྡན་འདས་གཞན་ཡང་གང་སེམས་ཅན་གྱིས་རྣམ་པར་དབེན་པའི་ཏིང་ངེ་འཛིན་དེ་ནི་སེམས་ཅན་ཐམས་ཅད་དང་ཐུན་མོང་ལགས་ཏེ།