།བཅོམ་ལྡན་འདས་ཆོས་ཀྱི་རྣམ་གྲངས་ཟབ་མོ་འདི་ནི་ངོ་མཚར་ལགས་སོ། །བཅོམ་ལྡན་འདས་ཆོས་འདི་བསྟན་པས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ངེས་པར་འབྱུང་བའི་སེམས་ཅན་ནི་ཇི་སྙེད་ཅིག་མཆིས་ལགས། ཉན་ཐོས་ཀྱི་གནས་ལ་གནས་པ་ནི་ཇི་སྙེད་ཅིག་མཆིས་ལགས། རང་སངས་རྒྱས་ཀྱི་གནས་ལ་གནས་པ་ནི་ཇི་སྙེད་ཅིག་མཆིས་ལགས། བཅོམ་ལྡན་འདས་ཀྱིས་བཀའ་སྩལ་པ། རྒྱལ་པོ་ཆེན་པོ་འདི་ལྟར་ང་འཆད་པ་གང་ཡིན་པ་དང་། འཆད་པར་འགྱུར་བ་གང་ཡིན་པ་དང་། ངས་ཆོས་བཤད་པ་གང་ཡིན་པ་དང་། ཆོས་མངོན་པར་རྫོགས་པར་སངས་རྒྱས་པ་གང་ཡིན་པའི་ཆོས་བསྟན་པ་འདི་ལ་ནི་སེམས་ཅན་ངེས་པར་འབྱུང་བ་གང་ཡང་མེད་དོ། །ཉན་ཐོས་ཀྱི་ཕྱིར་གནས་པ་མ་ཡིན་ནོ། །རང་སངས་རྒྱས་ཀྱི་ཕྱིར་གནས་པ་མ་ཡིན་ནོ། །རྒྱལ་པོ་ཆེན་པོ་འདི་ལྟ་སྟེ། དཔེར་ན་སྒྱུ་མ་མཁན་ནམ། སྒྱུ་མ་མཁན་གྱི་སློབ་མ་མཁས་པ་ཞིག་གིས་སྐྱེ་བོ་ཕལ་པོ་ཆེའི་མདུན་དུ་དཔུང་གི་ཚོགས་ཡན་ལག་བཞི་པ་མངོན་པར་སྤྲུལ་ཏེ། ཤོམ་ཞིང་གོ་ཆ་བསྐོན་ལ། རྒྱལ་པོ་གཉིས་གཡུལ་འགྱེད་པར་སྡུད་པ་ལས། རྒྱལ་པོ་ཆེན་པོ་དེ་ལ་སྒྱུ་མ་མཁན་གྱིས་སྤྲུལ་པའི་རྒྱལ་པོ་གཉིས་ལས། དེ་ལ་རྒྱལ་པོ་གཅིག་ནི་ཕམ་པར་གྱུར། དེ་ལ་རྒྱལ་པོ་ཅིག་ཤོས་གང་ཡིན་པ་དེ་ནི་སྤྲུལ་པའི་གཡུལ་དེར་གཡུལ་བཀྱེ་བ་ལས་སྤྲུལ་པའི་རྒྱལ་པོ་དེ་རྒྱལ་ནས། དེ་དཔུང་གི་ཚོགས་ཡན་ལག་བཞི་པོ་དེའི་མདུན་དུ་ཚིག་འདི་སྐད་ཅེས་ངས་རྒྱལ་པོ་ཆེན་པོ་ཕམ་པར་བྱས་སོ། །ངས་ཚེར་མ་ཕྱུང་ངོ་ཞེས་སྨྲ་ན་རྒྱལ་པོ་ཆེན་པོ་འདི་ཇི་སྙམ་དུ་སེམས། རྒྱལ་པོ་ཕམ་པ་དེ་ཅི་འདྲ་བ་ཞིག་ཡིན། གསོལ་པ། བཅོམ་ལྡན་འདས་སྒྱུ་མ་མཁན་གྱིས་སྤྲུལ་པའི་རྒྱལ་པོས་སྒྱུ་མ་མཁན་གྱིས་སྤྲུལ་པ་ཕམ་པར་བགྱིས་སོ། །བཀའ་སྩལ་པ། རྒྱལ་པོ་ཆེན་པོ་སྤྲུལ་པས་སྤྲུལ་པ་འགའ་ཞིག་ཕམ་པར་བྱེད་དམ། གསོལ་པ། བཅོམ་ལྡན་འདས་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། སྤྲུལ་པའི་མཐུ་གང་ལགས་པ་དེ་ནི་དངོས་པོ་མ་མཆིས་པ་ལགས་ཏེ། དངོས་པོ་མ་མཆིས་པས་དངོས་པོ་མ་མཆིས་པ་ཕམ་པར་བགྱིད་པ་མ་མཆིས་པའི་སླད་དུའོ། །བཅོམ་ལྡན་འདས་རྒྱལ་པོ་ཕམ་པ་འདི་དང་། རྒྱལ་པོ་འདི་ཞེས་བགྱི་བ་དེ་ནི་བྱིས་པ་རྣམས་ཀྱི་རྨོངས་པ་ལགས་སོ། །བཀའ་སྩལ་པ།