བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་ཏེ་དེ་དག་འཇུག་གོ། །ཅིའི་ཕྱིར་འཇུག་ཅེ་ན། ཆོས་ཐམས་ཅད་སྟོང་པ་ལ་འཇུག་སྟེ། གང་དག་སྟོང་པ་ཉིད་ལ་འཇུག་པ་དེ་དག་འཇུག་སྟེ། དེའི་ཕྱིར་ཆོས་ཐམས་ཅད་ནི་སྟོང་པ་ཉིད་ཅེས་བརྗོད་དོ། །གཟུང་བར་བྱ་བ་མ་ཡིན་པ་ཞེས་བྱ་བ་ནི་ཆོས་ཐམས་ཅད་མཚན་མ་མེད་པའོ། །རྒྱལ་པོ་ཆེན་པོ་ཅིའི་ཕྱིར་མཚན་མ་མེད་ཅེ་ན། རྒྱལ་པོ་ཆེན་པོ་ཆོས་ཐམས་ཅད་ནི་བདག་མེད་པ་སྟེ། གང་དག་བདག་མེད་པ་དེ་དག་ནི་བསྟན་དུ་མེད་པའོ། །གང་དག་བསྟན་དུ་མེད་པ་དེ་དག་ནི་མི་འཁྲུགས་པའོ། །གང་དག་མི་འཁྲུགས་པ་དེ་དག་ནི་གནས་པའོ། །གང་དག་གནས་པ་དེ་དག་ནི་མ་བསྒྲུབས་པའོ། །གང་དག་མ་བསྒྲུབས་པ་དེ་དག་ནི་ཆུད་ཟོས་པ་མེད་པའོ། །གང་དག་ཆུད་ཟོས་པ་མེད་པ་དེ་ནི་ཆོས་རྣམས་ཀྱི་ཆོས་ཀྱི་དབྱིངས་གནས་པ་ཞེས་བྱའོ། །རྒྱལ་པོ་ཆེན་པོ་ཆོས་ཀྱི་དབྱིངས་གནས་པ་ཞེས་བྱ་བ་ཅིའི་ཕྱིར་ཆོས་གནས་པ་ཞེས་བྱ་ཞེ་ན། རྒྱལ་པོ་ཆེན་པོ་ཆོས་ནི་གནས་མེད་པའོ། །གནས་མེད་པ་ཞེས་བྱ་བ་དེ་ནི་དང་པོ་ཉིད་ནས་མི་དམིགས་ལ་དང་པོ་ཉིད་ཀྱང་མི་དམིགས་སོ། །གང་དག་གི་གནས་མི་དམིགས་པ་དེ་དག་གི་འགྲོ་བ་ཡང་མེད་དོ། །འོང་བ་ཡང་མེད་དོ། །གང་གི་འོང་བ་མི་དམིགས་པ་དེ་ཐམས་ཅད་ནི་སྟོང་པའི་དབྱིངས་ཞེས་བྱའོ། །རྒྱལ་པོ་ཆེན་པོ་ཅིའི་ཕྱིར་དབྱིངས་མི་དམིགས་ཞེ་ན། གལ་ཏེ་དབྱིངས་ལས་དབྱིངས་ཤིག་དམིགས་ན་དབྱིངས་དེ་ཉིད་དབྱིངས་སུ་འགྱུར་རོ། །རྒྱལ་པོ་ཆེན་པོ་དེ་ལྟར་ན་བྱིས་པ་རྣམས་ནི་རྣམ་པར་ཐར་པ་ལ་རྒྱུག་གོ། །རྒྱལ་པོ་ཆེན་པོ་རྣམ་པར་ཐར་པ་ཞེས་བྱ་བ་ཅིའི་ཕྱིར་རྣམ་པར་ཐར་པ་ཞེས་བྱ་ཞེ་ན། རྣམ་པར་ཐར་པ་ནི་ཟད་པ་མེད་པའོ། །གང་དག་ཟད་པ་མེད་པ་ལ་རྒྱུག་པ་དེ་དག་ནི་ཟད་པར་འགྱུར་རོ། །གང་དག་ཟད་པར་འགྱུར་བ་དེ་དག་ནི་ཡོངས་སུ་ཟད་པར་འགྱུར་རོ། །གང་དག་ཡོངས་སུ་ཟད་པར་འགྱུར་བ་དེ་དག་ནི་ཡོངས་སུ་ཉམས་པར་འགྱུར་རོ། །ཇི་ལྟར་ཡོངས་སུ་ཉམས་པར་འགྱུར་ཞེ་ན། རང་བཞིན་ལས་ཡོངས་སུ་ཉམས་པར་འགྱུར་ཏེ། གང་དག་ཡོངས་སུ་ཉམས་པར་འགྱུར་བ་དེ་དག་གི་རྣམ་པར་ཐར་པའི་སྒོ་ནི་ཐག་རིང་ངོ་། །རྒྱལ་པོ་ཆེན་པོ་སྒོ་ཞེས་བྱ་བ་ཅིའི་ཕྱིར་སྒོ་ཞེས་བརྗོད་ཅེ་ན། གཉིས་ལ་ཀུན་ནས་དགའ་བ་དེའི་ཕྱིར་སྒོའོ། །རྒྱལ་པོ་ཆེན་པོ་རྣམ་པར་ཐར་པའི་སྒོ་ཞེས་བྱ་བ་འདི་ནི་ལྡེམ་པོ་ངག་གོ།