རིགས་ཀྱི་བུ་མོ་གང་ལ་ལ་ཞིག་གིས་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཐ་ན་གླེགས་བམ་དུ་བྱས་ཏེ། འཆང་བ་དང་། ཀློག་པ་དང་། ཟླ་བ་ཕྱེད་ཀྱི་བར་དུ་བརྗོད་ཅིང་འདོན་པ་དེས་རྨི་ལམ་ན་ང་ཆོས་སྟོན་པ་མཐོང་ན་དེའི་ཡོན་ཏན་གྱི་ཕན་ཡོན་དུ་འགྱུར་བ་ནི། ཀུན་དགའ་བོ་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཐ་ན་རིགས་ཀྱི་བུའམ། རིགས་ཀྱི་བུ་མོ་གང་ལ་ལའི་རྣ་ལམ་དུ་གྲག་པ་དང་། ཐ་ན་ཐོས་པ་ཙམ་དུ་ཡང་འགྱུར་བ་དང་། ཐོས་ནས་ཀྱང་ཡི་རངས་པར་འགྱུར་ན། ཀུན་དགའ་བོ་དེས་ན་དེའི་མཐའ་ནི་ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་དེ་དག་གིས་སངས་རྒྱས་མང་པོ་ལ་བསྙེན་བཀུར་བྱས་པ་ཡིན་པར་རྟོགས་པར་བྱ་སྟེ། ཀུན་དགའ་བོ་ཆོས་ཟབ་མོ་འདི་བསྟན་པས་རིགས་ཀྱི་བུའམ། རིགས་ཀྱི་བུ་མོ་དག་མི་སྐྲག་ཅིང་མི་དངང་ལ་དངང་བར་མི་འགྱུར་བའི་རྣམ་པ་ནི་དེ་ཡིན་ནོ། །མཚན་མ་ནི་དེ་ཡིན་ནོ། །རྟགས་ནི་དེ་ཡིན་ནོ། །དབྱིབས་ནི་དེ་ཡིན་ནོ། །ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་གང་དག་ཁ་ཅིག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཡང་དག་པར་ཞུགས། ཡང་དག་པར་འཇུག །ཡང་དག་པར་འཇུག་པར་འགྱུར་བ་དེ་དག་གིས་ཀྱང་དེ་བཞིན་གཤེགས་པ་བགྲོ་བ་དང་། ཆོས་བགྲོ་བ་ཆོས་ཀྱི་རྣམ་གྲངས་འདི་ཐ་ན་ཚིག་བཞི་པའི་ཚིགས་སུ་བཅད་པ་ཙམ་ཡང་གཟུང་བར་བྱ། ཀུན་ཆུབ་པར་བྱ། གདོན་པར་བྱ། བཅང་བར་བྱ། གཞན་དག་ལ་ཡང་བཤད་པར་བྱ། བསྟན་པར་བྱ་སྟེ། ཀུན་དགའ་བོ་རིགས་ཀྱི་བུའམ། རིགས་ཀྱི་བུ་མོ་དེ་དག་གི་བསོད་ནམས་མང་དུ་འཕེལ་བར་འགྱུར་རོ། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་སང་གི་གདུགས་ལ་དགེ་སློང་གི་དགེ་འདུན་དང་ཐབས་ཅིག་ཏུ་བདག་གི་གདུགས་ཚོད་གསོལ་བར་གནང་བར་མཛད་དུ་གསོལ། རྒྱལ་པོ་གསལ་རྒྱལ་ལ་ཐུགས་བརྩེ་བར་མཛད་པའི་སླད་དུ། བཅོམ་ལྡན་འདས་ཀྱིས་ཅང་མི་གསུང་བས་གནང་ངོ་། །དེ་ནས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བདག་ཅག་ནི་བགྱི་བ་མང་ཞིང་བགྱིད་པ་མང་བས་མཆི་ལགས་སོ།