བཅོམ་ལྡན་འདས་སངས་རྒྱས་བཅོམ་ལྡན་འདས་རྣམས་ཇི་ཙམ་དུ་དོན་ཤིན་ཏུ་རྣམ་པར་ངེས་པ་ངོ་མཚར་ལགས་སོ། །བཀའ་སྩལ་པ། འཇམ་དཔལ་དེ་བཞིན་དུ་སངས་རྒྱས་བཅོམ་ལྡན་འདས་རྣམས་དོན་དང་ཚིག་ཤིན་ཏུ་རྣམ་པར་ངེས་པ་ཡིན་ནོ། །གསོལ་པ། བཅོམ་ལྡན་འདས་ཚིག་རྣམ་པར་ངེས་པ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། འཇམ་དཔལ་བྱས་པར་ངེས་པའོ། །ཅིའི་ཕྱིར་ངེས་ཞེ་ན། ཚིག་ལན་མེད་པར་ངེས་པའོ། །ཅིའི་ཕྱིར་ཚིག་ལན་མེད་པར་ངེས་ཞེ་ན། ཅིར་ཡང་བརྗོད་པར་བྱ་བ་མ་ཡིན་པའི་ཕྱིར་རོ། །བཅོམ་ལྡན་འདས་བརྗོད་པར་བགྱི་བ་མ་ལགས་པའི་ཚིག་གི་དོན་གང་ལགས། བཀའ་སྩལ་པ། སྨྲ་བ་ནི་བརྗོད་པར་བྱ་བ་སྟེ། སྨྲ་བ་ཐམས་ཅད་ནི་བརྗོད་པར་བྱ་བ་མ་ཡིན་པའོ། །སྨྲ་བ་གང་ཞེ་ན། འཇམ་དཔལ་སྨྲ་བ་ནི་གནས་ཐ་དད་པ་ཞེས་བྱའོ། །གསོལ་པ། བཅོམ་ལྡན་འདས་གནས་ཐ་དད་པ་ཞེས་བགྱི་བའི་ཚིག་གི་དོན་གང་ལགས། བཀའ་སྩལ་པ། འཇམ་དཔལ་གནས་ཐ་དད་པ་ཞེས་བྱ་བ་ནི་སྨྲ་བ་འཛིན་པའི་འཛིན་པ་སྟེ། མཚན་མར་འཛིན་པའོ། །སྲོག་ཏུ་འཛིན་པའོ། །ཐམས་ཅད་འཛིན་པའོ། །གསོལ་པ། བཅོམ་ལྡན་འདས་ཅིའི་སླད་དུ་ཐམས་ཅད་འཛིན་པ་ལགས། བཀའ་སྩལ་པ། གཉི་ག་འཛིན་པ་ཡིན་པའི་ཕྱིར་རོ། །གསོལ་པ། ཅིའི་སླད་དུ་གཉི་ག་འཛིན་པ་ལགས། བཀའ་སྩལ་པ། བདག་ཏུ་འཛིན་པ་དང་། གཞན་དུ་འཛིན་པ་སྟེ། ཚིག་དེ་ནི་བདག་ཏུ་འཛིན་པ་དང་ལྡན་པ་ཡང་མ་ཡིན། གཞན་དུ་འཛིན་པ་དང་ལྡན་པ་ཡང་མ་ཡིན་ཏེ། དེའི་ཕྱིར་ངེས་པ་ཞེས་བྱའོ། །དེ་ནས་བྱམས་མའི་བུ་གང་པོ་འདི་སྙམ་དུ་སེམས་པར་གྱུར་ཏེ་སངས་རྒྱས་བཅོམ་ལྡན་འདས་རྣམས་ནི་ལེགས་པར་གསུངས་པའི་ཚིག་རབ་ཏུ་འབྱེད་པའོ། །སངས་རྒྱས་བཅོམ་ལྡན་འདས་རྣམས་ནི་ངེས་པའི་དོན་གཅིག་ཏུ་སྒྲུབ་ཅིང་རྣམ་པར་དབྱེ་བ་ལ་མཁས་པའོ། །སངས་རྒྱས་བཅོམ་ལྡན་འདས་རྣམས་ནི་ཡེ་ཤེས་ཡོངས་སུ་གཏུགས་པ་མེད་པ་ཐུགས་སུ་ཆུད་པའོ། །སངས་རྒྱས་བཅོམ་ལྡན་འདས་རྣམས་ནི་ཚིག་འབྲུ་གསལ་བའོ། །སངས་རྒྱས་བཅོམ་ལྡན་འདས་རྣམས་ནི་ཆོས་ཀྱི་འཁོར་ལོ་ལ་ལྡེམ་པོར་དགོངས་པའི་བཀོད་པ་ལ་མངོན་པར་དགྱེས་པ་སྟེ། མ་ལ་བདག་གིས་བཅོམ་ལྡན་འདས་ལ་ཆོས་ཐམས་ཅད་ལ་ཡི་གེ་བསྒྲུབ་པའི་རྣམ་པར་དབྱེ་བ་ངེས་པར་རྣམ་པར་འབྱེད་པ་ཞུ་བར་བྱ་གོར་མ་ཆག་སྙམ་མོ།