།སེམས་ཅན་ཀུན་གྱི་དོན་སླད་དུ། །ཁྱོད་ལ་བདག་ནི་ན་བཟའ་འབུལ། །བདག་གིས་སེམས་ནི་ཚར་བཅད་ཅིང་། །བདག་གིས་སེར་སྣ་བཅོམ་པས་ན། །ཆོས་རྣམས་བསྐྱེད་པའི་ཆེད་ཀྱི་ཕྱིར། །བདག་གིས་སེམས་ལ་གཏོང་བ་སྐྱེས། །དེ་ནས་བཅོམ་ལྡན་འདས་ཀྱིས་ཡུལ་ཀོ་ས་ལའི་རྒྱལ་པོ་གསལ་རྒྱལ་གྱིས་ན་བཟའ་ཕུལ་བ་བཞེས་ནས་རྒྱལ་པོ་གསལ་རྒྱལ་ལ་བཀའ་སྩལ་པ། རྒྱལ་པོ་ཆེན་པོ་ཁྱོད་ཀྱིས་སེམས་བསྐྱེད་པ་རྒྱ་ཆེན་པོ་སྐྱེས་པ་ལེགས་སོ་ལེགས་སོ། །རྒྱལ་པོ་ཆེན་པོ་དེའི་ཕྱིར་ཆོས་བཞི་པོ་དག་ལ་བརྩོན་པར་བྱ་སྟེ། བཞི་གང་ཞེ་ན། རྒྱལ་པོ་ཆེན་པོ་འདི་ལྟ་སྟེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་ཡུལ་ན་མཐུ་དང་བརྩོན་འགྲུས་ཐོབ་པས་དགེ་སྦྱོང་དང་། བྲམ་ཟེ་ཚུལ་ཁྲིམས་དང་ལྡན་པའི་ཐད་དུ་འགྲོ་བར་བྱ་ཞིང་ཡོངས་སུ་དྲི་བར་བྱ་བ་དང་། དེ་བཞིན་གཤེགས་པའི་བསྟན་པ་བསྲུང་བ་དང་བསྐྱབ་པའི་ཕྱིར་བསྒྲུབ་པར་བྱ་བ་དང་། ཟབ་མོ་ལ་མོས་པས་ཆོས་བཙལ་བར་བྱ་བའི་ཕྱིར་སྤྲོ་བར་བྱ་བ་དང་། ལོག་པར་ལྟ་བ་དང་བྲལ་བས་ཡང་དག་པ་ཉིད་དུ་ངེས་པར་བྱ་བའི་ཕྱིར་སྤྲོ་བར་བྱ་བ་སྟེ། རྒྱལ་པོ་ཆེན་པོ་ཆོས་བཞི་པོ་དེ་དག་ལ་བརྩོན་པར་བྱའོ། །བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས། བདེ་བར་གཤེགས་པས་དེ་སྐད་གསུངས་ཏེ། སྟོན་པས་གཞན་ཡང་འདི་སྐད་ཅེས་བཀའ་སྩལ་ཏོ། །དགེ་སློང་ཚུལ་ཁྲིམས་ལྡན་རྣམས་ལ། །གུས་པ་དག་ནི་རྟག་བྱེད་ཅིང་། །དངོས་པོ་ཀུན་གྱིས་འདྲི་བྱེད་པ། །དེས་ནི་ཤེས་རབ་རྣམ་པར་འཕེལ། །དགེ་སློང་རྣམས་ལ་གུས་པ་དག །བྱས་པའི་ལས་ནི་དགེ་བ་ཡི། །ཇི་ལྟར་དག་པ་དེ་བཞིན་དུ། །དེ་ཡི་སེམས་ནི་དག་པར་འགྱུར། །བསྟན་པ་བསྲུང་བ་བྱས་པ་ནི། །རྟག་ཏུ་ཀུན་ནས་བསྲུང་བ་ཡིན། །ཡན་ལག་དང་པོ་འདི་ཡིས་ནི། །ལུས་ནི་ངེས་པར་དག་པར་འགྱུར། །རྒྱལ་རིགས་དག་གིས་ཟབ་མོའི་ཆོས། །རྟག་ཏུ་ཉན་ཅིང་འདུག་བྱེད་ན། །ཕྱིར་ཞིང་ཐོས་པར་འདོད་འགྱུར་ཞིང་། །ཡང་དང་ཡང་དུ་ཚོལ་བར་འགྱུར། །ཟབ་མོའི་ཆོས་ནི་ཐོས་ནས་ཀྱང་། །ལོག་པ་དག་ནི་སྤྱོད་མི་བྱེད། །རྒྱལ་པོ་ལོག་པར་ལྟ་བྲལ་ཞིང་། །ཡང་དག་ཆོས་ནི་ཤེས་པར་འགྱུར། །ཟབ་མོའི་ཆོས་ནི་ཤེས་ནས་ཀྱང་། །དེ་ནི་ལོག་པར་མི་སྤྱོད་ཅིང་། །སྡིག་པ་ཀུན་དང་བྲལ་བས་ན། །དེས་ན་རྒྱལ་པོ་ཁྱད་པར་འཕགས།